«Zroblena chatnimi haspadyniami». Kiraŭnik Rheinmetall pahardliva vykazaŭsia pra ŭkrainskija drony, ukraincy jamu adkazali

Što skazaŭ Papierhier

Dniami ŭ intervju z žurnalistam amierykanskaha vydańnia The Atlantic Sajmanam Šusteram hiendyrektar niamieckaj kampanii Rheinmetall Armin Papierhier zajaviŭ, što va ŭkrainskich dronach niama ničoha inavacyjnaha, a ich vytvorcaŭ nazvaŭ «ukrainskimi chatnimi haspadyniami».

Niamiecki abaronny kancern Rheinmetall najbolš viadomy vytvorčaściu artyleryi i tankaŭ. Ukraina navučyłasia źniščać padobnuju zbroju z dapamohaj tannych bieśpiłotnikaŭ.

Pobyvaŭšy na adnym z zavodaŭ Rheinmetall u niamieckim Unterlusie, Šuster pacikaviŭsia, ci nie ŭjaŭlaje pahrozu biznesu Papierhiera hetaja revalucyja ŭ vajskovych technałohijach.

«Heta prosta hulnia z «Leha». Jakaja tut inavacyja z boku Ukrainy? U ich niama niejkaha technałahičnaha praryvu. Jany stvarajuć inavacyi z dapamohaj svaich maleńkich bieśpiłotnikaŭ i kažuć: «Vaŭ!» — i heta cudoŭna. Nu i dobra. Ale heta nie technałohija Lockheed Martin, General Dynamics ci Rheinmetall», — skazaŭ jon.

Ukrainskija drony źbirajuć pieravažna ź impartnych detalaŭ, u tym liku rotaraŭ, ruchavikoŭ, kamier i kampjutarnych čypaŭ, zaŭvažyŭ Šuster.

Pavialičyć

Bolšaść hetych kampanientaŭ pastupajuć z Kitaja, dzie adna kampanija vyrablaje bolš za 80% nievialikich dronaŭ u śviecie. Ale ich tannaść, asabliva ŭ paraŭnańni sa składanymi sistemami ŭzbrajeńnia, jakija vyrablajuć takija kampanii, jak Lockheed Martin i Rheinmetall, — mienavita toje, što robić ich takimi razburalnymi.

Usiaho za niekalki sotniaŭ dalaraŭ ukrainskija drony mohuć nanieści surjoznuju škodu vajskovaj technicy koštam u miljony.

«Jany zrabili z tankami i harmatami toje, što muškiety kaliści zrabili z rycarami ŭ bliskučych daśpiechach», — piša Šuster.

Kali žurnalist zaŭvažyŭ, što Ukraina ciapier vyrablaje bolš dronaŭ, čym lubaja demakratyja ŭ śviecie, i spytaŭ, jak heta moža adbicca na biznes-madeli Papierhiera, toj aburyŭsia.

Jon spytaŭ, chto źjaŭlajecca najbujniejšym vytvorcam dronaŭ va Ukrainie — Šuster nazvaŭ Fire Point (vytvorcu dronaŭ FP-1, FP-2 i rakiet «Fłaminha») i Skyfall (jakaja vyrablaje ciažkija drony-bambaviki Vampire).

«Heta ŭkrainskija chatnija haspadyni. U ich na kuchni jość 3D-pryntary, i jany vyrablajuć detali dla dronaŭ. Heta nie inavacyja», — adkazaŭ hiendyrektar niamieckaha kancerna.

Na jaho dumku, Ukraina nie zmoža pradavać svaje drony NATA, bo nie atrymaje licenziju Aljansu praź biurakratyju i supraciŭ zachodnich rehulataraŭ.

«Impieryja» Papierhiera, nahadvaje Šuster, achoplivaje 180 zavodaŭ (u tym liku ŭ Złučanych Štatach), jakija vyrablajuć nie tolki tanki i artyleryju, ale i karabli, rakiety, bieśpiłotniki, zienitnyja batarei i fiuzielažy dla źniščalnikaŭ, takich jak F-35.

Letaś Papierhier zajaŭlaŭ pra hatoŭnaść zabiaśpiečyć zbrojaj patencyjnuju mižnarodnuju miratvorčuju misiju paśla zakančeńnia vajny Rasii suprać Ukrainy. Kampanija nieadnarazova pieradavała Ukrainie svajo ŭzbrajeńnie. Siarod jaho, naprykład, sistemy supraćpavietranaj abarony Skyranger 35, pryznačanyja dla pierachopu «šachiedaŭ» i inšych bieśpiłotnikaŭ.

Paśla abureńnia, jakoje vyklikali słovy Papierhiera, Rheinmetall vystupiła z aficyjnaj zajavaj, padtrymaŭšy Ukrainu. U kampanii zajavili, što z pavahaj staviacca da namahańniaŭ ukraincaŭ u abaronie ad rasijskaha ŭvarvańnia, asabliva va ŭmovach abmiežavanych resursaŭ.

«Inavacyjnaja siła i bajavy duch ukrainskaha naroda źjaŭlajucca dla nas natchnieńniem. My ŭdziačnyja za mahčymaść padtrymać Ukrainu resursami, jakija jość u našym rasparadžeńni», — napisała kampanija ŭ X.

Adkaz Ukrainy

Słovy hiendyrektara Rheinmetall paprasili prakamientavać prezidenta Ukrainy. U tradycyjnym užo abmienie paviedamleńniami ŭ čacie žurnalisty spytali Zielenskaha, ci bačyć jon u hetaj zajavie ataku na ŭkrainski APK?

«Kali kožnaja chatniaja haspadynia Ukrainy sapraŭdy moža vyrablać drony, tady kožnaja chatniaja haspadynia Ukrainy moža być hiendyrektaram Rheinmetall. I ja vinšuju z hetym vysokim uzroŭniem naš ukrainski abaronna-pramysłovy kompleks», — skazaŭ prezident.

Jon dadaŭ, što treba kankuryravać nie rytorykaj, a technałohijami i vynikam. Vynik hetych technałohij Ukraina «štodnia pakazvaje i na poli boju, i na ziamli, i ŭ niebie, i na mory», skazaŭ Zielenski. Jon dadaŭ, što efiektyŭnaść ukrainskaj zbroi tłumačycca jaje vopytam vajny z Rasijaj, jakoha nie majuć inšyja krainy.

Premjer-ministarka Ukrainy Julija Śvirydzienka raniej u paście na płatformie X adkazała, što «na ŭkrainskich «chatnich haspadyniach» trymajecca abarona Jeŭropy». «Ukrainskija žančyny sapraŭdy źjaŭlajucca važnaj častkaj vajennych namahańniaŭ Ukrainy i biaśpieki Jeŭropy».

U toj ža čas na supiarečlivuju zajavu Papierhiera adreahavali i ŭkrainskija vytvorcy dronaŭ. Kampanija Skyfall, jakuju sam Šuster paprasiŭ prakamientavać słovy kiraŭnika Rheinmetall, adkazała z humaram.

«Kali drona, zroblenaha ŭkrainskimi «chatnimi haspadyniami», dastatkova, kab źniščyć tanki i artyleryju… Miarkuju, ciapier aficyjna nastała era «chatnich haspadyń», — pracytavaŭ ich adkaz žurnalist.

Kiraŭnik adnoj z najbujniejšych ukrainskich kampanij — vytvorcaŭ dronaŭ Alaksandr Jakavienka adznačyŭ, što słovy Papierhiera prademanstravali, jak hłyboka jeŭrapiejski abaronny isteblišmient da hetaha času nie razumieje pryrodu sučasnaj vajny.

Pavialičyć

Jon raskazaŭ, što tolki za 2025 hod ukrainskija drony nanieśli 90% usich bajavych strat rasijskaj armii — bolš, čym usie astatnija vidy ŭzbrajeńnia razam uziatyja. Adna tolki kampanija TAF Industries, jakuju zasnavaŭ Jakavienka, vyrablaje da 100 000 FPV-dronaŭ za miesiac.

«Za lubyja 90 dzion tolki vyraby majoj kampanii majuć bolš paćvierdžanych paražeńniaŭ, čym usia vaša technika za ŭsiu svaju historyju bajavoha prymianieńnia va ŭsich kanfliktach. I hałoŭnaje — ja stvaryŭ hetuju kampaniju i hety vynik za dva hady, a nie za 50», — napisaŭ jon.

Jakavienka patłumačyŭ, jak źmianiłasia vajna, zajaviŭšy, što hetyja źmieny — nie hulnia, a «pramysłovy darvinizm», heta značyć evalucyja ŭ realnym časie. Rasijskaja radyjoelektronnaja baraćba zrabiła GPS-kiravanyja zachodnija bojeprypasy (Excalibur, GMLRS i h.d.) amal nieefiektyŭnymi.

Darahija i składanyja sistemy, stvoranyja dla vajny z pavietranaj pieravahaj i kłasičnaj peer-on-peer vajny, stali zdabyčaj dla dronaŭ koštam $500—2000, jakija palujuć na ich źvierchu, patłumačyŭ śpiecyjalist. Jon dadaŭ, što suadnosiny «košt — efiekt» pieraviarnulisia, bo adzin 120‑mm snarad Rheinmetall abo adna supraćtankavaja rakieta kaštuje daražej za dziasiatak ukrainskich dronaŭ, a jany ŭsio roŭna pieramahajuć.

Pavialičyć

Pavodle słoŭ Jakavienki, jeŭrapiejskim vytvorcam varta nie ździekavacca z ukrainskich technałohij, a pieraniać dośvied.

Nie ŭtrymaŭsia ad adkazu Papierhieru i kamandujučy Sił bieśpiłotnych sistem USU Robiert Broŭdzi «Madziar». Jon apublikavaŭ videa, na jakim ukrainski dron paražaje elektrapadstancyju na akupavanaj Łuhanščynie, padpisaŭšy jaho: «Amatarska-domahaspadarčaja leha-ptuška pilnuje, kab lišniaje śviatło na ČAT było vyklučana».

Na jaho dumku, bujnym karparacyjam ciažka pryniać «demakratyzacyju vysokadakładnaj zbroi «kuchonnym dziarmom i pałkami». «Heta novaja daktryna, najnoŭšaja vajna», — padahulniŭ jon.

Tym časam u sacsietkach nabirajuć papularnaść cheštehi #MadeByHousewives i #LEGODrones. U pastach pad imi karystalniki krytykujuć nieaściarožnyja słovy Papierhiera i vykazvajuć padtrymku Ukrainie.

U sakaviku kraina adpraviła na Blizki Uschod svaich vajskovych ekśpiertaŭ i śpiecyjalistaŭ pa baraćbie ź bieśpiłotnikami. Patreba ŭ hetym źjaviłasia paśla taho, jak supraćpavietranaja abarona krain Piersidskaha zaliva akazałasia nie zanadta efiektyŭnaj suprać iranskich «šachiedaŭ».

U mai minułaha hoda padčas vučeńniaŭ NATA ŭ Estonii ŭkrainskija vajskoŭcy pakazali surjoznyja niedachopy i ŭraźlivyja miescy Aljansu padčas boju ź bieśpiłotnikami. Padraździaleńnie ŭsiaho z 10 ukrainskich vajskoŭcaŭ zmahło razhramić dva bataljony NATA.

• 9
• 0
• 3
• 0
• 0
• 0
• 1
• 0