Žonka zakaciła skandał, a jon usio adno pajechaŭ u akopy. Historyja biełarusa, jaki apynuŭsia na vajnie praz daŭhi i strach stracić žyllo
Dźmitryj Višnieŭski mieŭ paśpiachovy biznes, ale sankcyi źmianili situacyju. Mužčyna akazaŭsia ŭ vialikich daŭhach i, šukajučy chutki sposab ich zakryć, padpisaŭ kantrakt z rasijskim vojskam. Što adbyvałasia dalej, jon raskazaŭ u intervju YouTube-kanału Uładzimira Zołkina.
Dźmitryj Višnieŭski naradziŭsia ŭ 1978 hodzie ŭ Biełarusi. Apošnija vosiem hadoŭ jon zajmaŭsia ŭłasnym biznesam u śfiery drevaapracoŭki. Spravy išli dobra: 90% pradukcyi pradavałasia na ekspart u Polšču i Litvu. U 2020 hodzie mužčyna ŭziaŭ u lizinh dva lesavozy, ale paśla ŭviadzieńnia sankcyj rynak zbytu abrynuŭsia, i apłačvać rachunki stała niemahčyma.
«Lizinhavyja kampanii naličyli mnie doŭh — amal $50 tysiač. Nie zmoh jaho vypłacić. Kanfiskavali mašyny i nakłali aryšt na ŭsiu majomaść, jakaja była na firmie», — uzhadvaje Dźmitryj.
Pa jaho słovach, pierastroicca na miascovy rynak nie atrymałasia, i jurysty pačali pahražać adabrańniem navat asabistaha žylla.
«Ja pačaŭ šukać hrošy. Nidzie nie zmoh znajści. Tut mnie padkazali, što možna chutkim sposabam zarabić. Padpisać kantrakt», — raskazvaje hora-biznesmien.
Na sajcie «Siły Rasii» Dźmitryj ubačyŭ numar telefona i źviazaŭsia ŭ telehramie z čałaviekam pa imieni Śviatasłaŭ. Toj paabiacaŭ, što kantrakt dapamoža zakryć usie finansavyja pytańni.
Žonka Dźmitryja była kateharyčna suprać, doma adbyŭsia surjozny skandał, ale mužčyna ŭžo pryniaŭ rašeńnie.
21 studzienia 2024 hoda jon pryjechaŭ u Maskvu. U punkcie pryjomu na vulicy Jabłačkina jamu admovili praz adsutnaść dazvołu na žycharstva, tamu «kuratar» adpraviŭ jaho ŭ Čebaksary (Čuvašyja).
Jak zhadvaje mužčyna, tam miedycynskuju kamisiju prajšli farmalna za paŭhadziny. 4 lutaha Višnieŭski padpisaŭ kantrakt na hod. Jon kaža, što pierad hetym dasłaŭ dakumient žoncy, kab jana razam ź jurystam uvažliva jaho pračytała.
«Ja razumieŭ, što jedu na vajnu, ale mnie skazali, što ja navat nie prachodziŭ terminovuju słužbu, što heta budzie nie na linii sutyknieńnia, što ja budu niedzie daloka ad frontu», — tłumačyć Dźmitryj.
Praz Rastoŭ — na Danieččynu
Paśla padpisańnia kantraktu navabrancaŭ aŭtobusam vyvieźli ŭ Rastoŭskuju vobłaść, a adtul — bližej da miažy Łuhanskaj vobłaści.
Na praciahu miesiaca Dźmitryja i jašče dzieviać čałaviek rychtavali da vykanańnia zadač u składzie motahrupy. Ich vučyli ekstremalnaj jaździe na kvadracykłach, miedycynie, tapahrafii i stralbie. Paśla hetaha jany pavinny byli zajazdžać na pazicyi na kvadracykłach.
11 sakavika ich adpravili ŭ rajon vioski Nietajłava, paśla čaho — u Alaksiejeŭku. Adtul hrupy pa čarzie sprabavali prabicca ŭ Navapaŭłaŭku.
Pieršaja hrupa, pavodle Dźmitryja, pierakuliłasia na kvadracykle i zastałasia čakać u blindažy. Druhaja, jak jon śćviardžaje, była całkam źniščanaja.
Hrupa Dźmitryja z šaści čałaviek vyjechała na dvuch kvadracykłach i nieŭzabavie padarvałasia na supraćpiachotnaj minie, paśla čaho pieššu dabrałasia da tankavaha rova.
Pa słovach mužčyny, da 2 krasavika jany zastavalisia tam ža ŭ blindažy, paśla čaho atrymali zahad zaniać 51‑šy dom u Navapaŭłaŭcy.
Amal miesiac u padvale
2 krasavika hrupa zamacavałasia ŭ domie №51 u Navapaŭłaŭcy. Tam jany prasiadzieli 27 dzion pad pastajannymi atakami dronaŭ.
«Raz u sutki vychodzili na suviaź. Nijakich ukazańniaŭ bolš nie było. Prosta dakładvali, što z nami i jak», — zhadvaje kantraktnik.
Za hety čas dom nieadnarazova atakavali bieśpiłotniki. Padčas adnoj z atak jon atrymaŭ pieršuju kantuziju, potym — druhuju.
«Paśla druhoj kantuzii ja straciŭ zrok chvilin na 15—20. Ja naohuł ničoha nie bačyŭ. Potym jon adnaviŭsia prykładna na 50%, a ŭžo ciaham miesiaca pastupova adnaviŭsia amal całkam», — kaža jon.
Zatym hrupa atrymała zahad pieramiaścicca ŭ dom №50 pa toj ža vulicy, jaki, pavodle jaho słoŭ, znachodziŭsia za čatyry-piać damoŭ ad 51-ha. U hetym domie bajcy prabyli dva tydni.
12 maja, pavodle Dźmitryja, ich pazicyju pačali intensiŭna atakavać bieśpiłotniki. Kali znachodzicca tam stała niemahčyma, hrupa pierabiehła ŭ inšy padvał. Adnak i jon trapiŭ pad udar.
«Nas całkam zasypała. Padvał poŭnaściu skłaŭsia, i nas zasypała ziamloj. Jak vyžyli — nie viedaju», — raskazvaje mužčyna.
Vybracca z-pad zavałaŭ udałosia tolki kala treciaj hadziny dnia. Paśla hetaha jany viarnulisia ŭ dom №51 i vyjšli na suviaź z kamandavańniem.
«Ja paviedamiŭ, što dvoje kantužanyja, a ŭ adnaho pravaja ruka ŭžo nie pracuje. Skazaŭ, što nam treba niešta rabić i adkatvacca nazad. Nam skazali, što mahčymaści adstupić niama. Siadzicie tam. Miedykamienty, usio nieabchodnaje i binty vam pryšluć».
Paranienaha tavaryša, pavodle słoŭ Dźmitryja, jon dahladaŭ sam. Paśla hetaha hrupa jašče čatyry-piać dzion zastavałasia ŭ domie №51. Kali abstreły adnavilisia, jany pierabralisia ŭ budynak №72, dzie zastavalisia da 27 maja, kali dom byŭ razburany ŭ vyniku novaj ataki dronaŭ.
Dva tydni ŭ łaźni
«Kali bambiožka skončyłasia, ja pačuŭ, što niechta stukaje małatkom. Chłopiec byŭ paranieny, jon užo nie moh chadzić — naha była raźbitaja. Ja pajšoŭ tudy, kab paprasić dapamohi», — uzhadvaje Dźmitryj.
Pavodle jaho słoŭ, im pahadzilisia dapamahčy miascovyja žychary. Heta byli pažyłyja muž i žonka — žančynie, pavodle jaho słoŭ, było kala 80 hadoŭ, — a taksama ich 51‑hadovy syn. Jany pahadzilisia schavać vajskoŭcaŭ u łaźni i nikomu nie paviedamlali pra ich. Na praciahu dvuch tydniaŭ haspadary karmili ich try razy na dzień i dapamahali vyžyć.
Dźmitryj kaža, što razmovy z haspadarami byli pieravažna pra vieru.
«Usio ŭ asnoŭnym pra Boha. Jany vielmi vierujučyja pravasłaŭnyja».
Pavodle jaho słoŭ, u domie №72, adkul im udałosia vybracca, zastalisia cieły dvuch ichnich tavaryšaŭ — 25‑hadovaha paranienaha chłopca i 38‑hadovaha mužčyny.
Paźniej haspadynia doma, jakuju jon nazyvaje ciotkaj Vieraj, raskazała, što cieły zahinułych užo «adkapali i raściahvajuć sabaki».
Kaniec historyi akazaŭsia niečakanym. Dźmitryj vyrašyŭ źviazacca sa svaimi pa racyi.
«Skončylisia cyharety, nu i chaciełasia tam harbaty, kavy jakoj-niebudź. Voś heta i paprasiŭ. (…) Dzieści ŭ rajonie 6:00 ranicy lahła pasyłka na darohu. A ŭ rajonie 10:00 pryjšli čatyry ŭkrainskija sałdaty», — raskazvaje Dźmitryj.
Pasyłka tak i zastałasia lažać na darozie, bo zabrać jaje nie dali raźviedvalnyja bieśpiłotniki.
Tak 14 červienia Dźmitryj Višnieŭski trapiŭ u pałon. Pavodle jaho słoŭ, razam ź im u pałon trapili jašče dvoje vajskoŭcaŭ: jaho tavaryš z motahrupy i vajskoviec ź inšaha padraździaleńnia, jaki paźniej dałučyŭsia da ich u Navapaŭłaŭcy. Pavodle Dźmitryja, ź jaho motahrupy, jakaja naličvała dziesiać čałaviek, vyžyli tolki jon i hety tavaryš.
Na momant intervju mužčyna jašče znachodziŭsia ŭ zonie bajavych dziejańniaŭ.
«Budu spadziavacca, što ŭsio ž abmianiajuć. I abmianiajuć nie ŭ Rasiju, a ŭ Biełaruś», — vykazaŭ nadzieju Dźmitryj u razmovie z žonkaj.
«Nu, heta, napeŭna, naŭrad ci», — adkazała žančyna, jakaja hladzić na situacyju bolš realistyčna.
Kamientary
Takich “biełarusaŭ” na NN ceły bastyjon.
Nie opravdyvaju biełorusa, no on vybrał žilje dla rodnych, s ponimanijem otnošuś. Nie znaju kak ja by na jeho miestie postupił v takoj žie situacii - tak žie dieńhi dostał by ili čieriez uhołovno nakazujemyje diejstvija...