8 žniŭnia pamierła prafiesarka Śviatłana Musijenka. Joj było 83 hady. Pra śmierć žančyny paviedamiła ŭ fejsbuku doktarka Barbara Olech z Univiersiteta ŭ Biełastoku, piša Hrodna Life.
Śviatłana Musijenka z 1967 hoda vykładała ŭ Hrodzienskim univiersitecie imia Janki Kupały (raniej — piedahahičny instytut), a ŭ 1989 stvaryła ŭ im kafiedru polskaj fiłałohii.
«Vydatnaja znaŭca polskaj litaratury i kultury, siabroŭka mnohich pałanistaŭ, arhanizatarka šmatlikich kanfierencyj u Hrodnie. […] Hadami razam z supracoŭnikami svajoj kafiedry jana aktyŭna padtrymlivała Polskuju Dyktoŭku ŭ Biełarusi, jakuju arhanizoŭvała Polska Maciež Školna. Udzielničała ŭ nacyjanalnych čytańniach u hienieralnym konsulstvie Polščy ŭ Hrodnie. […] Prafiesarka Musijenka była biassprečnym navukovym aŭtarytetam, a taksama nadzvyčaj spraviadlivym, zyčlivym i ciopłym čałaviekam», — napisała pra pamierłuju Barbara Olech.
Śviatłana Musijenka naradziłasia 30 žniŭnia 1939 u Danieckaj vobłaści Ukrainy. U 1963 skončyła Biełaruski dziaržaŭny ŭniviersitet pa śpiecyjalnaści «Ruskaja mova i litaratura» i pastupiła ŭ aśpiranturu. Stažyravałasia ŭ Varšaŭskim univiersitecie. Z 1967 pracavała ŭ Hrodnie, u 1971 abaraniła kandydackuju dysiertacyju ŭ AN SSSR.
U 1989 Śviatłana Musijenka vydała pieršuju ŭ SSSR manahrafiju, pryśviečanuju polskaj piśmieńnicy Zofji Nałkoŭskaj, jakaja ŭ 1920-ja hady žyła ŭ Hrodnie. Tady ž Musijenka stvaryła kafiedru polskaj movy i litaratury ŭ HrDU i praviała na joj pieršuju kanfierencyju, pryśviečanuju Nałkoŭskaj. U čas kanfierencyi va ŭniviersitecie adkryŭsia muziej piśmieńnicy, a na domie pa vulicy Akademičnaj, dzie žyła Nałkoŭskaja, adkryli pamiatnuju šyldu.
U 1993 hodzie Śviatłana Musijenka abaraniła ŭ Rasijskaj akademii navuk doktarskuju dysiertacyju i nieŭzabavie stała pieršaj u Biełarusi prafiesarkaj pałanistyki. Apublikavała niekalki sotniaŭ navukovych prac pa polskaj litaratury, udzielničała ŭ mnostvie navukovych kanfierencyj u Biełarusi, Rasii, Ukrainie, Polščy, Šviejcaryi i Słavienii. Pad kiraŭnictvam Musijenka kafiedra vypuściła bolš za 500 śpiecyjalistaŭ pa polskaj movie, litaratury i kultury.
«Cudoŭnaja ŭkrainka, hramadzianka Biełarusi, vydatny navukoviec, siabar Polščy i polskaj kultury», — pisaŭ pra Śviatłanu Musijenka prafiesar Univiersiteta ŭ Biełastoku Jarasłaŭ Łaŭski ŭ 2012 hodzie.
U 2019 hodzie Śviatłanu Musijenka adznačyli premijaj Polonicum. Jaje prysudžaje zamiežnikam Varšaŭski ŭniviersitet za asablivyja zasłuhi ŭ papularyzacyi polskaj movy, historyi i kultury.
Ciapier čytajuć
Radyjoviadučy raskazaŭ pra ŭnutranuju kuchniu ANT — i pra toje, jak pieratvaryŭsia ŭ palitviaźnia3
Kamientary