Dziaržtelebačańnie pakazała siužet pra zatrymańnie zasnavalnika niezaležnaha sajta Leanida Haravoha
Na dziaržaŭnym telekanale «Biełaruś 1» 13 krasavika vyjšaŭ siužet «Kak vlivajut sriedstva na raskačku Biełarusi v riehionach i za skolko hotovy prodať Rodinu?» Jon byŭ pryśviečany Leanidu Haravomu — aktyvistu z Haradka, jaki mnoha hadoŭ zapar zajmaŭsia raźvićciom rehijanalnych niezaležnych ŚMI, vydavaŭ biuleteń «Haściniec» i padtrymlivaŭ dziejnaść internet-sajta haradok.info, piša BAŽ.
U siužecie dziaržaŭnaha telebačańnia byli vykarystanyja videazapisy, zroblenyja padčas pieratrusu ŭ Leanida Haravoha, jaki adbyŭsia 15 sakavika: hledačam pakazali bieła-čyrvona-biełyja ściažki i knihi, znojdzienyja siłavikami ŭ žylli aktyvista. A taksama frahmienty apytańnia ŭ pastarunku, dzie spadar Haravy kaža, što metaj jaho dziejnaści było ŭstalavańnie demakratyi ŭ Biełarusi.
Jon nie admaŭlaje toje, što raźvićciu rehijanalnych niezaležnych ŚMI spryjali zamiežnyja sponsary, i aŭtarka siužeta Maryna Ramanoŭskaja nazyvaje heta «prodažam Radzimy».
Žurnalistka BT uvohule na strymlivajecca ŭ vyrazach: Leanida Haravoha jana charaktaryzuje jak «jaraha pradstaŭnika staroj apazicyi», jakaja znachodzicca pad nahladam zamiežnych kurataraŭ», a rehijanalnyja ŚMI demakratyčnaha napramku, pavodle Maryny Ramanoŭskaj, pišuć na «patrebnyja haspadaram temy». I «samyja smažanyja porcyi destruktyvu», na jaje dumku, publikujucca napiaredadni niejkich važnych dziaržaŭnych padziej — jak było z prezidenckimi vybarami 2020 hoda.
U videasiužiecie zhadvajecca pradstaŭnik biełaruskaj supolnaści ŭ Polščy Jarasłaŭ Ivaniuk.
Maryna Ramanoŭskaja padkreślivaje, što jon «etničny palak», ździekliva nazyvaje jaho «panam» i śćviardžaje, što mienavita jon pieradavaŭ hrašovyja srodki Leanidu Haravomu, bieručy spravazdačy pra «kolkaść dystruktyvu». Pry hetym žurnalistka dziaržaŭnaha telebačańnia zaznačaje, što Ivaniuk — heta ŭsiaho tolki «adno sa źvionaŭ łancuhu pa raśpile valuty», i śćviardžaje, što da biełaruskich «idejnych» aktyvistaŭ dachodziać daloka nie ŭsie pryznačanyja srodki.
Taksama Ramanoŭskaja ŭhledzieła ŭ padtrymcy niezaležnaha rehijanalnaha druku «śled polskich śpiecsłužb», jakija imknucca «raskačać Biełaruś».
Videasiužet zakančvajecca pahrozami, što ŭsich, praz kaho robiacca «zamiežnyja ŭlivańni», abaviazkova znojduć biełaruskija siłaviki.
I demanstrujecca «karcinka», jak piensijaniera Leanida Haravoha ciahnuć pad ruki dvoje mažnych milicyjantaŭ.
Paśla pieratrusu i apytańnia ŭ pastarunku spadar Haravy adbyŭ 15 sutak administracyjnaha aryštu: 16 sakavika sud Haradockaha rajona pryznaŭ jaho vinavatym u raspaŭsiudžvańnie ekstremisckich materyjałaŭ pavodle č. 2 art. 19.11 KaAP.
Ciapier čytajuć
Vylecieła ŭ nieviadomym kirunku śpikierka KR Anžalika Mielnikava30
Kamientary