U roznych krainach prajšli mierapryjemstvy, pryśviečanyja Nočy rasstralanych paetaŭ FOTA
29 kastryčnika, u 86-ju hadavinu rasstrełu ŭ Minsku 132 pradstaŭnikoŭ biełaruskaj intelihiencyi, siarod jakich byli dziasiatki paetaŭ i piśmieńnikaŭ, u mnohich krainach, dzie jość biełaruskija dyjaspary, prajšli tradycyjnyja mierapryjemstvy pad ahulnaj nazvaj «Noč rasstralanych paetaŭ». Sabrali fota– i videamateryjały tolki pra niekatoryja ź ich.
Bielhija
U Biełaruskaj hreka-katalickaj (unijackaj) carkvie ŭ Antvierpienie prajšła paminalnaja malitva za dušy rasstralanych pradstaŭnikoŭ biełaruskaj nacyjanalnaj i tvorčaj intelihiencyi ŭ zaścienkach NKVD u noč z 29 na 30 kastryčnika.
Paśla Boskaj liturhii adbyłasia impreza, pryśviečanaja zabitym piśmieńnikam i paetam, z čytańniem ich tvoraŭ.
Litva
Asnoŭnaje mierapryjemstva prajšło ŭ Vilni. Impreza adbyvałasia ŭ skviery la Muzieja akupacyi. Na scenie vystupali muzyki, litaratary, žurnalisty, dypłamaty, hramadskija dziejačy, hučali vieršy represavanych paetaŭ. Hledačy mahli pahrecca dy pačastavacca haračymi napojami ŭ namiocie nasuprać sceny.
A šostaj viečara pačałosia mierapryjemstva na Ratušnaj płoščy, arhanizavanaje NKA «Dapamoha». Na prystupkach vilenskaj ratušy zapalili 132 śviečki, kab ušanavać pamiać 132 pradstaŭnikoŭ biełaruskaj elity, rasstralanych u noč z 29 na 30 kastryčnika 1937 hoda. La mikrafona vystupali byłyja palitviaźni i ich svajaki, pradstaŭniki «Dapamohi».
Taksama ŭ hety dzień biełarusy sabralisia ŭ Koŭnie.
Polšča
U Varšavie ŭ Muziei Volnaj Biełarusi adbyłasia litaraturna-teatralnaja impreza ad «Kupałaŭcaŭ», na jakoj jany pračytali vieršy rasstralanych paetaŭ, a taksama prajšła lekcyja historyka Alesia Smalenčuka «Biełaruś (nie)rasstralanaja».
Volny chor u hety dzień u varšaŭskim kaściole Śviatoha Alaksandra vykanaŭ pieśni pavodle tvoraŭ zabitych balšavikami Alesia Dudara, Ciški Hartnaha i Michasia Čarota, represavanych Mikoły Kulikoviča, Natalli Arsieńnievaj, Mikoły Ravienskaha, Michasia Kavyla, Dźmitryja Vierasava, Volhi Burnos, Siarhieja Novika-Piejuna i inšych.
Šviejcaryja
Ušanavali pamiać rasstralanych biełaruskich tvorcaŭ siabry biełaruska-šviejcarskaha abjadnańnia RAZAM. Siarod inšych na mierapryjemstvie prysutničali BČB-niaviesta Ina Zajcava i byłaja palitźniavolenaja žurnalistka Volha Kłaskoŭskaja.
Ciapier čytajuć
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary