Biełaruski dobraachvotnik Žerar raskazaŭ svaju viersiju spravy, jakuju zaviali na jaho va Ukrainie

Alaksandr Krasoŭski — biełaruski dobraachvotnik, jaki paśla pačatku poŭnamaštabnaj vajny va Ukrainie dałučyŭsia da biełaruskich farmavańniaŭ. Jon słužyŭ u Pałku Kalinoŭskaha, paźniej pierajšoŭ u 225‑y asobny šturmavy połk USU, dzie kamandavaŭ padraździaleńniem «Tur». U 2024 hodzie bajcy hetaha padraździaleńnia ŭdzielničali ŭ bajach padčas ukrainskaj apieracyi ŭ Kurskaj vobłaści. Krasoŭski źjaŭlajecca poŭnym kavaleram ordena «Za mužnaść».

14 sakavika 2026 hoda Žerara zatrymali ŭ Irpieni pa padazreńni ŭ samavolnym pakidańni vajskovaj čaści i niezakonnym abychodžańni sa zbrojaj i bojeprypasami. Sam jon viny nie pryznavaŭ.

31 lipienia jon vyjšaŭ na volu pad zakład. Niadaŭna jon daŭ vialikaje intervju błohieru Siarhieju Biaspałavu, dzie raskazaŭ pra svajo zatrymańnie.

Kamu naležali bojeprypasy

Krasoŭski apisvaje, što 14 sakavika dla jaho zatrymańnia z Charkava pryjechała śpiecpadraździaleńnie Korpusa apieratyŭna-raptoŭnaha dziejańnia (KORD) Nacyjanalnaj palicyi Ukrainy razam sa śledčymi. Padčas vobšuku znajšli 680 tysiač jeŭra i bojeprypasy.

Krasoŭski nastojvaje, što znojdzienyja ŭ padvale bojeprypasy byli nie jahonymi. Jak jon davodzić, jany lažali tam jašče z 2024 hoda i naležali inšamu biełaruskamu dobraachvotniku, jaki niejki čas žyŭ u jaho domie.

Krasoŭski śćviardžaje, što mužčyna pražyŭ u jaho kala troch miesiacaŭ i pakinuŭ u sutareńni nie tolki bojeprypasy, ale i svaje rečy, adzieńnie, kopiju pašparta, kopiju vajennaha bileta i nakładnyja.

Imia hetaha čałavieka Žerar nie nazyvaje. Ale, pavodle jaho, siarod znojdzienaha byŭ pradmiet, pa jakim možna dakładna vyznačyć, u jakoj vajskovaj čaści słužyŭ čałaviek i kamu taki pradmiet moh być vydadzieny.

Ci było samavolnaje pakidańnie čaści?

Druhaja častka spravy źviazanaja z padazreńniem u samavolnym pakidańni vajskovaj čaści. Krasoŭski davodzić, što nijakaha samavolnaha sychodu nie było.

Za try dni da vychadu zahadu ab zvalnieńni Žerara ŭnieśli ŭ śpis vajskoŭcaŭ, jakija samavolna pakinuli čaść.

Krasoŭski kaža, što zvalniaŭsia nie praz svaju vajskovuju čaść, bo tam admaŭlalisia prymać jaho rapart. Tamu jon padaŭ rapart niepasredna kamandavańniu Suchaputnych vojskaŭ.

Da taho momantu, davodzić Žerar, jon užo zdaŭ pasadu, majomaść, zbroju, kasku i broniekamizelku, a na jaho miesca aficyjna pryznačyli časovaha vykanaŭcu abaviazkaŭ kamandzira ŭzvoda.

Paśla hetaha, pavodle Krasoŭskaha, jon aficyjna pajšoŭ u štohadovy adpačynak, pryjechaŭ u Kijeŭ, staŭ tam na ŭlik i praz prablemy sa zdaroŭjem prachodziŭ lačeńnie ŭ Centralnym vajskovym špitali. Žerar kaža, što maje dakumienty, jakija heta paćviardžajuć.

Pavialičyć

Asobny arhumient Žerara — pałažeńnie ab prachodžańni vajskovaj słužby va Uzbrojenych siłach Ukrainy zamiežnikami i asobami biez hramadzianstva, zaćvierdžanaje ŭkazam prezidenta Ukrainy. Krasoŭski spasyłajecca na punkt 111 hetaha dakumienta, jaki rehuluje adklikańnie vajskoŭcaŭ sa štohadovaha adpačynku. Žerar davodzić, što kamandavańnie nie mieła prava pieraryvać jaho adpačynak.

Krasoŭski miarkuje, što historyju z samavolnym pakidańniem čaści sfabrykavali, kab prymusić jaho viarnucca ŭ 225‑y połk, «nu i, mahčyma, sastryhčy hrošaj».

Čamu jaho trymali ŭ SIZA

Žerar namahaje, što jaho ŭtrymańnie ŭ SIZA było niezakonnym. Jak jon tłumačyć, ukrainskaje zakanadaŭstva praduhledžvała ŭtrymańnie pad vartaj jak mieru strymańnia dla vajskoŭcaŭ, jakich padazrajuć u samavolnym pakidańni čaści. Krasoŭski ž śćviardžaje, što na momant zatrymańnia ŭžo čatyry-piać miesiacaŭ jak byŭ zvolnieny sa słužby i mieŭ status cyvilnaj asoby.

Asobna Krasoŭski spyniajecca na sudździ, jakaja razhladała jaho spravu. Pa słovach Žerara, jana nie tolki niezakonna trymała jaho ŭ SIZA, ale i pieravyšała słužbovyja paŭnamoctvy i parušała ŭkrainskaje zakanadaŭstva. Ciapier, pavodle jaho, hetyja abstaviny raźbirajuć. Adpaviednuju zajavu ŭžo padali ŭ Vyšejšuju radu pravasudździa Ukrainy.

Paśla źmieny sudździ situacyja źmianiłasia. Jak raskazvaje Žerar, novaja sudździa vyvučyła materyjały spravy i vyrašyła, što jaho treba vypuskać. U vyniku Krasoŭski vyjšaŭ ź SIZA pad zakład.

Sam jon ličyć, što jaho vyzvaleńnia nie chacieli, bo na voli ŭ jaho źjaviłasia bolš mahčymaściaŭ dziejničać: padavać zajavy i źviartacca ŭ roznyja instancyi. Prakuror abskardziŭ rašeńnie ab vyzvaleńni pad zakład i pasprabavaŭ damahčysia jaho admieny.

Apielacyju prakurora, pavodle Krasoŭskaha, u vyniku nie zadavolili, i jon zastaŭsia na voli.

Zusim adrezanym ad vonkavaha śvietu ŭ SIZA Žerar nie byŭ. Ź jahonych słoŭ, tam była płatnaja IP-telefanija, i jon moh raz na dzień telefanavać na 15 chvilin. Internetu i mabilnaha telefona nie było, zatoje byŭ televizar, pa jakim źniavolenyja hladzieli naviny.

Adkul hrošy

Asobna Biaspałaŭ spytaŭ pra vialikuju sumu hatoŭki, znojdzienuju padčas pieratrusu. U pieršych publikacyjach u ŚMI fihuravała suma kala miljona jeŭra.

Žerar udakładniaje: «Nie miljon, a 680 tysiač». Pa jaho słovach, hrošy davali jaho znajomyja, partniory i biełarusy ź Jeŭropy na raźvićcio vajskovych padraździaleńniaŭ. Jon nazyvaje ich «pramymi danatami».

U razmovie Biaspałaŭ zhadaŭ dopisy Dzianisa «Vaŭkałaka» Urbanoviča, ź jakich vynikała, što Žerar nibyta pradavaŭ vajskoŭcam kulamioty.

Krasoŭski kaža, što nie viedaje, pra jakija kulamioty idzie havorka. Pry hetym jon zhadvaje adzin vypadak, źviazany sa zbrojaj. Pavodle Žerara, bajec z pazyŭnym Jasień adnojčy źviarnuŭsia da jaho nakont 120‑milimietrovaha minamiota.

«Ja skazaŭ, što ŭ mianie takoha niama. Jość hrupy vajskoŭcaŭ, dzie niechta abmieńvajecca trafiejami. Voś ja jamu skinuŭ spasyłku, što ŭ čałavieka jość 120‑milimietrovy minamiot i jon mianiaje jaho na toje i toje. Pra jaki kulamiot kaža Vaŭkałak — ščyra, ja nie viedaju», — raskazvaje Krasoŭski.

Biaspałaŭ zhadaŭ i inšyja abvinavačańni Vaŭkałaka — u tym liku pra nibyta ŭžyvańnie Krasoŭskim zabaronienych rečyvaŭ. Žerar adkazvaje, što čytaŭ hetyja dopisy, ale surjozna da ich nie stavicca.

«Što choča, toje niachaj piša. U čałavieka svaje fantazii. Ja vydatna pamiataju ŭsie jaho zabaŭnyja historyi i pra Bresta, i pra toje, jak jon z Brestam vajavaŭ. Tamu ja zaŭsiody kazaŭ, što hety čałaviek moža być dobrym vajarom i hetak dalej, ale niedzie ŭ hałavie ŭ jaho adbyvajecca źmiešvańnie realnaści z fantazijaj. I, na žal, ludzi, jakija, skažam tak, realna viedajuć Vaŭkałaka, razumiejuć, pra što ja kažu.

U čałavieka sapraŭdy, moža być, praź vialikuju kolkaść kantuzij, ranieńniaŭ — jamu treba prosta prachodzić bolš žorstkuju reabilitacyju, kab papravić svajo zdaroŭje», — kaža Žerar.

Pra rolu byłoha kamandzira

Biaspałaŭ vykazaŭ zdahadku, što prablemy Krasoŭskaha pačalisia paśla kanfliktu z kiraŭnictvam. Žerar z takoj farmuloŭkaj nie pahadziŭsia.

Jon śćviardžaje, što asabistaha kanfliktu nie było. Prosta ŭ peŭny momant praź niejkija dziejańni kiraŭnictva jon vyrašyŭ syści z 225‑ha pałka. Ale adpuskać jaho, pavodle Krasoŭskaha, nie chacieli.

U toj čas kamandziram vajskovaj čaści 7420 byŭ Aleh Šyrajeŭ. Biaspałaŭ spytaŭ Krasoŭskaha, jakimi byli ich adnosiny i ci moh Šyrajeŭ mieć dačynieńnie da spravy, pa jakoj Žerara paźniej zatrymali.

Jak davodzić Žerar, dzie ciapier znachodzicca Šyrajeŭ, jon nie viedaje i za im nie sočyć.

«Što za čałaviek… Skažu tak, što da atrymańnia Hieroja Ukrainy heta byŭ adzin čałaviek, paśla atrymańnia Hieroja Ukrainy heta staŭ inšy čałaviek. Da atrymańnia Hieroja Ukrainy heta byŭ čałaviek, ź jakim možna było razmaŭlać, pracavać i słužyć», — kaža Žerar.

Na pramoje pytańnie, ci źviazany Šyrajeŭ z kryminalnaj spravaj suprać jaho, Krasoŭski adkazvaje śćviardžalna. Pa jaho słovach, ciapier u administracyjnych sudach jon sprabuje damahčysia pryznańnia niezakonnymi zahadaŭ svajho byłoha kamandzira.

Samu kryminalnuju spravu Žerar nazyvaje sfabrykavanaj «ad pačatku da kanca». U jakaści adnaho z arhumientaŭ jon pryvodzić materyjały słužbovaha rasśledavańnia. Pavodle Krasoŭskaha, jano było zarehistravana na 46 arkušach, ale ŭ materyjałach jaho spravy akazaŭsia tolki 21.

Pry hetym Žerar ahavorvajecca, što nie viedaje, ci praciahvajucca ciapier śledčyja dziejańni, i tamu nie choča raskryvać usie padrabiaznaści. Na momant razmovy, śćviardžaje jon, abvinavaŭčaha akta jamu tak i nie ŭručyli. Krasoŭski pa-raniejšamu zastajecca ŭ statusie padazravanaha.

Što ciapier?

Paśla vyzvaleńnia Krasoŭski nie atrymaŭ poŭnaj svabody pieramiaščeńnia. Pa jaho słovach, ciapier jon nie moža pakidać Kijeŭskuju vobłaść, a taksama vyjazdžać z Ukrainy. Apošniaje, kaža jon, i nie ŭvachodziła ŭ jaho płany.

Jon raźličvaje, što paśla 14 vieraśnia zmoža znoŭ svabodna pieramiaščacca pa Ukrainie.

Na pytańnie Biespałava, ci jość ciapier realnaja pahroza paŭtornaha aryštu, adkazvaje koratka: «Nie, niama».

Jašče adna detal, pra jakuju Krasoŭski raskazaŭ u intervju, — ukrainskaje hramadzianstva. Pa słovach Žerara, rašeńnie ŭžo padpisanaje i jon moža atrymać ukrainski pašpart, adnak pakul nie śpiašajecca hetaha rabić.

• 6
• 0
• 0
• 3
• 0
• 0
• 0
• 0