U Rasii anansavali start prodažaŭ ułasnych elektryčnych minivenaŭ. Što saboj ujaŭlaje rasijska-kitajski «Ivan»
Vosieńniu 2022 hoda rasijski aŭtamabilny brend Evolute pakazaŭ pieršyja try madeli elektramabilaŭ, jakija płanavali pačać źbirać na mahutnaściach zavoda «Motarinviest» pad Lipieckam. Prajekt zapuściŭsia, ciapier Evolute anansavaŭ chutki pačatak prodažu čaćviortaha aŭto ŭ liniejcy, jakim staŭ elektryčny miniven Evolute i-VAN. «Naša Niva» raźbirałasia, što pradstaŭlaje saboj rasijska-kitajski «Ivan».
Niahledziačy na toje, što marka Evolute pazicyjanujecca jak «rasijskaja», rasijskaha ŭ hetych aŭto niašmat. Pad hetym ułasnym brendam u Rasii prosta źbirajuć kitajskija elektramabili marki Forthing. Miniven, pra jaki idzie havorka ŭ aryhinale, nazyvajecca Forthing Lingzhi M5 EV. Ad rasijskaha Evolute jon adroźnivajecca tolki nazvaj i šyldzikam. U adroźnieńnie ad aryhinalnych Forthing, nazvy ŭsich madelaŭ, što vypuskajucca pad rasijskim brendam Evolute, pačynajucca z łacinskaj litary «I». U vypadku ź minivenam atrymaŭsia davoli dobry markietynhavy chod, bo miniven zaviecca i-VAN, što pa-rusku čytajecca, jak «Ivan».
Cikava, što kali kapnuć hłybiej, to atrymlivajecca, što miniven, jaki pačnuć pradavać u RF pad ułasnym brendam, heta dapracavanaja kopija Mitsubishi Space Gear, jaki vyjšaŭ u śviet u 1994 hodzie. Z tyłu i ŭ profil ahulnyja rysy prahladajucca maksimalna zaŭvažna.
Kitajska-rasijski miniven maje kaštavać kala 4 miljonaŭ rasijskich rubloŭ, što kala 40 tysiač dalaraŭ pa biahučym kursie.
Adznačym, što heta daloka nie pieršy vypadak, kali na terytoryi Rasii naładžvajuć vypusk aŭto kitajskich marak pad svaim ułasnym brendam.
Naprykład, tak było z «Maskvičom». Za hučnymi zajavami pra «adradžeńnie» lehiendarnaha savieckaha brenda stajała toje, što zamiest aŭtamabilaŭ marki Renault u Maskvie naładzili vialikavuzłavuju zborku kitajskich JAC JS4, jakija pačali źbirać pad markaj «Maskvič».
Biełaruś niadaŭna taksama pačała vyrablać aŭtamabili pad ułasnym brendam. Tak, ź niadaŭniaha času Geely Coolray pieraŭtvaryłasia ŭ Belgee X50.
Čytajcie taksama:
Ad elektrakaraŭ da mikraaŭtobusaŭ. Jakija «ajčynnyja» aŭtamabili ŭžo vypuskali ŭ Biełarusi
Jak u časy SSSR. Kab kupić Geely, treba čakać u čarzie
Kamientary