Śviatłana Cichanoŭskaja raskazała, što časam płača pa viečarach

Jakoj vy bačycie svaju staraść?

Ja dumaju, što staraść — pierš za ŭsio dla adpačynku. Najlepšy adpačynak — z kachanym čałaviekam. My ź Siarhiejem budziem šmat vandravać i čas ad času zajazdžać u Biełaruś, kab pabačyć svaich unukaŭ, kab pabyć u letniku, jaki Siarhiej sam zbudavaŭ. Čas ad času hulać z unukami. Nie kab na nas ź Siarhiejem ich śpichnuli, a kab heta było ŭ asałodu.

Ci vierycie vy ŭ Boha?

Ja vieru ŭ Boha ŭ sercy. Maja babula kožnuju niadzielu vadziła mianie ŭ carkvu. Takim čynam jana pryvivała luboŭ da Boha. Ale ž Boh — u sercy. I ja vielmi časta ŭnutrana ź im hutaru. Ja dumaju, kab hutaryć z hetaj siłaj, jakuju saboj uvasablaje Boh, nie treba iści ŭ carkvu. Boh nie ŭ niejkim budynku, a ŭ sercy.

Što, na vaš pohlad, hałoŭnaje ŭ čynoŭnikaŭ?

Ja dumaju, kali čałaviek stanovicca čynoŭnikam, jon nie pavinien hublać ludskaść. Jon zaŭždy pavinien pamiatać, što jaho naniali ludzi dla pracy z-za jaho prafiesijanalizmu. I jon pavinien być sumlennym i pamiatać ab tym, što jon robić pierš za ŭsio dla ludziej.

Pavialičyć

Ci jość u vas ciapier čas na sieryjały?

Času niama. Ale ja nie vielmi lublu sieryjały. Ja chaču, kab film pačaŭsia i skončyŭsia, a ja nad im parazvažała ci zabyłasia. Raz ci dva na miesiac ja mahu pahladzieć niejkija novyja filmy.

A ci chapaje času na adpačynak, na dziaciej?

Kali pravieści čas ź dziećmi i heta ličyć adpačynkam, to tak. Ja starajusia kožnyja vychadnyja być razam ź dziećmi. Ja ich vielmi mała baču. I pahulać ź imi ŭ niejkija hulni ci na vulicy ŭ dobraje nadvorje — dla mianie adpačynak.

Pra što vy maryli piać hadoŭ tamu?

Usio majo žyćcio da 2020 hoda było vakoł dziaciej. I piać hadoŭ tamu ja maryła pra toje, kab całkam reabilitavać svajho starejšaha syna. Ja šmat na heta pracavała. Taja mara ździejśniłasia.

Pra što vy marycie ciapier?

Ja maru viarnucca ŭ Biełaruś, kab usie našy siabry, kachanyja byli na svabodzie i my budavali krainu, jakoj my budziem hanarycca.

Kali b možna było viarnucca nazad i zrabić inšy vybar, ci zrabili b niešta pa-inšamu?

Ja čas ad času dumaju: što možna było zrabić inakš? Asabliva, kali ciažka, ty dumaješ, navošta heta treba było, moža, uvohule nie treba było vyłučacca, iści za mužam. Ale ŭžo tady ludziej sadžali ni za što. U tym liku i Siarhieja. Ja dumaju, što ja b da 2020 hoda rabiła b bolš: bolš uklučałasia ŭ niejkuju palityčnuju dziejnaść, bolš dumała pra krainu, a nie tolki pra svaju siamju, bolš čytała, bolš unikała ŭ niejkija spravy.

Byvaje takoje, što nakatvaje i vy płačacie?

Kaniečnie, byvaje. Asabliva pa viečarach z dačkoj. Heta ślozy bolš pa ludziach, kali pačytaješ naviny, jak ich katujuć, jak ludzi pavinny źjazdžać ź Biełarusi, jak žyvuć u strachu. Heta nakatvaje. Takija emocyi balučyja.

Kali vy pačali razmaŭlać pa-biełarusku?

Ja nie pačała razmaŭlać pa-biełarusku. Ja starajusia čas ad času havaryć, kab treniravacca. U mianie ciapier bolš biełaruskamoŭnaha asiarodździa. Ale ja biełaruskuju movu zaŭždy viedała. Ja joj nie karystałasia, ale viedała.

Ci mahčymaja Biełaruś bieź biełaruskaj movy?

Nie.

Jaki z palitykaŭ, ź jakimi vy sustrakalisia, uraziŭ vas bolš za ŭsich astatnich?

Ja mahu skazać šmat dobrych słoŭ amal pra kožnaha palityka, ź jakim ja sustrakałasia. Ale ja dumaju, što Borys Džonsan uraziŭ mianie bolš za ŭsich, bo jon nieardynarny, vielmi nieaficyjny, dobry kamunikatar. Ja vielmi ŭtulna siabie ź im adčuvała. Ja razumieju, čamu ludzi jaho lubiać.

Jakaja kraina vas uraziła bolš za ŭsio z tych, dzie vy byli za apošnija dva hady?

Isłandyja. Heta maleńkaja kraina, u jakoj ludzi adčuvajuć siabie vielmi dobra. Tam niama armii, ale ž jany adčuvajuć siabie ŭ biaśpiecy. Heta vielmi pryhožaja kraina. Ja chacieła b, kab my ź Siarhiejem tudy źjeździli.

Što b vy zabrali ź Jeŭropy ŭ Biełaruś?

Toje razumieńnie, što ludzi ŭ demakratyčnych krainach razumiejuć, što tyja čynoŭniki, ułada — heta naniatyja ludzi, a nie niejkija zvyščałavieki, nie cary. I što kali jany nie zadavolenyja pracaj čynoŭnika, jany mohuć jaho zvolnić. Voś hetaha ciapier niama ŭ Biełarusi. Ja b chacieła, kab u budučym u biełarusaŭ źjaviłasia pačućcio taho, što jany haspadary na svajoj ziamli. A tyja ludzi, jakija kirujuć dziaržavaj, — naniatyja.

Čytajcie jašče:

Cichanoŭskaja: Tolki paśla sychodu režymu Łukašenki my adnovim u Biełarusi viaršenstva prava

«Ja prašu vas, zastavajciesia ludźmi». Śviatłana Cichanoŭskaja vykazałasia ab prysudzie Ramanu Pratasieviču

Śviatłana Cichanoŭskaja zmahajecca za toje, kab być pačutaj — Le Monde

• 55
• 0
• 3
• 5
• 0
• 2
• 9
• 0