U stalicy ŭ 2024 hodzie zjavicca niekalki novych HC. Kali heta adbudziecca, to bujnafarmatnych handlovych centraŭ u Minsku budzie amal sto, a ahulnaja kolkaść płoščaŭ stanie bolšaj za 1 młn 640 tys. kvadratnych mietraŭ. Pa hetym pakazčyku biełaruskaja stalica supastaŭnaja z susiednimi krainami. Office Life razam z analitykam «Kolijerz Internešnł Kansałtynh» Dźmitryjem Sołavych raspaviadaje, što heta za centry i dzie jany zjaviacca.
HZC «Červieński»
Dzie: na skryžavańni vulic Majakoŭskaha i Aranskaj na miescy byłoha Červieńskaha rynku.
Što budzie? Handlovy centr dabudoŭvaje kampanija «Silvier Kapitał». Ź miescam i abjektam źviazanaja lehiendarnaja historyja. Jašče ŭ pačatku XX stahodździ tut źjaviŭsia rynak, a ŭ saviecki čas jon staŭ adnym z najbujniejšych. U 2013 hodzie jaho pieranieśli ŭ mikrarajon Łošyca, a tut iranski zabudoŭščyk chacieŭ uźvieści HZC Didas. U vyniku inviestar admoviŭsia ad prajektu pa ekanamičnych pryčynach, a placoŭku viarnuli horadu. «Silvier Kapitał» zmahaŭsia za jaje na aŭkcyjonie.
HZC «Červieński» raźmieścicca na 43,6 tys. kvadratnych mietraŭ. Tut buduć padziemny i naziemny parkinh na 1 tys. mašynamiescaŭ. Jakarnaj praduktovaj kramaj stanie Green. Taksama płanujucca mahaziny viadomych apierataraŭ bytavoj techniki, sporttavaraŭ, adzieńnia, abutku, tavaraŭ dla dziaciej, fud-kort i dziciačy zabaŭlalny centr.
«Silvier Kapitał» uvachodzić u inviestycyjnuju hrupu «RAPA», jakaja kiruje hipiermarkietami Green. «RAPA» — prajekt biźniesmiena Hienadzia Kirejkova. Jon na 28-m miescy ŭ top-100 paśpiachovych biźniesmienaŭ Biełarusi, składzienym vydańniem «Biełarusy i rynak».
HZC Prizma
Dzie: pobač sa stancyjaj mietro «Partyzanskaja» na Partyzanskim praśpiekcie, 77a.
Što budzie? Abjekt buduje kampanija «Sihmapolus». Zabudoŭščyk viadomy ŭźviedzienym u centry Minska šmatfunkcyjanalnym kompleksam ź biźnies– i handlova-zabaŭlalnym centram «Tytan», biźnies-centrami «Chvala» i «Tałbuchina, 3 A», i inšymi. Taksama hrupa kampanij niadaŭna za $7,8 młn kupiła daŭhabud HZC «Mieha Park».
U HZC Prizma, dzie bolš za 22 tys. kvadratnych mietraŭ handlovych płoščaŭ, buduć supiermarkiet «HIPA», mahazin elektroniki i tavaraŭ dla doma «5 elemient», piakarnia Pate, miedcentr, apteki, zoamahaziny, mahaziny adzieńnia i abutku. Taksama adkryjuć fud-kort, kaviarniu, kinateatr i «Aktyvici park» na 3 tys. kvadratnych mietraŭ. U HZC budzie čatyry ŭzroŭni. U ofisnaj častcy — bolš za 14 tys. kvadratnych mietraŭ. Usia płošča kompleksu — 70 tys. kvadratnych mietraŭ.
HC «Hudvił»
Dzie: na skryžavańni Šaranhoviča i Hareckaha ŭ Sucharava.
Što budzie?U HC buduć mahaziny, fud-kort, parkinh, fitnies-centr, abjekty miedycynskaha pryznačeńnia i ofisy, a taksama dziciačy zabaŭlalny centr. Kankretnyja brendy i jakarnyja abjekty pakul nie nazyvajucca. Ahulnaja płošča — 8,5 tys. kvadratnych mietraŭ, handlovaja — 4,3 tys. kvadratnych mietraŭ.
Zabudoŭščyk abjekta — «Viranes». U svoj čas jon uźvioŭ HC «Mahnit» na praśpiekcie Dziaržynskaha i ŭ mikrarajonie Sucharava.
Adkryćcio čakali ŭ 2023 hodzie, ale hetaha nie adbyłosia.
HZC AVIA MALL
Dzie: praśpiekt Mira, 3, u kvartale Minsk World.
Što budzie? Abjekt uzvodzić zabudoŭščyk Dana Holdings. Płanujecca, što ź viestybiula stancyi mietro «Aeradromnaja» možna budzie ŭvajści ŭ HZC. Kompleks raźmieścicca na miescy ŭźlotnych pałos pieršaha biełaruskaha aeraporta. U Avia Mall buduć kramy, kinateatr, fitnies-centr i vialiki fud-kort. Jakarnym praduktovym hipiermarkietam stanie Green.
HZC zojmie 136 tys. kv.
Jakija jašče HC čakać u Minsku
U pačatku studzienia na aŭkcyjonie kupili niedabudavany HZC «Mieha Park». Kali jaho ŭviaduć u ekspłuatacyju, nie zrazumieła, ale ŭ abjekta vysokaja stupień hatoŭnaści. Taksama na skryžavańni vulic Niamihi i Karła Libkniechta budujuć HZC Sigma. Jaho adkryćcio čakajecca ŭ 2025 hodzie.
U HC Green City na Prytyckaha, 156 pačalisia budaŭničyja raboty pa pavieličeńni handlovych płoščaŭ.
Kamientary