Paśla vypadku sa stralboj u Litvie zadumalisia pra admovu ad ruskich škoł
Polskich čapać nie buduć.
Paśla incydentu, kali para padletkaŭ, jakija navučajucca ŭ škole ŭ staličnym rajonie Naŭjamieścis (z ruskaj movaj), stralała ŭ svajho adnakłaśnika ź pnieŭmatyčnaj zbroi z-za jaho palityčnych pohladaŭ, ministr adukacyi, navuki i sportu Litvy Hintaŭtas Jakštas zajaviŭ, što takija situacyi vyklikanyja składanaj intehracyjaj hetaj nacyjanalnaj hrupy ŭ Litvie. Tamu palityk šukaje zakonnyja sposaby admovicca ad navučalnych ustanoŭ dla ruskaj nacyjanalnaj mienšaści, piša Delfi.lt.
«My aceńvajem i abmiarkoŭvajem z kamandaj, ci jość mahčymyja šlachi pastupovaha zakryćcia škoł dla ruskaj mienšaści. My aceńvajem pravavuju bazu, ci možna naohuł heta zrabić», — skazaŭ Jakštas.
«Kali škoła zasnavana municypalitetam, to zasnavalnik moža prymać rašeńni. Ale my chacieli b prymać rašeńni i na dziaržaŭnym uzroŭni, kab škoły dla ruskich nacyjanalnych mienšaściaŭ pačali źnikać, bo my razumiejem, što dzieci rastuć padzielenymi i im składaniej intehravacca ŭ Litvie. Mnie zdajecca, usim budzie lepš, kali ŭ budučyni nie budzie škoł dla ruskaj mienšaści», — dadaŭ jon.
Pa słovach ministra, Łatvii i Estonii było lahčej pryniać takoje rašeńnie, pakolki ŭ ich niama vialikich abščyn nacyjanalnych mienšaściaŭ, akramia ruskaj. U vypadku ź Litvoj, pavodle jaho, havorka idzie pra zachavańnie isnych pahadnieńniaŭ z Polščaj i niama nijakich jurydyčnych padstavaŭ dla vydzialeńnia adnoj nacyjanalnaj mienšaści.
«Dyskusii viaducca ŭžo daŭno, i prykład Łatvii i Estonii praściejšy, bo ŭ ich niama škoł dla inšych nacyjanalnych mienšaściaŭ, jak u nas dla palakaŭ. Z Polščaj jość damova i pahadnieńni, tamu, viadoma, nie moža być i havorki pra admovu ad škoł dla polskaj nacyjanalnaj mienšaści i niama nijakich pravavych padstaŭ dla vyłučeńnia adnoj nacyi», — padkreśliŭ ministr.
Napiaredadni Kaladaŭ dvoje padletkaŭ, jakija navučajucca ŭ vilenskaj škole ŭ Naŭjamieścisie, padčas prahułki strelili ź pnieŭmatyčnaj zbroi ŭ svajho siabra. Maci paciarpiełaha, Ira Novik, žurnalistka, jakaja pierajechała ŭ Litvu z Rasii, apisała situacyju ŭ fejsbuku.
Siejm Litvy ŭchvaliŭ papraŭki, jakija dazvolać biełarusam atrymlivać dazvoł na žycharstva na 3 hady
«U pytańni «biełarusy nie roŭna rasijanie» kropka ŭ Litvie nie pastaŭlena». Labiedźka raskazaŭ, pra što havaryli na pasiadžeńni parłamienckaha kamiteta
Daradca prezidenta Litvy vystupiŭ za ŭnifikacyju abmiežavalnych mier dla biełarusaŭ i rasijan
Ciapier čytajuć
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary