U Tajłandzie chočuć źbirać hrošy za prava vyletu z krainy

Hramadskaje abmierkavańnie prapanovy pačałosia 30 vieraśnia i praciahniecca da 29 kastryčnika 2026 hoda. Prajekt padrychtavaŭ Departamient dachodaŭ Tajłanda.

Na pieršym etapie zbor prapanujuć ustanavić u pamiery 1000 bataŭ, što pavodle ciapierašniaha kursu składaje kala 30 dalaraŭ, za kožny vylet z Tajłanda na samalocie. Płacić jaho pavinny buduć usie pasažyry, jakija nie ŭvachodziać u pieralik vyklučeńniaŭ.

Pry hetym zakanadaŭstva dazvolić u budučyni ŭstanavić zbor da 5000 bataŭ, abo prykładna 149 dalaraŭ, za adzin vyjezd, ale pakul havorka idzie tolki pra pačatkovuju staŭku ŭ 1000 bataŭ.

Dla tych, chto pakidaje Tajłand suchaputnym abo marskim transpartam, na pieršym etapie novy zbor uvodzić nie płanujuć.

Asobna płacić u aeraporcie taksama nie spatrebicca. Pavodle prajekta, zbor buduć uklučać niepasredna ŭ košt avijabileta. Jaho pavinny buduć spahaniać avijakampanii abo pradaŭcy kvitkoŭ adnačasova z apłataj pieralotu. Takim čynam, dla bolšaści turystaŭ jon budzie vyhladać jak jašče adna składovaja častka koštu zvarotnaha kvitka.

Praduhledžanyja i vyklučeńni. Ad zboru prapanujuć vyzvalić dziaciej va ŭzroście da dvuch hadoŭ, niekatorych tranzitnych pasažyraŭ, jakija nie pakidajuć śpiecyjalnuju tranzitnuju zonu aeraporta, ekipažy pavietranych sudnaŭ i niekatoryja inšyja katehoryi.

Tajłand zastajecca papularnym napramkam zimovaha adpačynku dla biełarusaŭ, jakija jeduć tudy dziela ciopłaha mora, plažaŭ i mahčymaści pravieści zimu ŭ azijackim klimacie. Kali novy zbor uviaduć, dla siamiejnych padarožžaŭ jon budzie adčuvalnym dadatkovym vydatkam.

Naprykład, siamja z dvuch darosłych i dvuch dziaciej starejšych za dva hady zapłacić dadatkova 4000 bataŭ, abo kala 119 dalaraŭ, za adzin vylet z Tajłanda. Kali padarožničajuć dvoje darosłych i dzicia da dvuch hadoŭ, jakoje vyzvalajecca ad zboru, dadatkovy płaciož składzie 2000 bataŭ, abo kala 60 dalaraŭ.

Pakul turystam ničoha dapłačvać nie treba, bo prajekt znachodzicca tolki na stadyi hramadskaha abmierkavańnia i jašče moža źmianicca. Kali zakon prymuć, jon pavinien ustupić u siłu praz 180 dzion paśla aficyjnaha apublikavańnia. Pry hetym ad zboru prapanujuć vyzvalać pasažyraŭ, jakija nabyli avijakvitki jašče da ŭstupleńnia novych praviłaŭ u siłu, navat kali sam vylet adbudziecca paźniej.

• 1
• 0
• 1
• 2
• 0
• 0
• 1
• 0