Spačatku Maskva i Brusiel atrymali poŭchi, a potym — revieransy. Piša ŭ svaim błohu na NN Alaksandr Kłaskoŭski.
Spačatku Maskva i Brusiel atrymali poŭchi, a potym — revieransy. Tak vyhladaje šmatviektarnaja palityka pa-biełarusku.
Nie paśpieli kamientatary pieramałoć demarš Łukašenki: maŭlaŭ, prakinuŭ Maskvu z manieŭrami ADKB i ŭsio takoje, — jak taja atrymała žadany pakiet padpisanych im dakumientaŭ pra KSAR.
Zrešty, jak prahnazujuć analityki, farmat udziełu Minska ŭ hetym prajekcie budzie redukavanym. Rasija atrymała najpierš psichałahičny padarunak.
I druhi kulbit. Tolki ŭčora pry ŭručeńni davierčych hramat ambasadary ź Jeŭropy vysłuchali maralite (nijakich chutkaciečnych sastupak pavodle rekamiendacyj apazicyi pierad Radaj Jeŭraźviazu nie dačakajeciesia!), a ŭžo siońnia pres-słužba Łukašenki chutkaciečna abvieściła, što jon navažyŭsia libieralizavać vybarčaje zakanadaŭstva. Pryčym heta nakiravana «na zadavalnieńnie niekatorych prapanoŭ ABSIE i biełaruskich palityčnych partyj».
Naturalna, tut najpierš pył u vočy. Adznačajecca, što mierkavanyja jurydyčnyja naveły buduć źviazany sa spraščeńniem paradku vyłučeńnia kandydataŭ, dadatkovaj achovaj i abaronaj skryń dla hałasavańnia (jaki surovy militarny pafas, fantazija adrazu maluje ordy destruktyŭnych elemientaŭ, što atakujuć tyja skryni!). Taksama zhadvajecca pra zabieśpiačeńnie nadziejnaści daterminovaha hałasavańnia (nadziejnaści dla kaho?) dy inšyja «techničnyja momanty».
Tut klučavoje — «techničnyja momanty». Pryncypovych źmienaŭ nie čakajcie, bo źbirajecca bałatavacca sami viedajecie chto.
Kandydataŭ ža i na minułych parłamienckich vybarach, zdajecca, nie nadta zrazali dy taŭkli. U televizary ich havarkija hałovy až pa dva razy pakazali. A Pałata atrymałasia ŭsio adno «sterylnaja». Chiba ŭ achovie skryniaŭ prablema? Sami vybary zastajucca «čornaj skryniaj». Pra harantyi prazrystaści kštałtu abaviazkovaha ŭłučeńnia partyjcaŭ u kamisii, jak bačym, nie viadziecca.
I ŭsio ž pakazalna, što
sastupka Jeŭropie zroblenaja litaralna nazaŭtra paśla taho, jak Łukašenka pračytaŭ ambasadaram natacyju: niama čaho, maŭlaŭ, brać za harlak dy vymahać demakratyzacyi pa šparhałkach tutejšaj apazicyi!
Chaj sabie sastupki mikraskapičnyja, ale ž fakt toje, što aficyjny lider nie taki kruty, jak choča pakazać.
Nabiaryciesia ciarpieńnia, Łukašenka nie viečny, kinuŭ jon 19 kastryčnika pasłam. Bačycie: usio vymiarajecca chranałohijaj asabistaha kiravańnia, astatniaje vyhladaje druhasnym. Hramadzie ž najvažniej, što zbudavanaja im sistema nie viečnaja. I zaraz my ŭžo bačym, što kropla kamień točyć.
Kolki ni doŭžy palityku kivača, a zvarotu da naftahazavaj durnicy nie budzie. Pierabudovie ekanamičnaj madeli alternatyvy niama. Rasija ž nas nie madernizuje adnaznačna. A voś prahłynuć moža jak dvojčy dva. Tamu daviadziecca «praź nie chaču» damaŭlacca z Zachadam. Biełaruś cicha ŭpaŭzaje ŭ epochu źmienaŭ.
Kamientary