Statkievič prapanavaŭ łozunh, jaki abjadnaje bolšaść biełarusaŭ

Miesiac tamu ja apublikavaŭ artykuł «Apakalipsis zaŭtra. Zona śmierci na «Bałkonie». Hety materyjał mieŭ peŭny rezanans. Dy i raźvićcio padziej, novaja infarmacyja pierakonvajuć mianie ŭ słušnaści vykazanych zaściaroh. Tamu mušu znoŭ viarnucca da temy taho artykuła. Parazvažajem pra matyvy tych, chto hatovy stvaryć jadzierny apakalipsis na našaj ziamli, i ich mahčymaści zrabić heta.

Situacyja ŭ našym rehijonie robicca ŭsio bolš składanaj i napružanaj. Maskva, vidavočna, prajhrała Ukrainu. Napad na Ukrainu byŭ dla Kramla praciaham daŭno prajhranaj chałodnaj vajny z NATA. Sprava ŭ tym, što ideja impierskaha revanšu źjaŭlałasia i źjaŭlajecca naviaźlivaj idejaj značnaj častki rasijskaha hramadstva. Možna navat skazać — sučasnaj rasijskaj nacyjanalnaj idejaj, jakuju ŭličvaje i vykarystoŭvaje kiroŭny ŭ Rasii režym. Niaŭdača va Ukrainie, asabliva na fonie ekanamičnych ciažkaściaŭ, moža pryvieści da sacyjalnaha i palityčnaha kryzisu i pahrozy dla ŭłady. Rasiejcy darujuć caru miljony ŭłasnych, a tym bolš čužych achviar, ale nie darujuć parazaŭ.

Dla aŭtakrataŭ absalutnaja ŭłada źjaŭlajecca kaštoŭnaściu sama pa sabie. Dla ich jana — mocny narkotyk, admovicca ad jakoha niemahčyma. Jany atajasamiać siabie ź dziaržavaj, a niekatoryja navat sa svajoj krainaj. Naprykład, svaich palityčnych praciŭnikaŭ jany nazyvajuć «vorahami dziaržavy». A prezident Rasii śćviardžaje, što kali ŭ RF nie atrymajecca dałučyć da svajoj terytoryi ŭ 17,1 młn km jašče niekalki socień kvadratnych kiłamietraŭ ukrainskaj terytoryi, to «Rasija zahinie».

Nie dumaju, što naša ŭschodniaja susiedka zahinie z-za hetaha, bo niejak ža jana isnavała z 1991 pa 2014 hod biez čužych ziemlaŭ. Inšaja sprava, što sam Pucin moža stracić uładu, što ŭ jaho ŭjaŭleńni, napeŭna, źjaŭlajecca katastrofaj, roŭnavialikaj hibieli ŭsioj Rasii. Strata ŭłady pahražaje nie tolki zvykłamu ładu žyćcia aŭtakrataŭ, ale časta i samomu ich žyćciu. Tamu dziela ŭłady jany hatovyja na ŭsio.

Prajhraŭšy va Ukrainie, Maskva musić šukać inšych achviar dla novaj sproby «maleńkaj pieramožnaj vajny», dla čarhovaj sproby nanieści parazu Zachadu.

Najbolš imavierna, što nastupnym abjektam napadu płanujucca krainy Bałtyi. Ale ŭpeŭnienaści ŭ svaim pośpiechu paśla čatyroch hadoŭ biezvynikovaj i stratnaj vajny z Ukrainaj u rasijskich hienierałaŭ istotna pamienšała. Jany nie raźličvajuć užo na ŭdały blickryh, bo jeŭrapiejskija krainy, chaj marudna, ale rychtujucca da adporu.

A zaciahvańnie kanfliktu, kali na dapamohu krainam Bałtyi pryjduć ich jeŭrapiejskija sajuźniki, viadzie da niepaźbiežnaj parazy Maskvy. I nie tolki z-za roźnicy ŭ ekanamičnym, demahrafičnym i technałahičnym patencyjale, ale i z-za rezkaha źnižeńnia, u paraŭnańni ź minułym, bajavoha patencyjału rasijskich sałdat.

Sprava ŭ tym, što najbolš paśpiachovyja vojny Rasijskaja impieryja viała, vykarystoŭvajučy ŭ jakaści sałdat raboŭ.

Ad pačatku XVIII stahodździa rasijskaje vojska farmiravałasia z pryhonnych sialan, jakich zabirali ŭ jaho spačatku pažyćciova, a potym — na 25 hadoŭ. Daviedzienyja muštroj i žorstkimi pakarańniami da nieŭratyčnaha stanu, jany byli strašnymi praciŭnikami, asabliva ŭ bližnim bai, i žacham dla mirnaha nasielnictva.

Z kanca XIX stahodździa, paśla vyzvaleńnia sialan z rabstva i pierachodu na mabilizacyjny pryncyp farmiravańnia vojska z adnosna volnych ludziej, Rasija stała ciarpieć parazy ŭ vojnach.

Tendencyju spyniŭ Stalin, kali sialanie ŭ kałhasach byli znoŭ pieratvoranyja ŭ pryhonnych. A kali byli ŭviedzienyja zaharadžalnyja atrady NKVD, kali stali karać blizkich sałdata za jaho ŭcioki z pola boju, kali ŚMIERŠ adpraŭlaŭ na rasstreł za lubyja prajavy niezadavolenaści, znoŭ stała mahčymym kidać u łabavyja ataki na niamieckija kulamioty vialikija masy vojskaŭ.

Savieckaja armija stała pieramahać koštam kałasalnych strat. Zaraz u Rasii rabstva nibyta niama, chiba što akramia źniavolenych, zapas jakich nie biaźmiežny.

Demahrafičny patencyjał niekali šmatludnaj i biaspraŭnaj vioski amal vyčarpany. Nabranyja ž za vialikija hrošy z depresiŭnych rehijonaŭ ci mabilizavanyja sałdaty pakorliva i masava pamirać nie chočuć. Kali ž uličyć zaŭsiodnyja ŭ rasijskim vojsku karupcyju i kradziež, to robicca zrazumiełym, što siła rasijskaha vojska va ŭjaŭleńni źniešnich naziralnikaŭ była vidavočna pieraacenienaja.

Tamu, kab pavialičyć šancy na pośpiech u budučym kanflikcie, Maskva razhladaje i varyjant prymianieńnia jadziernaj zbroi z metaj paralizavać volu jeŭrapiejcaŭ i prymusić ich da miru na ŭmovach Kramla, a taksama pieraškodzić vojskam inšych jeŭrapiejskich krain pryjści na dapamohu Bałtyi.

Kab paźbiehnuć u adkaz jadziernaha ŭdaru pa svajoj terytoryi, pa ŭsich prykmietach, Maskva rychtuje prymianieńnie jadziernaj zbroi suprać zachodnich krain z terytoryi Biełarusi, jakaja i pavinna stać abjektam zvarotnaha ŭdaru.

U Biełarusi ŭ rajonie Asipovič užo raźmieščany rakietnyja kompleksy «Iskander», zdolnyja nieści jadziernyja bojehałoŭki.

Zaraz na našaj terytoryi raźmiaščajuć madyfikavanuju mižkantynientalnuju balistyčnuju rakietu «Jars», jakaja paśla pamianšeńnia ŭdvaja jaje dalnaści atrymała nazvu «Arešnik». Ale hałoŭnaje — u rajonie Kryčava budujecca schovišča dla jadziernych bojehałovak, chutčej za ŭsio, dla «Arešnikaŭ», «Iskanderaŭ» i taktyčnych jadziernych avijabombaŭ.

Sprava ŭ tym, što ŭ rasijskaj armii, a raniej — u savieckaj, jadziernyja bojehałoŭki zachoŭvalisia nie pobač ź ich nośbitami, jak u NATA, a ŭ admysłovych schoviščach — vielmi darahich umacavanych zbudavańniach, dzie padtrymlivajucca pastajannyja tempieratura, cisk i vilhotnaść. U pahroźlivy pieryjad ci padčas rehularnych trenirovak bojehałoŭki aŭtakałonami vyvoziacca sa schovišča da nośbitaŭ (srodkaŭ dastaŭki).

Toje, što Maskva buduje taki darahi i składany abjekt u Biełarusi i ŭžo arhanizavała jaho supraćpavietranuju abaronu, śviedčyć, što na našaj ziamli budzie stała raźmieščana vialikaja kolkaść jadziernych bojehałovak. I nie tamu, što ŭ Rasii nie chapaje ziamli dla ich raźmiaščeńnia, a z kankretnymi metami.

Nam treba šukać šlachi, jak praduchilić vykarystańnie našaj ziamli dla ahresii suprać krain Bałtyi i dla naniasieńnia jadziernych udaraŭ. Pryčym praduchilić, paźbiahajučy pramoha ŭzbrojenaha kanfliktu krain NATA z Rasijaj na našaj ziamli.

Usio pryjdziecca vyrašać samim biełarusam.

Ja ŭžo pisaŭ pra svaje prapanovy. Inšaha realnaha šlachu da vyzvaleńnia i zachavańnia našaj krainy, a taksama miru ŭ rehijonie ŭ nas niama.

Hałoŭnaje — svoječasova ŭśviadomić realnaść niebiaśpieki i nie spaźnicca ź nieabchodnymi mierami.

Nadychodzić čas, kali łozunh «Za niejtralnuju biaziadziernuju Biełaruś!» robicca prahramaj nacyjanalnaha vyžyvańnia, zdolnaj abjadnać bolšaść biełarusaŭ, niezaležna ad ich pohladaŭ i miesca žycharstva.

• 27
• 0
• 3
• 2
• 1
• 0
• 0
• 0