Buchvostaŭ, Vaźniak i Kalakin pasprabujuć stvaryć novuju partyju na bazie marksizmu
9 śniežnia ŭ Minsku sfarmiravany arhanizacyjny kamitet pa stvareńni ŭ Biełarusi novaj levaj demakratyčnaj partyi.
Partyju, idejnaj asnovaj jakoj budzie marksizm, pasprabujuć stvaryć zamiest likvidavanaj Viarchoŭnym sudom Biełaruskaj partyi levych «Spraviadlivy śviet» (da 2009 hoda — Partyja kamunistaŭ Biełarusi).
«Jak kazaŭ vialiki Hiehiel, historyja maje ŭłaścivaść paŭtaracca. PKB/»Spraviadlivy śviet» my stvarali paśla zabarony ŭ žniŭni 1991 hoda dziejnaści ŭsich kamunistyčnych arhanizacyj u Biełarusi. Novuju marksisckuju partyju budziem stvarać paśla čarhovaj likvidacyi. Kanstytucyja Biełarusi i Zakon «Ab palityčnych partyjach» dazvalajuć nam u ramkach arhanizacyjnaha kamiteta zajmacca pracaj pa pryciahnieńni ludziej u stvaranuju partyju, farmiravańni jaje arhanizacyjnych struktur na miescach. Budziem heta rabić stolki, kolki spatrebicca», — napisaŭ u fejsbuku adzin z kiraŭnikoŭ «Spraviadlivaha śvietu» Siarhiej Vaźniak.
Na pasiedžańni byli abranyja try sustaršyni: sam Vaźniak, Siarhiej Kalakin (šmathadovy kiraŭnik PKB/»Spraviadlivaha śvietu») i Alaksandr Buchvostaŭ (dziejač niezaležnaha prafsajuznaha ruchu).
***
«U Biełarusi nie zastałosia palityčnych partyj, jakija majuć adrozny ad ułady pohlad na stanovišča spraŭ u krainie i prapanujuć hramadstvu alternatyŭnyja varyjanty palityčnaha i sacyjalna-ekanamičnaha raźvićcia dziaržavy.
… My zaklikajem hramadzian levych demakratyčnych pohladaŭ dałučacca da našaj pracy. Biełaruś maje patrebu ŭ masavaj levaj palityčnaj partyi, jakaja bazujecca na kaštoŭnaściach svabody, roŭnaści, sacyjalnaj spraviadlivaści, salidarnaści i narodaŭładździa.
… Novaja partyja budzie imknucca zabiaśpiečyć sumiesnaje vałodańnie pracoŭnymi srodkami vytvorčaści, ich realny ŭdzieł u spraviadlivym raźmierkavańni vynikaŭ pracy», — havorycca ŭ zajavie arhkamiteta partyi.
Na pačatku 2023 hoda ŭ Biełarusi było 15 partyj, paśla pierarehistracyi i stvareńnia praŭładnaj partyi «Biełaja Ruś» u krainie zarehistravanyja čatyry partyi: «Biełaja Ruś» (staršynia Aleh Ramanaŭ), Libieralna-demakratyčnaja partyja (Aleh Hajdukievič), Kamunistyčnaja partyja Biełarusi (Alaksiej Sokał), Respublikanskaja partyja pracy i spraviadlivaści (Alaksandr Chižniak). Usie apazicyjnyja partyi byli likvidavanyja.
Ciapier čytajuć
«Dumajecie, ja hety pašpart doma nie šukała?» Volha Siamaška prakamientavała situacyju z dakumientam prykryćcia svajho muža14
Kamientary
(miarkuju, nie kožny zrazumieje, ale adukacyi žurnalistam NN brakuje vidavočna)