Kiraŭnik prajekta «Kamunikat», jaki abjadnoŭvaje biełaruskuju anłajn-biblijateku i vydaviectva, Jarasłaŭ Ivaniuk raskazaŭ u svaim fejsbuku, jak idzie adnaŭleńnie partała paśla maštabnaj chakierskaj ataki.
«Darahija siabry, dziakuj usim za nieabyjakavaść! My atrymali šmat padtrymki i prapanoŭ, ale taksama i pytańniaŭ, datyčnych chostynha, bekapaŭ i inšych techničnych momantaŭ. Infarmujem: pracy nad adnaŭleńniem sajta Kamunikat.org iduć. Reziervovyja kopii jość, ale praz nabor techničnych akaličnaściej, jakija sabralisia na praciahu 25 hod, praces vyhladaje nie tak chutka, jak chaciełasia b, i adnym klikam adnavić usio niemahčyma. «Kamunikat» atakujuć užo praciahły čas, my adbivalisia paśpiachova, ale ciapierašniaja situacyja pakazała, na što treba źviarnuć uvahu, i zaraz my z kamandaj prapracoŭvajem, jak nie dapuścić padobnych historyj u budučyni», — napisaŭ Jarasłaŭ Ivaniuk.
Sajt Kamunikat.org, dzie raźmiaščajecca najbujniejšaja biełaruskaja anłajn-biblijateka, byŭ atakavany ŭ noč na 7 maja.
«Spačatku byli spadziavańni, što heta nie ataka, a ŭsio adbyvajecca praź pierahružany trafik, ale ŭ vyniku niedzie a 4‑j hadzinie nočy my zrazumieli, što našy sierviery prosta vyčyščanyja. Viadoma, u takich situacyjach nie ŭsio stračana, bo zachoŭvajucca kopii, ale heta ŭsio patrabuje času, kab razabracca. Chacia situacyja moža być i horšaj, bo, jak skazaŭ adzin z pravajdaraŭ, moh być zapuščany virus, jaki nie dazvolić adnavicca. Ale my pracujem nad hetym», — raskazvaŭ učora Jarasłaŭ Ivaniuk.
Pavodle jaho, na siervierach zachoŭvajecca bolš za 70 tysiač roznych biełaruskich publikacyj — knihi, haziety, časopisy, aŭdyjaknihi, videa– i aŭdyjamateryjały pra Biełaruś.
U minułym hodzie «Kamunikatu» spoŭniłasia 25 hod. Spačatku heta była vyklučna anłajn-biblijateka.
Ale z 2020 hoda «Kamunikat» staŭ vydavać knihi, za piać z pałovaj hod vydadziena pad 70 knih, a ŭ kancy krasavika hetaha hoda ŭ Varšavie adkryłasia kniharnia Kamunikat.shop.
Kamientary