Erdahan zajaŭlaje, što tureckaja raźviedka zabiła lidara «Isłamskaj dziaržavy» u Siryi
Prezident Turcyi Redžep Taip Erdahan raskazaŭ, što raźviedvalnyja słužby krainy vysačyli i zabili lidara hrupoŭki «Isłamskaja dziaržava» Abu Chusiejna al-Kurašy, piša VVS.
Pavodle Erdahana, apieracyja pa niejtralizacyi džychadysta adbyłasia ŭ Siryi ŭ subotu, a tureckaja raźviedka sačyła za Kurašy praciahły čas. Nijakich dadatkovych padrabiaznaściaŭ Erdahan nie paviedamiŭ, a niezaležnaha paćviardžeńnia jaho słovaŭ na hety momant niama.
Siryjskija krynicy paviedamili «Rejters», što apieracyja była praviedzienaja kala horada Džandarys na poŭnačy Siryi, niedaloka ad miažy z Turcyjaj.
Ab pryznačeńni Kurašy lidaram ID hrupoŭka paviedamiła ŭ kancy minułaha hoda; jaho papiarednik, jakoha taksama zvali Kurašy, byŭ zabity.
U lutym hetaha hoda amierykanski śpiecnaz vysačyŭ miesca, dzie chavaŭsia papiaredni lidar ID Abu Ibrahim al-Chašymi al-Kurašy. Paśla pierastrełki džychadyst pryvioŭ u dziejańnie vybuchovaje prystasavańnie, u vyniku čaho jon zahinuŭ razam z členami svajoj siamji. Tady prezident ZŠA Džo Bajden zajaviŭ, što padčas hetaj apieracyi była «likvidavanaja surjoznaja terarystyčnaja pahroza ŭsiamu śvietu».
Ciapier u Turcyi ŭ samym razhary pieradvybarnaja kampanija, prezidenckija vybary projduć 14 maja, pryčym, miarkujučy pa apytańniach, u Erdahana jość realny šaniec prajhrać ich.
Terarystyčny «chalifat» ID kaliści zajmaŭ terytoryju ŭ 88 tys. kvadratnych kiłamietraŭ, ad uschodniaha Iraka da zachodniaj Siryi. Pad jarmom terarystaŭ žyło kala vaśmi miljonaŭ čałaviek.
U 2017 i 2018 hadach ID była raźbitaja na poli boju, spačatku ŭ Iraku, a potym u Siryi. Adnak hrupoŭka praciahvaje brać na siabie adkaznaść za napady, takija jak vybuch u šyickaj miačeci ŭ horadzie Kunduz na poŭnačy Afhanistana. U vyniku vybuchu tady zahinuli sama mieniej 50 čałaviek, hety terakt staŭ najbujniejšym z momantu vyvadu amierykanskich vojskaŭ z krainy.
U lipieni minułaha hoda AAN papiaredziła, što hrupoŭka pa-raniejšamu zjaŭlajecca surjoznaj niebiaśpiekaj. Pa niekatorych padlikach, u šerahach ID znachodziacca ad 6 tys. da 10 tys. džychadystaŭ u Siryi i Iraku, jany znachodziacca ŭ asnoŭnym u sielskich rajonach i pieryjadyčna ździajśniajuć dyviersii. Pa danych AAN, najbolš aktyŭna jany dziejničajuć u Afhanistanie, Samali i ŭ basiejnie voziera Čad.
Ciapier čytajuć
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus trapiŭ bieśpiłotnik50
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus trapiŭ bieśpiłotnik
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu1515
Kamientary