Pašynian: Armienija hatovaja być bližejšaj da ES, nakolki Jeŭrasajuz ličyć heta mahčymym
Taksama premjer-ministr Armienii zajaviŭ, što sajuźniki nie tolki nie dapamahli ŭ situacyi z Nahornym Karabacham, ale i zaklikali da źviaržeńnia ŭłady.
Premjer-ministr Armienii Nikoł Pašynian padčas svajho vystupu na plenarnym pasiadžeńni Jeŭraparłamienta zajaviŭ, što Armienija hatovaja supracoŭničać ź Jeŭrasajuzam i stać bližejšaj da hetaha abjadnańnia, piša news.am.
«Armienija hatovaja być bližejšaj da ES, nakolki Jeŭrasajuz ličyć heta mahčymym», — skazaŭ jon. Pa słovach Pašyniana, pašyreńnie partniorstva — adzin sa słupoŭ refarmatarskaj prahramy ŭmacavańnia demakratyi ŭ Armienii, jakija padtrymlivaje ES.
«Čakajem praciahu supracoŭnictva ŭ napramkach reformaŭ palicyi, vyratavalnych słužbaŭ, niezaležnaj sudovaj sistemy, adukacyi i dziaržaŭnaha kiravańnia», — adznačyŭ jon. Siarod inšych metaŭ prahramy — raźvićcio ŭ śfiery ekanomiki i technałohij, a taksama ŭmacavańnie biaśpieki na Paŭdniovym Kaŭkazie.
Taksama Pašynian zajaviŭ, što sajuźniki nie tolki nie dapamahli ŭ situacyi z Nahornym Karabacham, ale i zaklikali da źviaržeńnia ŭłady.
«U toj čas, kali sotni tysiač armian biehli z Nahornaha Karabacha ŭ Armieniju, našy sajuźniki ŭ śfiery biaśpieki nie tolki nie dapamahli nam, ale i publična zaklikali da źmieny ŭłady ŭ Armienii, da źviaržeńnia demakratyčnaj ułady», — zajaviŭ,
«Ale narod Armienii abjadnaŭsia dziela svajoj niezaležnaści, suvierenitetu, demakratyi, i čarhovaja zmova suprać našaj dziaržavy pravaliłasia. Našy mižnarodnyja partniory pryznajucca, što nie bačyli vypadku, kab za tydzień u krainu prybyło 100 tysiač biežancaŭ i hetaja kraina mahła b pryniać ich usich, nie stvarajučy łahieraŭ dla biežancaŭ. My zmahli zrabić heta dziakujučy armianskamu narodu i demakratyi», — dadaŭ jon.
«Nam nieabchodna vydzielić kala 100 miljonaŭ dalaraŭ na padtrymku vymušanych pierasialencaŭ z Nahornaha Karabacha. Nam patrebna mižnarodnaja dapamoha, u tym liku ŭ vyhladzie biudžetnaj padtrymki», — padkreśliŭ kiraŭnik urada Armienii.
Ciapier čytajuć
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii2828
Kamientary