«Heta niapravilna, bo adnoj rukoj my robim bolš strohimi sankcyi, a druhoj adkryvajem šluzy, kab Łukašenka moh praciahvać zarablać ćviorduju valutu na eksparcie ŭhnajeńniaŭ. Heta absalutny nonsens», — skazaŭ prezident Litvy.
Prezident Hitanas Naŭsieda zapeŭniŭ, što Litva nie paddasca cisku i nie ŭchvalić sankcyjnych vyklučeńniaŭ Jeŭrapiejskaha sajuza dla tranzitu biełaruskich uhnajeńniaŭ, piša Delfi.lt.
«Źbirajucca akazać cisk i na nas, kab my źmiakčyli prablemy, jakija ŭźnikli na fonie charčovaha kryzisu, dazvoliŭšy ekspart uhnajeńniaŭ ź Biełarusi. Ja ŭsim svaim kaleham skazaŭ, što my nie damovimsia, i sapraŭdy pazicyja Litvy zastałasia raniejšaj, jana nie źmianiłasia i nie źmienicca. My ličym całkam niapravilnym źmiakčać sankcyi suprać dyktataraŭ zamiest taho, kab rabić ich bolš strohimi, asabliva ciapier», — zajaviŭ u piatnicu žurnalistam u Kłajpiedzie kiraŭnik litoŭskaj dziaržavy.
«Heta niapravilna, bo adnoj rukoj my robim bolš strohimi sankcyi, a druhoj adkryvajem šluzy, kab Łukašenka moh praciahvać zarablać ćviorduju valutu na eksparcie ŭhnajeńniaŭ. Heta absalutny nonsens, tamu my nie možam heta ŭchvalić», — zapeŭniŭ jon, padkreśliŭšy, što takuju ž pazicyju zajmajuć usie litoŭskija ŭstanovy i palityki.
Prezident Litvy padkreśliŭ, što hłabalny charčovy kryzis vyklikany nie sankcyjami ES u dačynieńni da biełaruskich uhnajeńniaŭ, a rašeńniem Maskvy vyjści z pahadnieńnia ab eksparcie ŭkrainskaha zbožža.
«Tak jak Rasija čarhovy raz cynična manipuluje, sama vyklikajučy charčovy kryzis, (…) ad jakoha ciapier pakutuje nie tolki Ukraina, ale i dalokija ad Ukrainy biednyja rehijony, jana taksama vykarystoŭvaje hety ryčah jak svojeasablivy instrumient dla šantažu. Heta całkam nieprymalna», — asudziŭ pastanovy Kramla Naŭsieda.
«My praciahniem pierakonvać našych kaleh u tym, što takija pavodziny pavinny karacca i ŭ pieršuju čarhu karacca mižnarodnymi ŭstanovami», — padkreśliŭ lidar Litvy.
Z anałahičnaj zajavaj u čaćvier vystupiła i vice-ministr zamiežnych spraŭ Jovita Nielupšenie. Jana padkreśliła, što nie pavinna być nijakich sastupak Maskvie, jakaja patrabuje źmiakčeńnia zachodnich sankcyj u abmien na viartańnie da pahadnieńnia ab eksparcie ŭkrainskaha zbožža.
Pavodle jaje słoŭ, patrabavańni Rasii ab źniaćci sankcyj z charčovych tavaraŭ i ŭhnajeńniaŭ — heta prapahanda, bo ES nie prymianiaje sankcyj da charčovych tavaraŭ.
Ciapier čytajuć
Stvaralnica sietki kafe Myloverberry raspaviała, jak razam z mužam zahnała paśpiachovy biznes u daŭhi1
Kamientary
Kolki tvaje letuvisy buduć karmić dyktaturu svaimi zakupami pa darmavych vizach?