«Prasiła pryvieźci niekalki sukienak i vieršy Brodskaha». Muž źniavolenaj Kaciaryny Andrejevaj zhadvaje ich spatkańni
Žurnalistka Kaciaryna Andrejeva letaś atrymała novy termin — 8 hod i 3 miesiacy za nibyta «zdradu dziaržavie». Jaje muž Ihar Iljaš raskazaŭ prajektu «Palitviazynka» pra ich spatkańni i «miortvy horad» Minsk.
Ihar raskazvaje, što ŭ ich z Kaciarynaj było 9 spatkańniaŭ — adno doŭhaje i 8 karotkaterminovych. Apošniaje było ŭ kancy vieraśnia 2022 hoda.
Na doŭhaje spatkańnie žurnalistka paprasiła muža pryvieźci niekalki sukienak, kaśmietyku, pryhožuju bializnu, vieršy Brodskaha i časopisy «Naša historyja».
«My padčas doŭhaha spatkańnia chutka asvoilisia. Ja pryhatavaŭ viačeru, svaju firmovuju stravu — tarcilju z harodninaj i kurycaj. U niejki momant stvaryłasia takaja idyličnaja abstanoŭka, što padumałasia: niachaj by nas navat u hetym malusieńkim pakojčyku pieranieśli kudy-niebudź padalej ad ludziej, ad hetaj ciemry vakoł, i bolš nam ničoha nie budzie treba — tolki b być udvaich», — zhadvaje Ihar.
Doŭhaje spatkańnie było ŭ žniŭni 2021-ha. Iljaš kaža, što Kaciaryna pieršyja paŭhadziny nie mahła pryvyknuć da abdymkaŭ — heta miž voli vyklikała strach. Bo ŭ turmie taktylny kantakt zvyčajna źviazany z pahrozaj.
«Adčuvajecca vielizarnaja maralnaja stomlenaść, vymatanaść», — kaža muž pra stan žurnalistki. Jana sama ličyć, što vielmi źmianiłasia za hety čas.
Ihar pryznajecca, što časam zamykajecca ŭ sabie, bo siabry i blizkija ciapier abo ŭ turmach, abo ŭ emihracyi.
«Žyć siońnia ŭ Minsku — heta chadzić pa miortvym horadzie, dzie ŭ ciabie praktyčna nie zastałosia znajomych. Kali sustrakaješ raptam čałavieka ź minułaha žyćcia, to prychodziš u ščyraje niedaŭmieńnie», — kaža jon.
Pry hetym, zaŭvažaje Iljaš, na vulicy da jaho rehularna padychodziać nieznajomcy, kab pacisnuć ruku i vykazać salidarnaść.
Adras dla listoŭ:
PK № 4. 246035, h. Homiel, vuł. Antoškina, 3,
Kaciaryna Bachvałava.
Kamientary
Naša Niva, soramna za vašuju cenzuru. Praŭda zvyčajnaja. Jana nie dobraja i nie drennaja.
My, jak hramadstva, pryjdziem da razumieńnia impierskaj isnaści rasiejskaj litaratury i roli hetaj litaratury ŭ zamacavańni statusu kvo ŭ Biełarusi.
PS.
Kaciarynie zdaroŭja, ciarpieńnia. Čakajem na voli.