«My razumiejem, jakaja ciapier składanaja situacyja». Litoŭskaja dypłamatka pra toje, čaho čakaje ad biełarusaŭ
Časovaja pavieranaja Litvy ŭ spravach Biełarusi Asta Andryjaŭskienie ŭziała ŭdzieł u anłajn-marafonie «Nam nie ŭsio adno!». «My pavažajem ludziej, jakija zmahajucca za svabodu svajoj krainy», — adznačyła jana.
Dypłamatka ciapier znachodzicca ŭ Vilni. Biełaruś jana pakinuła ŭ 2021 hodzie razam z kalehami-dypłamatami i bolš nie viartałasia ŭ Minsk.
Na marafonie salidarnaści Asta Andryjaŭskienie kazała, što litoŭskija dypłamaty na mižnarodnych sustrečach pastajanna ŭzdymajuć pytańni pa situacyi ŭ Biełarusi, kab prablemy parušeńnia pravoŭ čałavieka i palitviaźniaŭ zastavalisia aktualnymi.
Asta Andryjaŭskienie adznačyła, što ŭ litoŭcaŭ taksama doŭhaja historyja baraćby za niezaležnaść. U kožnaj siamji jość rodnyja, jakich represavali, abo naahuł zahinułyja ŭ baraćbie za svabodu krainy.
Jaje ŭraziła salidarnaść demakratyčnych sił i niezaležnych miedyja Biełarusi.
«My razumiejem, jakaja ciapier składanaja situacyja ŭ Biełarusi, i pavažajem ludziej, jakija zmahajucca za svabodu. Dla nas honar udzielničać u marafonie i ich padtrymać», — padkreśliła dypłamatka.
Asta Andryjaŭskienie skazała, što samaj vialikaj dapamohaju Litvie z boku biełarusaŭ stała b toje, kab Biełaruś była svabodnaj, jeŭrapiejskaj i pradkazalnaj. Kab možna było praź jaje latać samalotam i nie bajacca, što jaho pasadziać. Što ŭ krainie nie parušajucca pravy čałavieka.
«Kali vy budziecie zmahacca za svaju krainu, to heta budzie nam dapamohaju. Ale vy i tak robicie ŭsio cudoŭna. Prynamsi ja ŭdziačnaja za ŭzajemaparazumieńnie i supracoŭnictva», — padsumavała dypłamatka.
Anłajn-marafon «Nam nie ŭsio adno!» pravodziać biełaruskija niezaležnyja miedyja i pravaabarončyja inicyjatyvy, kab sabrać hrošy dla palitviaźniaŭ i ich siemjaŭ.
Achviaravać hrošy možna pa spasyłcy: salidarnasc.com
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury4
Kamientary