Biełarusaŭ, što vyviesili biełaruski i ŭkrainski ściahi na apory ŁEP, buduć sudzić pa čatyroch artykułach Kryminalnaha kodeksa
Za vyviešanyja ŭ kastryčniku minułaha hoda bieła-čyrvona-bieły i ŭkrainski ściahi ŭ Minsku hrupie minčukoŭ vystaŭleny abvinavačańni pavodle niekalkich artykułaŭ Kryminalnaha kodeksa. Padrabiaznaści raspavioŭ Śledčy kamitet.
SK piša, što ŭ lutym minułaha hoda 36-hadovy indyvidualny pradprymalnik vyrašyŭ vyrabić ukrainski i bieła-čyrvona-bieły ściahi, dziela čaho źviarnuŭsia da znajomaj kraŭčychi.
U kastryčniku jon ź siabrami vyrašyŭ vyviesić ściahi na ŭsieahulny ahlad. Zaduma była realizavanaja na vysakavoltnaj apory, raźmieščanaj na skryžavańni vulic Rafijeva i Siemianiaki: dva čałavieki vyviešvali ściahi, a astatnija ŭdzielniki kantralavali abstanoŭku, znachodziačysia ŭnizie.
Užo na nastupny dzień u adnym z telehram-kanałaŭ, pryznanym ekstremisckim, źjaviłasia publikacyja ab praviedzienaj akcyi.
Praź niekalki dzion minčukoŭ zatrymała milicyja. Taksama paviedamlajecca, što toj samy 36-hadovy mužčyna paŭhoda raźmiaščaŭ u internecie kamientary, jakija abražali Łukašenku, a taksama nieadnarazova pieravodziŭ hrošy dla finansavańnia «ekstremisckaj dziejnaści».
U vyniku ŭsim udzielnikam akcyi vystaŭleny abvinavačańni pa niekalkich artykułach Kryminalnaha kodeksa:
č. 2 art. 339 (złosnaje chulihanstva);
art. 361-2 (pieradača hrašovych srodkaŭ dla jaŭnaha zabieśpiačeńnia dziejnaści ekstremisckaha farmiravańnia);
č. 1 art. 368 (publičnaja abraza Łukašenki);
č. 4 art. 361-4 (sadziejničańnie ekstremisckaj dziejnaści, ździejśnienaje hrupaj asob pa papiaredniaj zmovie);
Da piaci ź ich z sankcyi prakurora prymieniena miera strymańnia ŭ vyhladzie źmiaščeńnia pad vartu.
Mahčyma, havorka idzie pra Ihara Ciapciejeva, Juryja Nieściarenku, Viktara Hryńko, Valeryja Bałabiešku, Uładzimira Savieljeva, Ihara Cikača, udakładniaje «Viasna».
Kamientary