Były redaktar Nexta Jan Rudzik ažaniŭsia ŭ Kijevie i raskazaŭ, jak pahroza «Arešnikam» padšturchnuła zrabić prapanovu
Były redaktar Nexta i vieteran pałka Kalinoŭskaha Jan Rudzik 6 śniežnia pabraŭsia šlubam. Uračystaść prajšła ŭ Kijevie — horadzie, jaki staŭ dla pary domam, niahledziačy na vajnu. «Naša Niva» daviedałasia ŭ Jana, chto jahonaja abrańnica, pry čym tut savieckaje kino i jak vyhladaje siamiejnaje žyćcio pad huki «šachiedaŭ».
«Atrymaŭsia siužet z savieckaha kino, ale jość niuans»
— My paznajomilisia letaś u Kijevie. Maju žonku kličuć Elvira, jana z Azierbajdžana. Tady jana była studentkaj univiersiteta imia Tarasa Šaŭčenki — vyvučała niamieckuju, ispanskuju i anhlijskuju movy na kafiedry fiłałohii. Pačała vučycca jašče da poŭnamaštabnaj vajny i vyrašyła zastavacca va Ukrainie.
Elvira naradziłasia ŭ Azierbajdžanie, ale pa kryvi jana napałovu tatarka, napałovu ŭkrainka. U jaje siamji dobra viedajuć, što takoje rasijski šavinizm: prodki pa maci ŭciakli ŭ Azierbajdžan praz Haładamor.
Tamu, kali razvažać ideałahična, my majem vielmi blizkija pohlady na hieapalityku. Choć u našych adnosinach palityka vialikaj roli nie hraje.
Ja ž tady tolki viarnuŭsia z vajny: paŭhoda ŭ hrupie dronščykaŭ vykonvaŭ zadačy kala miažy ŭ Charkaŭskaj vobłaści, paśla pieravodziŭsia na tyłavuju pracu.
My žartavali, što ŭ nas atrymaŭsia siužet z savieckaha kino: biełaruski vajskoviec, studentka z Azierbajdžana, Kijeŭ, vajna. Ale, viadoma, jość niuans.
Kachańnie pad pahrozy Pucina
— Spačatku my prosta niekalki razoŭ pahulali pa Rejtarskaj — heta takaja barnaja chipstarskaja vulica ŭ Kijevie. Elvira začaravała mianie svaim stylem i lohkim uschodnim vajbam.
Usio źmianiłasia, kali Pucin upieršyniu anansavaŭ «Arešnik» i pačaŭ im kašmaryć śviet. Pajšli čutki, što jon udaryć pa Kijevie, u horadzie stajaŭ peŭny apakaliptyčny nastroj. Na hetaj chvali ja vyrašyŭ: ciahnuć budzie niedarečna. I napisaŭ Elviry, što jana mnie padabajecca. Tak usio i pačałosia.
Ciapier my vyrašyli aformić adnosiny i stvaryć siamju. Darečy, aproč fiłałohii, u Elviry jość muzyčnaja adukacyja (fartepijana i skrypka), jana cudoŭna vykonvaje kłasiku i lubić niamieckuju litaraturu. Karaciej, nam jość pra što pahavaryć i što parabić razam.
EcoFlow i šachiedy
— My žyviom u Kijevie i pakul płanujem zastavacca tut. Ja praciahvaju pracavać u vajskovaj śfiery. Nie skazaŭ by, što zaraz tut lohka, ale i nie tak kiepska, jak časam pišuć.
U kramach šmat praduktaŭ — asartymient navat bolšy, čym u Polščy. Pracujuć kaviarni, bary, pravodziacca kancerty. Ceny padraśli, ale ŭsio jašče značna mienšyja, čym u Jeŭrasajuzie.
Viadoma, raz na tydzień-dva adbyvajucca bujnyja ataki. Heta stvaraje stres: «šachiedy» vyrazna huduć, hučna pracuje SPA, vybuchi… Pad hety akampaniemient składana zasnuć, i potym ceły dzień chodziš raźbity.
Ale my padrychtavanyja: u kvatery jość zaradnaja stancyja EcoFlow, ad jakoj pracuje roŭtar i lichtaryki. U samim domie — mahutnyja hienieratary, tamu navat lift pracuje padčas błekaŭtaŭ.
Nam tut davoli kamfortna. I hałoŭnaje: tut ciapier centr śvietu, dzie vyrašajecca budučynia rehijona. Majo žyćcio tut daje unikalny dośvied, jaki 100% spatrebicca ŭ dalejšym.
«Naša Niva» — bastyjon biełaruščyny
PADTRYMAĆ
Bližejšym časam buduć vyzvaleny bolš za 150 palitźniavolenych39
Kamientary
Nie otnosiłsia k niemu sieŕjezno, dumał - pustobriech. Prinošu iźvinienija.