Kitaj zamianiŭ «Hazpramu» tolki 11% stračanych jeŭrapiejskich pastavak

«U minułym hodzie abjom pastavak hazu z Rasii ŭ KNR pa hazapravodzie «Siła Sibiry» pavialičyŭsia da 23 młrd kub. m, abo ŭ 1,5 razy, pry hetym rost pastavak u KNR na 7 młrd kub. m tolki častkova kampiensavaŭ ich pamianšeńnie z Rasii pa trubapravodach u Jeŭropu na 38 młrd kub. m, da 30 młrd kub. m u 2023 h.», — adznačaje Centrabank, spasyłajučysia na danyja «Hazproma» i Bruegel.

Paraŭnańnie z 2022 hodam nie vielmi pakazalnaje, bo tady prykładna na paŭhoda pastaŭki trubapravodnaha hazu ŭ Jeŭropu rezka źnizilisia — spačatku z-za raźviazanaj Rasijaj «hazavaj vajny», a zatym z-za padryvu «Paŭnočnaha patoku», jaki prachodziŭ pa dnie Bałtyjskaha mora.

Karektniej paraŭnoŭvać ekspart z davajennym 2021 hodam. Tady «Hazpram» ekspartavaŭ pa-za miežy SND 185 młrd kub. m hazu. Ź ich prykładna 10 młrd — u Kitaj, a asnoŭny abjom nakiroŭvaŭsia ŭ Jeŭropu — 145 młrd kub.m.

Vynikam samarazburalnaj hazavaj vajny stała źnižeńnie pastavak u Jeŭropu na 115 młrd kub. m, ź jakich Kitaj zamiaściŭ usiaho 13 młrd. Zrešty, hetyja pastaŭki i tak by vyraśli razam z płanavym pavieličeńniem mahutnaści «Siły Sibiry».

Ale Miler nie sumuje. «Abjom trubapravodnych pastavak hazu ŭ Kitaj u samy najbližejšy čas moža vyjści na ŭzrovień, jaki ŭ nas byŭ na ekspart u Zachodniuju Jeŭropu», — zapeŭnivaŭ jon vosieńniu.

U 2024 hodzie pa «Sile Sibiry» płanujecca prapampavać 30 młrd kub. m hazu, ale hałoŭnaja nadzieja kancerna — na budaŭnictva «Siły Sibiry — 2» mahutnaściu 50 młrd kub m u hod. Jano, praŭda, nie tolki jašče nie pačałosia, ale i niezrazumieła, ci pačniecca. Kantrakt pakul nie padpisany, i navat kali heta adbudziecca, budaŭnictva zojmie niekalki hadoŭ, i niezrazumieła, jak pastaŭki pa im zmohuć pačacca «ŭ najbližejšy čas».

Pastaŭki ŭ Jeŭropu, vierahodna, praciahnuć skaračacca. Sioleta skončycca dziejańnie kantraktu na tranzit rasijskaha hazu praz Ukrainu, i naŭrad ci jon budzie padoŭžany. ES užo zaklikaŭ Aŭstryju i inšyja krainy, jakija praciahvajuć zakuplać značnuju častku hazu ŭ «Hazprama», šukać zamienu rasijskamu hazu.

Adnavić stračanyja abjomy ekspartu ŭ najbližejšyja 10 hadoŭ budzie nierealna, havaryŭ hałoŭny ekanamist dziaržaŭnaj karparacyi raźvićcia Rasii «VEB.RF» Andrej Klapač: «Navat z ulikam najaŭnych i płanavanych kantraktaŭ z Kitajem, my straty amal 100 młrd kubamietraŭ kampiensavać nie zmožam».

Čytajcie taksama:

Jeŭropa ŭ 2023 hodzie skaraciła impart rasijskaha trubapravodnaha hazu bolš čym na 55%

Hiermanija całkam zamianiła rasijski haz na narviežski

U najbujniejšych naftahazavych kampanij Rasii amal udvaja abvaliłasia vyručka — Centrabank

• 3
• 0
• 9
• 0
• 0
• 0
• 1
• 0