Alaksandr Łukašenka ŭchvaliŭ prodaž AAT «BPS‑Bank» rasijskamu «Śbierbanku».
Pavodle źviestak infarmavanych krynic, ukaz № 618 uchvalaje prodaž u 2009 hodzie «BPS‑Banka» rasijskamu «Śbierbanku» za 280,7 młn. dalaraŭ. U pryvatnaści, «Śbierbanku» budzie pradadziena 835,5 młn. akcyj (93,27% u statutnym fondzie) pa canie 0,336 dalara za akcyju.
U ździełcy pa prodažy dziaržaŭnaj doli ŭ akcyjaniernym kapitale AAT «BPS‑Bank» vyznačalnymi patrebna ličyć umovy zaklučanaha ŭ miežach ździełki inviestycyjnaha dahavora. Takoje mierkavańnie vykazaŭ były staršynia praŭleńnia Nacyjanalnaha banka Stanisłaŭ Bahdankievič.
Va ŭkazie nie ŭdakładniajucca ŭmovy inviestdahavora, adnak raniej paviedamlałasia, što havorka idzie pra adkryćcio «Śbierbankam» kredytnaj linii pad inviestycyjnyja prajekty biełaruskich pradpryjemstvaŭ u pamiery 2 młrd. dalaraŭ.
Pavodle mierkavańnia Bahdankieviča, mienavita płanavanaje vydzialeńnie dadzienych kredytnych resursaŭ źjaviłasia hałoŭnym pry zaklučeńni biełaruskimi ŭładami hetaj ździełki. «2 młrd. dalaraŭ — heta vializnyja resursy. Jany supastaŭlajucca z tym, što ŭžo atrymała Biełaruś ad Rasii, a taksama z kredytnaj padtrymkaj z boku MVF u hetym hodzie. Asabliva taksama naležyć źviarnuć uvahu, pad jaki pracent «Śbierbank» hatovy davać hetyja kredytnyja resursy», — padkreśliŭ były hałoŭny bankir Biełarusi.
Jon taksama adznačyŭ, što biełaruskija ŭłady daŭno vykazvali zacikaŭlenaść u kredytavańni z boku jakoha‑niebudź bujnoha rasijskaha banka rasijskich imparcioraŭ biełaruskaj pradukcyi — hruzavych mašyn, sielhastechniki i inšych tavaraŭ. «Takim čynam, možna adnavić zbyt našaj ciapier małalikvidnaj pradukcyi, jakaja raniej svabodna išła na rasijski rynak», — udakładniŭ Bahdankievič.
Pavodle jaho mierkavańnia, mienavita z ulikam vyšejpieraličanych umoŭ biełaruskija ŭłady zhadzilisia na prodaž akcyj «BPS‑Banka» ŭ ciapierašni kryzisny čas pa canie, jakuju naŭrad ci možna nazvać vysokaj. «Raniej zajaŭlałasia cana ŭ 500 młn. dalaraŭ, i, vidać, jana była najbolš blizkaj da rynačnaha koštu hetaha banka», — padkreśliŭ eks‑kiraŭnik Nacbanka.
«Biełaruskaje kiraŭnictva pa‑raniejšamu słaba refarmuje ekanomiku i navat va ŭmovach kryzisu zaciahvaje hety praces, čaplajučysia za staruju administracyjnuju madel. Kompleksnaja prahrama pieraŭtvareńniaŭ adsutničaje. A hałoŭny vychad z kryzisu ŭłady bačać u adnaŭleńni popytu na biełaruskija tavary na rasijskim rynku, — skazaŭ Bahdankievič.
«Heta pamyłkovaja stratehija, ale jana ŭ biełaruskich uład źjaŭlajecca daminujučaj: pieračakać kryzisny čas šlacham pryciahnieńnia vializnych źniešnich pazyk», — zaklučyŭ były kiraŭnik Nacbanka.
***
«BPS‑Bank» («Biełpromstrojbank»), utvorany ŭ 1923 hodzie, — adzin z najstarejšych i najbujniejšych bankaŭ Respubliki Biełaruś. Dola dziaržavy ŭ kapitale banka — amal 95%. Bank vałodaje statusam ekspartna‑impartnaha i śpiecyjalizujecca na finansavańni bujniejšych biełaruskich pramysłovych pradpryjemstvaŭ. Aktyvy za 2008 hod pavialičylisia na 24,5% i dasiahnuli 4,45 trłn. rubloŭ.
Na pačatak 2009 hoda «BPS‑Bank» zajmaŭ treciaje miesca siarod biełaruskich bankaŭ pa razhalinavanaści filijalnaj sietki i abjomach pryciahnieńnia ŭkładaŭ nasielnictva, čaćviortaje miesca — pa vieličyni aktyvaŭ i pamiery kapitału.
Ciapier čytajuć
«Što vy hadaść amierykanskuju padsoŭvajecie?» Łukašenka zahadaŭ, kab u Mak.by ŭsio było biełaruskaje1
Kamientary