Pamiatajecie Dzijanu Šuryhinu, jakaja stała viadomaj na ŭvieś runet paśla zhvałtavańnia? Jana ŭ SIZA
A chłopiec, na jakoha jana napisała zajavu, paśla vyzvaleńnia staŭ pravaabaroncam.
Historyja 16‑hadovaj Dzijany Šuryhinaj z Uljanaŭska prahrymieła na ŭsiu Rasiju ŭ 2017 hodzie. Šyrokuju viadomaść dziaŭčynie pryniesła sieryja vypuskaŭ tok-šou «Pusť hovoriat», pryśviečanych spravie ab zhvałtavańni.
Na toj momant Šuryhina vučyłasia na druhim kursie Uljanaŭskaha prafiesijna-piedahahičnaha kaledža. Pavodle jaje słoŭ, u sakaviku 2016 hoda jana była na dni naradžeńnia ŭ pryvatnym domie, dzie vypiła krychu harełki. Paźniej u efiry prahramy dziaŭčyna śćviardžała, što ałkaholu było tolki «na doncy». Hetaja fraza chutka stała adnym z samych viadomych internet-miemaŭ taho času.
Jak śćviardžała Šuryhina, na viečarynie jana paznajomiłasia sa studentam Uljanaŭskaj sielskahaspadarčaj akademii Siarhiejem Siamionavym. Pavodle jaje viersii, paźniej małady čałaviek zhvałtavaŭ jaje, užyŭšy fizičnuju siłu. Sam Siamionaŭ nastojvaŭ, što intymnyja adnosiny adbyvalisia pa ŭzajemnaj zhodzie.
Spačatku sud prysudziŭ Siamionava da vaśmi hadoŭ pazbaŭleńnia voli ŭ kałonii strohaha režymu. Paźniej prysud abskardzili, i termin pakarańnia skaracili da troch hadoŭ i troch miesiacaŭ u kałonii ahulnaha režymu. Uvosień 2018 hoda jon vyjšaŭ na volu ŭmoŭna-daterminova.
Vypuski «Pusť hovoriat» z udziełam Šuryhinaj u sukupnaści nabrali kala 13 miljonaŭ prahladaŭ. U lutym 2017 hoda jaje proźvišča stała druhim pa papularnaści pošukavym zapytam u «Jandeksie» paśla Pucina. Na staronku dziaŭčyny ŭ instahramie padpisalisia bolš za 1,2 miljona čałaviek.
Historyja vyklikała vialiki rezanans. U sacyjalnych sietkach doŭha spračalisia, ci sapraŭdy mieła miesca złačynstva abo Šuryhina ahavaryła Siamionava.
Paźniej siamja Šuryhinaj pierajechała ŭ Maskvu. Uvosień 2017 hoda jana vyjšła zamuž za apieratara Pieršaha kanała Andreja Šlanina. Niekatory čas dziaŭčyna pracavała barystaj, sprabavała siabie ŭ muzycy i zapisała niekalki piesień. Adnačasova jana pačała vieści błoh, jaki pastupova staŭ dla jaje stabilnaj krynicaj dachodu dziakujučy rekłamie.
Adnak šlub chutka raspaŭsia. U žyćci Šuryhinaj źjaviŭsia novy partnior — miljanier Dzianis Rabroŭ. Ich adnosiny praciahvalisia niekalki hadoŭ. Para šmat padarožničała, a sama Dzijana zrabiła apieracyju pa pavieličeńni hrudziej i aktyŭna raskazvała pra heta padpisčykam. Paźniej jana adkryta pryznała prablemy ź psichičnym zdaroŭjem, a taksama zaležnaść ad ałkaholu i narkotykaŭ.
U 2025 hodzie ŭ jaje źjaviŭsia novy kachany — kryptainviestar Śviatasłaŭ Husieŭ. Para rychtavałasia da viasiella, ale za tydzień da cyrymonii Husieŭ paviedamiŭ, što jaho nie adbudziecca. Niahledziačy na heta, jany praciahnuli stasunki. Sioleta ŭ mai mužčyna abvinavaciŭ byłuju dziaŭčynu ŭ kradziažy rečaŭ, siejfa z hrašyma i kaštoŭnaściami prykładna na 25 tysiač dalaraŭ.
16 červienia rasijskija ŚMI paviedamili, što ŭ kvatery Dzijany Šlaninaj (jana zachavała proźvišča pieršaha muža) prajšoŭ pieratrus. Žančynu abvinavačvajuć u vyrabie parnahrafičnych materyjałaŭ.
Pavodle paviedamleńniaŭ miedyja, jašče ŭ 2021 hodzie jana stvaryła akaŭnt na płatformie OnlyFans, dzie raźmiaščała eratyčny kantent. U apošnija hady Šlanina sumiaščała viadzieńnie łajfstajł-błoha pra padarožžy i sport z zakrytym płatnym telehram-kanałam, u jakim prapanoŭvała padpisčykam pryvatnyja znosiny, a taksama fota i videa dla darosłych.
Kali vinu Šlaninaj dakažuć, joj moža pahražać ad dvuch da šaści hadoŭ pazbaŭleńnia voli. Pakul ža jana znachodzicca ŭ SIZA.
Što da Siarhieja Siamionava, to paśla vyzvaleńnia jon niekatory čas pracavaŭ u taksi i zajmaŭsia prodažam zapčastak dla sielskahaspadarčaj techniki. Paźniej mužčyna skončyŭ univiersitet, vučobu ŭ jakim byŭ vymušany pierapynić z-za kryminalnaj spravy, i ažaniŭsia.
U 2019 hodzie razam sa svaim advakatam jon stvaryŭ pravaabarončy centr, jaki dapamahaje ludziam, što ličać siabie niezakonna asudžanymi. Ciapier na jaho staronku ŭ instahramie padpisanyja bolš za 57 tysiač čałaviek, a ŭ sacyjalnaj sietcy «UKantakcie» — kala 48 tysiač.
Ciapier čytajuć
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks6
Kamientary
[Zredahavana]