Biełarus sabraŭ hryby ŭ Čarnobylskaj zonie i adnios u łabaratoryju. Jakija vyniki?
Biełaruski hrybnik i błohier Alaksandr Harbacevič vyrašyŭ pravieryć, nakolki zabrudžanyja radyjenuklidami hryby ŭ Čarnobylskaj zonie. Dla hetaha jon adpraviŭsia ŭ Naraŭlanski rajon, prykładna za 60 kiłamietraŭ ad Čarnobylskaj AES, a vynikami ekśpierymientu padzialiŭsia ŭ tyktoku, piša Tochka.by.
Harbacevič adznačyŭ, što hryby ŭ hetaj miascovaści amal nie źbirajuć. Za čas «cichaha palavańnia» jon ubačyŭ tolki niekalki zrezanych hryboŭ. Dla pravierki jon sabraŭ čatyry vidy: sasnovyja baraviki, polskija hryby, maślaki i zialonki. Na vyhlad usie jany byli pryhožymi, mocnymi i biez prykmietnych paškodžańniaŭ.
Razhladajučy adzin z baravikoŭ, hrybnik vykazaŭ zdahadku, što za vonkavaj pryhažościu moža chavacca značnaje radyjeaktyŭnaje zabrudžvańnie.
Užo ŭ Minsku sabranyja hryby adpravili ŭ łabaratoryju vieterynarna-sanitarnaj ekśpiertyzy na Kamaroŭskim rynku.
Samymi «čystymi» z čatyroch vidaŭ akazalisia baraviki, ale i ŭ ich uzrovień radyjeaktyŭnaha zabrudžvańnia skłaŭ 1295 Bk/kh pry dapuščalnym pakazčyku 370 Bk/kh. Takim čynam, norma była pieravyšanaja prykładna ŭ 3,5 raza.
U polskich hrybach znajšli 14 628 Bk/kh, a ŭ maślakach — 15 253 Bk/kh. Heta adpaviedna prykładna ŭ 40 i 41 raz bolš za dapuščalny ŭzrovień.
Najbolš zabrudžanymi akazalisia zialonki. U ich zafiksavali 30 438 Bk/kh, što bolš čym u 82 razy pieravyšaje dapuščalnuju normu.
Aŭtar videa taksama raspytaŭ śpiecyjalistaŭ, ci možna zrabić takija hryby biaśpiečniejšymi z dapamohaj vymočvańnia i vareńnia. Pavodle ich tłumačeńnia, norma ŭ 370 Bk/kh ustanoŭlenaja dla śviežych hryboŭ, a paśla vymočvańnia i vareńnia častka radyjenuklidaŭ sapraŭdy moža vydalacca. Adnak z ulikam atrymanych vynikaŭ śpiecyjalisty nie rajać ryzykavać i rekamiendujuć takija hryby nie ŭžyvać u ježu.
Kamientary