Za miažu jeździŭ usiaho try razy. Što viadoma pra samaha publičnaha śpikiera KDB

U listapadzie namieśnik načalnika śledčaha ŭpraŭleńnia KDB Kanstancin Byčak anłajn padklučyŭsia da sieminara, jaki prachodziŭ u Biełaruskim moładzievym chabie ŭ Varšavie. Praź miesiac jon paŭtaryŭ «śpiecapieracyju» — dałučyŭsia ŭžo da anłajn-zaniatku «Volnaha biełaruskaha ŭniviersiteta», sprabujučy «napałochać udzielnikaŭ». Sam Byčak pastajanna źjaŭlajecca ŭ dziaržSMI i kamientuje pracu KDB. «Lusterka» pasprabavała znajści fakty pra samaha publičnaha biełaruskaha «čekista».

Pavodle infarmacyi «Biełpoła», Kanstancinu Byčaku 38 hadoŭ. Jon naradziŭsia ŭ Haradku Viciebskaj vobłaści. Jaho baćka — Fiodar Byčak — pracavaŭ načalnikam finadździeła ŭ Haradockim rajvykankamie i ŭvachodziŭ u rajonny saviet deputataŭ u 2014-2018 hadach. Taksama jon niekalki razoŭ byŭ staršynioj miascovych vybarčych kamisij: na parłamienckich vybarach 2016 hoda i na vybarach miascovych deputataŭ u 2018 hodzie.

Kanstancin Byčak žanaty, u jaho dvoje dziaciej: syn i dačka.

Z adkrytaj bazy publičnych asob Biełarusi i Rasii viadoma, što žonka siłavika — Darja Byčak — pracavała ŭ viciebskaj paliklinicy i Minskaj abłasnoj dziciačaj kliničnaj balnicy (vierahodna, na administracyjnych pasadach).

U 2014 hodzie jana ŭładkavałasia śpiecyjalistam pa prodažach u «Biełvitapradukt». Kampanija zajmajecca aptovym prodažam praduktaŭ charčavańnia, napojaŭ, tytuniovych vyrabaŭ. Ź infarmacyi na sajcie kartoteka.by vynikaje, što «Biełvitapradukt» ciapier znachodzicca ŭ pracesie likvidacyi. Ci pracavała tam žonka Byčaka da apošniaha času, nieviadoma.

Pavodle źviestak «Biełpoł», da 2020 hoda Byčak usiaho try razy byvaŭ za miažoj: va Ukrainie ŭ 2012 hodzie, u Rasii (Maskvie) i Hruzii ŭ 2019 hodzie.

U bazach arhanizacyi byłych siłavikoŭ jość źviestki, što ŭ 2012 hodzie Byčaka abakrali ŭ Minsku. Ź jaho mašyny (Kia Shuma) skrali majomaści na 400 tysiač rubloŭ (suma da denaminacyi, u pieraraźliku na ciapierašnija hrošy — heta 40 rubloŭ).

Z baz siłavikoŭ taksama viadoma zvańnie Kanstancina Byčaka ŭ KDB — pałkoŭnik. Apošnija hady dziaržSMI pradstaŭlajuć jaho jak «namieśnika načalnika śledčaha ŭpraŭleńnia KDB». Ale da 2021 hoda jaho pasada hučała inakš — jon byŭ načalnikam upraŭleńnia. Apošni raz tak Byčaka pradstavili ŭ śniežni 2020 hoda, kali jon kamientavaŭ «spravu Aŭtuchoviča». Mahčyma, u pačatku 2021 hoda siłavika ź niejkich pryčyn panizili na pasadzie.

U publičnym poli Kanstancin Byčak źjaviŭsia ŭ pačatku 2020 hoda.

Tady, jašče da prezidenckich vybaraŭ i pratestaŭ, jon raspaviadaŭ na biełaruskim telebačańni padrabiaznaści rezanansnaj spravy ab chabarach u biełaruskaj cukrovaj kampanii.

Paśla zatrymańnia Viktara Babaryki i inšych kiraŭnikoŭ «Biełhazprambanka» letam 2020 hoda Byčak publična ahučyŭ detali «karupcyjnaj schiemy «pamiž bankam i kampanijaj»Pryvatlizinh».

Z tych časoŭ siłavik rehularna vystupaje ŭ jakaści śpikiera KDB pa palityčnych spravach, źviazanych z pratestami ŭ Biełarusi i vajnoj va Ukrainie. Pryčym robić heta ci ledź nie čaściej, čym aficyjny śpikier arhanizacyi — Andrej Jaraš.

• 3
• 0
• 10
• 7
• 5
• 2
• 24
• 0