U Kitai ciapier nazirajecca deflacyja pavodle scenaryja Japonii i vysoki ŭzrovień biespracoŭja siarod moładzi, što śviedčyć pra pačatak epochi «zastoju i rasčaravańnia», ličyć amierykanski ekanamist, łaŭreat Nobieleŭskaj premii pa ekanomicy 2008 hoda Poł Kruhman. Jahonyja słovy pryvodzić The New York Times.
Pavodle słoŭ Kruhmana, šerah analitykaŭ čakaŭ, što ŭ Kitai budzie ekanamičny bum paśla admieny karanavirusnych abmiežavańniaŭ, adnak zamiest hetaha kraina adstała praktyčna pa ŭsich pakazčykach, akramia VUP, jaki, papiarednie, vyras na 5,2%.
«Ale z nahody hetaj ličby šyroka raspaŭsiudžany skieptycyzm. Demakratyčnyja krainy, takija jak Złučanyja Štaty, redka palityzujuć svaju ekanamičnuju statystyku — chacia spytajcie mianie pra heta jašče raz, kali da ŭłady vierniecca Donald Tramp, — ale aŭtarytarnyja režymy časta heta robiać», — zajaviŭ Kruhman.
Ekanamist sa spasyłkaj na aficyjnuju statystyku Kitaja śćviardžaje, što ŭ krainie zafiksavanaja deflacyja pavodle scenaryja Japonii 1980-ch hadoŭ i vysoki ŭzrovień biespracoŭja siarod moładzi.
«Heta nie paŭnamaštabny kryzis, prynamsi pakul, ale jość padstavy mierkavać, što Kitaj ustupaje ŭ epochu zastoju i rasčaravańnia», — zajaviŭ nobieleŭski łaŭreat.
Siarod pryčyn situacyi, jakaja skłałasia, Kruhman nazvaŭ padaŭleńnie pryvatnaj inicyjatyvy, «finansavyja represii» (vypłata nizkich pracentaŭ pa aščadžańniach i vydača tannych kredytaŭ pryvilejavanym pazyčalnikam), a taksama słabuju sistemu sacyjalnaj abarony, jakaja zmušaje siemji źbirać hrošy na vypadak mahčymych nadzvyčajnych situacyj.
«Vysokija tempy inviestycyj mohuć być efiektyŭnymi, kali ŭ vas chutki rost pracoŭnaj siły i pradukcyjnaści, jak u Kitai ŭ pačatku 2000-ch. Ale kolkaść pracazdolnaha nasielnictva Kitaja dasiahnuła piku prykładna ŭ 2010 hodzie i z tych časoŭ praciahvaje skaračacca. Choć kraina demanstravała ŭražlivy technałahičny patencyjał u niekatorych halinach, jaje ahulnaja pradukcyjnaść taksama, padobna, stahnuje», — śćviardžaje ekanamist.
Kruhman ličyć, što Kitaju nieabchodna pieraaryjentavać bolšuju častku dachodaŭ na chatnija haspadarki, a taksama ŭmacavać sistemu sacyjalnaj abarony, što dazvolić skaracić inviestycyjnyja vydatki.
Taksama ekanamist vykazaŭ zaniepakojenaść adnosna taho, što Kitaj moža raspačać sprobu padtrymki ekanomiki šlacham naroščvańnia ekspartu, što stanie prablemaj dla prasoŭvańnia Zachadam zialonych technałohij. «I samaje strašnaje: ci nie pasprabuje Kitaj adciahnuć uvahu ad unutranych ciažkaściaŭ, zaniaŭšysia vajennym avanturyzmam?» — zadajecca pytańniem nobieleŭski łaŭreat.
«Tak što davajcie nie budziem złaradničać z nahody ekanamičnaha spadu ŭ Kitai, jaki moža stać prablemaj dla ŭsich», — reziumavaŭ Kruhman.
Čytajcie taksama:
«Sastarełaja technałohija». Kitaj pryznaŭ nieefiektyŭnymi hipierhukavyja «cuda-rakiety» Pucina
Skrynia Pandory. Jak Tajvań moža zładzić apakalipsis u Kitai?
Ciapier čytajuć
Dzieci źlizvali z brudnaj padłohi pralitaje małako. Jakoj pabačyŭ zamiežnik Biełaruś, spustošanuju rasijskimi i šviedskimi vojskami ŭ čas Paŭnočnaj vajny1111
Kamientary