Va Ukrainy da maja mohuć vyčarpacca rakiety SPA, śviedčać źlityja amierykanskija dakumienty
Kali Kijeŭ vykarystaje apošnija zapasy rakiet S-300, heta dazvolić Rasii damahčysia pieravahi ŭ pavietry, paviedamlaje WSJ.
Pavodle mierkavanych dakumientaŭ Pientahona, jakija trapili ŭ sacyjalnyja sietki, Rasija moža dasiahnuć svajoj daŭniaj mety — zdabyćcia kantrolu nad pavietranaj prastoraj Ukrainy — užo ŭ mai, bo va Ukrainy zakančvajucca zienitnyja rakiety.
Pałkoŭnik Juryj Ihnat, pres-sakratar Pavietranych sił Ukrainy, skazaŭ, što nie moža kamientavać dakładnaść infarmacyi na słajdach, jakija trapili ŭ ŚMI, bo takija danyja zasakrečanyja va Ukrainie. Adnak jon paćvierdziŭ, što SPA Ukrainy sutykajucca z deficytam bojekamplektu i što Ukrainie terminova patrebnaja dapamoha ad sajuźnikaŭ.
«Kali my prajhrajem bitvu za nieba, nastupstvy dla Ukrainy buduć vielmi surjoznymi», — skazaŭ Juryj Ihnat. — Ciapier nie čas marudzić».
Pavodle jaho słoŭ, paśla bolš jak hoda vajny Ukraina sutyknułasia z surjoznaj prablemaj pošuku bojeprypasaŭ savieckaj raspracoŭki dla zienitna-rakietnych sistem S-300 i kompleksaŭ «Buk». Hetyja savieckija sistemy składajuć asnovu ŭkrainskaj supraćpavietranaj abarony. Hetyja kompleksy mohuć pierachoplivać celi na vyšyni, bolšaj za 6000 mietraŭ, i mienavita jany nie dajuć Rasii mahčymaści vykarystoŭvać samaloty ŭ hłybini Ukrainy.
SPA Ukrainy taksama nie daje rasijskim samalotam nanosić udary pa ruchomych ukrainskich kałonach, pazicyjach vojskaŭ i inšych vajskovych abjektach u tyle, što kampiensuje vielizarnuju pieravahu Maskvy ŭ kolkaści i jakaści bajavych samalotaŭ.
Adnak, pavodle sakretnaha mierkavanaha słajda Pientahona ad 28 lutaha, Ukraina całkam zraschoduje svoj zapas rakiet «Buk» da 13 krasavika, a rakiet S-300 — da 3 maja pry ciapierašnich tempach vykarystańnia.
Da taho času, pavodle karty ŭ inšaj mierkavanaj prezientacyi Pientahona, taksama ad 28 lutaha, bolšaja častka krytyčna važnaj nacyjanalnaj infrastruktury Ukrainy za miežami Kijeŭskaj vobłaści i dvuch inšych abłaściej na paŭdniovym zachadzie krainy bolš nie budzie mieć prykryćcia SPA. Kolkaść nieabaronienych krytyčna važnych abjektaŭ vyraście z 6 da bolš jak 40.
ZŠA, Narviehija, Kanada i Niamieččyna apošnija miesiacy pieradali Ukrainie dźvie batarei SPA Nasams i adnu batareju SPA Iris-T, pavodle dakumienta, da maja i ŭ hetych sistem pavinny skončycca bojeprypasy.
Płanujecca, što Ukraina atrymaje dadatkovuju batareju Patriot ź Niamieččyny, a Francyja i Italija daduć pa adnoj supastaŭnaj sistemie SAMP-T. Pa słovach pałkoŭnika Ihnata, choć ukrainskija ekipažy ŭžo prajšli navučańnie, ni adna z hetych sistem jašče nie razhornuta.
Choć Patriots i SAMP-T bolš daskanałyja, čym S-300, try batarei, jakija pavinny prybyć va Ukrainu, nie zamianiać šyryni achopu, jakaja zabiaśpiečvajecca 25 dziejnymi siońnia ŭkrainskimi batarejami S-300, havorycca ŭ prezientacyi Pientahona.
Pavodle acenak Jeŭrapiejskaha kamandavańnia Uzbrojenych sił ZŠA, Ukrainie nieabchodna 12 batarej Patriot abo SAMP-T i 16 batarej kłasa Nasams abo Iris-T dla zabieśpiačeńnia adekvatnaha prykryćcia, havorycca ŭ dakumiencie.
U karotkaterminovaj pierśpiektyvie dakumient rekamienduje pasprabavać znajści dadatkovyja bojeprypasy dla S-300 i «Buk» za miažoj, što nie prosta, tamu što bolšaść sajuźnikaŭ Ukrainy, u jakich byli takija sistemy, užo pieradała ich. U doŭhaterminovaj pierśpiektyvie adzinaje prapanavanaje rašeńnie — u pastaŭcy dastatkovaj kolkaści zachodnich sistem SPA, kab pakryć usiu krainu.
Čytajcie jašče:
Z sakretnych amierykanskich dakumientaŭ stała viadoma ličba strat ukrainskaj armii
Ukraina źmianiła vajennyja płany z-za ŭciečki sakretnych dakumientaŭ Pientahona — CMI
Ciapier čytajuć
«Svoj nos ź Biełastoka jany nie vysoŭvajuć». Biełarusy Padlašša skardziacca, što biełarusy novaj chvali emihracyi nie zacikaŭlenyja supolnymi spravami1919
Kamientary