Top-4 kandydaty ŭ novyja kiraŭniki Administracyi Łukašenki paśla sychodu Sierhiejenki
Zamiena pasiviełaha kamandzira Pałaty pradstaŭnikoŭ Uładzimira Andrejčanki na Ihara Sierhiejenku adkryvaje darohu ŭ kiraŭniki Administracyi Łukašenki inšym ludziam. Kiraŭnik AP — heta pasada hałoŭnaha kantralora vykanańnia daručeńniaŭ Łukašenki i hałoŭnaha kadravika adnačasova. Naš prahnoz bazujecca na subjektyŭnym adčuvańni aŭtaraŭ i našych surazmoŭcaŭ z uładnych kalidoraŭ.
Maksim Ryžankoŭ, pieršy namieśnik kiraŭnika Administracyi
Maksim Ryžankoŭ užo šmat hod (z 2016) słužyć pieršym namieśnikam u Administracyi, paśpieŭšy pabyć pravaj rukoj i ŭ Kačanavaj, i ŭ Sierhiejenki.
Paśla śmierci Ryžankova-starejšaha, ministra sportu, u 1996-m, Łukašenka ŭ peŭnym sensie zamianiŭ Maksimu baćku. Addadzieny toj jamu biaźmierna.
Ryžankoŭ doŭha pracuje i viedaje ŭvieś «prezidencki narod» u krainie, nikoli siabie nie kampramietavaŭ, užo dastatkova vyras i nabraŭsia dośviedu, kab narešcie samomu ŭznačalić Administracyju.
Luby inšy karjerny ruch budzie dla jaho panižeńniem.
Ryžankovu 51 hod.
Valeryj Vakulčyk, pamočnik pa Bresckaj vobłaści
Łukašenka daviaraje ludziam u pahonach. Jany jaho nie padvodziać. Śpiecsłužbist Sierhiejenka vydatna spraŭlaŭsia sa svajoj rabotaj.
Vakulčyk — vielmi padobny. Jon užo byŭ na adkaznaj kirujučaj pasadzie — staršynioj KDB, — nie pastaviŭšy pad sumnieŭ svaju łajalnaść.
A za apošnija hady spraktykavaŭsia ŭ kadravaj rabocie. Pamočniki Łukašenki adkazvajuć za padbor i rekamiendacyju cyvilnych kadraŭ u vobłaści, padparadkoŭvajučysia kiraŭniku Administracyi.
«Bresckaja vobłaść efiektyŭna pracuje sa svaim kadravym reziervam», — chvaliŭ Vakulčyka jahony były padnačaleny Ihar Sierhiejenka.
Padazronaść, umieńnie bačyć dvajnoje dno — važnyja jakaści dla hałoŭnaha kadravika ŭ časy, kali vorahi i pravakatary abkłali respubliku.
Vakulčyku 59 hod.
Uładzimir Karanik, hrodzienski hubiernatar
Karaniku nie treba lišni raz dakazvać svaju łajalnaść: tysiačami nieabaviazkovych śmierciaŭ ad kavidu jon pakazaŭ, čyjo słova dla jaho hałoŭnaje ŭ žyćci nasupierak usim racyjanalnym i humanistyčnym razvaham.
U śfiery adkaznaści Karanika važnyja dziaržaŭnyja prajekty: AES, mihranckija ataki.
Jon ža spraviŭsia z samaj niepasłuchmianaj vobłaściu ŭ haračyja časy 2020-ha: nie padvioŭ, vyčyściŭ, pazvalniaŭ, abiaskroviŭ, navioŭ sanitaryi i moža iści z vypalenaha pola na pavyšeńnie ŭ Minsk.
Raniej Łukašenka sam chvaliŭ Karanika, nazyvajučy jaho «krepkim kandydatam» u prezidenty.
Karaniku 51 hod.
Mikałaj Snapkoŭ, pieršy vice-premjer
Snapkoŭ — ciorty kadr sistemy.
Snapkoŭ — heta nie śpiecyjalist pa kanalizacyjach, a čałaviek, jaki lepiej za mnohich raźbirajecca ŭ sutnaści i pryčynach rečaŭ. Asabliva ekanamičnych.
Maje aŭtarytet u roznych kołach, moža pierakanać pracavać na sistemu ludziej, jakija naŭrad ci b pasłuchali papiarednich kandydataŭ.
Da taho ž, u Administracyi prezidenta jon užo pracavaŭ na pasadzie namieśnika i viedaje śpiecyfiku raboty, a ŭ Saviecie ministraŭ trochi zasiedzieŭsia.
Dać jamu kadravuju ŭładu vyhladaje mahčymym krokam, adaptavanym da realij, kali ad kiraŭnikoŭ patrabujecca spałučać i łajalnaść, i prafiesijanalizm — a jany, pryznačanyja pa rekamiendacyjach papiarednich kiraŭnikoŭ Administracyi, adzin za adnym zajazdžajuć u SIZA.
Snapkovu 55 hadoŭ.
Ciapier čytajuć
ZŠA pieradali Łukašenku najnoŭšyja amierykanskija leki dla pachudańnia4
Kamientary