Kitaj akružaje Afryku sietkaj partoŭ

U supiernictvie Kitaja i ZŠA za hłabalny ŭpłyŭ akijany ŭsio vyraźniej stanoviacca klučavoj arenaj. U toj čas jak Donald Tramp akcentuje ŭvahu na «dypłamatyi kananierak», pahražajučy zachapić tankiery Vieniesueły ci ŭziać pad kantrol Panamski kanał, Kitaj užo stvaryŭ mahutnuju łahistyčnuju bazu ŭ Afrycy.

Pavodle źviestak analityčnaha centra, źviazanaha ź Pientahonam, kitajskija dziaržaŭnyja kampanii siońnia vystupajuć budaŭnikami, finansistami abo apieratarami 78 partoŭ u 32 afrykanskich krainach. Analiz spadarožnikavych zdymkaŭ Planet Labs, jakija atrymała redakcyja The Telegraph, demanstruje maštabnuju transfarmacyju ŭźbiarežžaŭ pa ŭsioj Afrycy, jakuju Kitaj zdoleŭ pravieści za apošniaje dziesiacihodździe.

Jak adznačajuć ekśpierty, hetyja hramadzianskija party prajektujucca nie tolki dla handlu, ale i z raźlikam na mahčymaść pryjomu vajskovych karabloŭ. Heta śviedčyć pra imknieńnie Piekina pašyryć svaju vajskovuju prysutnaść daloka za miežy rehijona, adnačasova zamacoŭvajučy kantrol nad klučavymi marskimi šlachami, takimi jak podstupy da Sueckaha kanała.

Kitajskija vajskovyja karabli ŭžo stali zvyčajnymi haściami la afrykanskich bierahoŭ. Naprykład, u minułym miesiacy jany ŭdzielničali ŭ manieŭrach kala Kiejptaŭna ŭ miežach hrupy BRIKS razam z Rasijaj, Iranam i Paŭdniovaj Afrykaj. Pa słovach analitykaŭ, choć u vypadku vajny hetyja party byli b lohkaj mišeńniu, jany istotna pašyrajuć apieratyŭnyja mahčymaści kitajskaha fłotu ŭ Atłantyčnym i Indyjskim akijanach.

Pavialičyć

Kitajskaja stratehija stvareńnia «stratehičnych apornych punktaŭ» ščylna źviazanaja i z ekanamičnymi intaresami. Party zabiaśpiečvajuć dostup da krytyčna važnych resursaŭ — miedzi, kobaltu i inšych minierałaŭ, nieabchodnych dla sučasnych technałohij: ad avijacyjnaj i abaronnaj pramysłovaści da vytvorčaści smartfonaŭ.

Šmatlikija havani złučanyja z radoviščami sietkaj čyhunak i daroh, taksama pabudavanych kitajskimi kampanijami. Heta dazvalaje Piekinu vybudoŭvać ułasnyja łahistyčnyja łancužki i apiaredžvać ZŠA ŭ baraćbie za kantrol nad vysokatechnałahičnymi resursami.

Jak adznačaje vydańnie, Piekin karystajecca statusam pryvabnaha partniora dla afrykanskich krain dziakujučy adnosna nizkim vydatkam, vysokamu prafiesijanalizmu i prahmatyčnamu padychodu da raźvićcia infrastruktury biez vystaŭleńnia palityčnych umoŭ. U vyniku Kitaj nie tolki atrymaŭ istotnuju foru ŭ zmahańni za deficytnuju syravinu, ale i stvaryŭ padmurak dla sietki vajenna-marskich baz na budučyniu, papiaredžvajuć analityki.

Pavialičyć

Afrykanski centr stratehičnych daśledavańniaŭ vyjaviŭ, što kitajskija kampanii zadziejničanyja bolš jak u tracinie kamiercyjnych partoŭ Afryki — heta značna vyšejšy ŭzrovień prysutnaści, čym u Łacinskaj Amierycy abo Azii.

Takaja sukupnaść «družalubnych Kitaju» afrykanskich partoŭ adpaviadaje ambicyjam Piekina stvaryć ustojlivyja da sankcyj łancužki pastavak pa-za dasiažnaściu Zachadu. Hetyja šlachi mahli b bieśpierabojna funkcyjanavać navat u vypadku rezkaha paharšeńnia adnosin, naprykład, z-za Tajvania.

Ekśpierty taksama adznačajuć, što kantrol nad partovaj infrastrukturaj daje apierataram šyrokija mahčymaści ŭpłyvu: ad raźmierkavańnia pryčałaŭ i ŭmoŭ zachodu sudnaŭ da nazirańnia za tavarami i adčuvalnymi hruzami. U takich umovach uźnikajuć pytańni suvierenitetu i biaśpieki, bo źniešni apieratar faktyčna moža vyrašać, kamu i na jakich umovach dazvoleny dostup da klučavych marskich vuzłoŭ kantynienta.

Sam Piekin adkidvaje abvinavačańni ŭ militaryzacyi partovaj sietki i nazyvaje razmovy pra pahrozu biespadstaŭnymi, zajaŭlajučy, što Zachad sprabuje dyskredytavać kitajskaje ekanamičnaje supracoŭnictva. Adnak dla mnohich analitykaŭ vidavočna, što za inviestycyjami ŭ handal i raźvićcio staić doŭhaterminovaja stratehija, jakaja daje Kitaju značnuju pieravahu ŭ spabornictvie z Zachadam za ŭpłyŭ, resursy i kantrol nad hłabalnymi kamunikacyjami.

• 0
• 0
• 0
• 0
• 0
• 0
• 0
• 0