Upieršyniu častka biełaruskich pravasłaŭnych budzie adznačać Kalady 25 śniežnia pa novym styli
Heta tyčycca biełaruskaha pravasłaŭnaha prychoda ŭ Vilni, jaki znachodzicca ŭ jurysdykcyi Kanstancinopalskaha (Suśvietnaha) patryjarchata.
Hety prychod byŭ zasnavany śviatarami Hieorhijem Rojem i Alaksandram Kuchtam, jakija vyjšli ź jurysdykcyi Maskoŭskaha patryjarchata. U krasaviku hetaha hoda prychod pryniaŭ kanstancinopalski patryjarch Varfałamiej u svaju jurysdykcyju.
Absalutnaja bolšaść pravasłaŭnych cerkvaŭ Jeŭropy (Hreckaja, Bałharskaja, Kanstancinopalskaja, Rumynskaja, Kryckaja, Češskaja, Kiprskaja) žyvuć užo amal stahodździe pa novajulijanskim kalendary, jaki zaraz supadaje z hryharyjanskim, pa jakim žyvie ŭvieś chryścijanski śviet i śvieckija krainy.
Tamu ŭpieršyniu biełaruskaja pravasłaŭnaja hramada budzie śviatkavać Kalady (naradžeńnie Chrysta) 25 śniežnia.
Śviatkavańnie pačniecca viačerniaj liturhijaj 24-ha śniežnia a 21-j hadzinie ŭ vilenskaj Refarmackaj carkvie (Pylimo g.18).
Rankam 25-ha śniežnia a 10-j hadzinie śviatočnaja liturhija budzie słužycca ŭ Biełaruskaj carkvie pa vulicy Boksto g.4, što znachodzicca kala karčmy «1863».
«Kamu budzie ciažka naviedać viačerniuju liturhiju, zaprašajem ušanavać Rastvo Chrystova ranicoju!», — paviedamlaje Biełaruski pravasłaŭny prychod u svaim telehram-kanale.
A 25 śniežnia a 11-j hadzinie projdzie dziciačaje kaladnaje nabaženstva ŭ Mikolskaj carkvie na Łukiškach.
***
Varta zaznačyć, što biełaruskaja pavajennaja emihracyja, jakaja nie chacieła być u jurysdykcyi Ruskaj zarubiežnaj pravasłaŭnaj carkvy na Zachadzie, zasnavała prychody Biełaruskaj aŭtakiefalnaj pravasłaŭnaj carkvy i biełaruskija pravasłaŭnyja prychody ŭ jurysdykcyi kanstancinopalskaha patryjarchata (u ZŠA, Brytanii, Kanadzie, Aŭstralii).
Ale ŭsie hetyja prychody žyvuć pavodle julijanskaha kalendara, h.zn. śviatkujuć Kalady 7 studzienia. Tady jak Amierykanskaja pravasłaŭnaja carkva ŭ 1970 hodzie pierajšła na novajulijanski kalandar.
Kamientary
Pierachodźcie na sučasny kalendar!