Adnak havorka nie idzie pra zbroju, jakaja moža być vykarystana dla napadu na ludziej abo abjekty na Ziamli.
Bieły dom u čaćvier paćvierdziŭ, što pahroza nacyjanalnaj biaśpiecy, pra jakuju napiaredadni kazali amierykanskija zakanadaŭcy, źviazanaja z raspracoŭkaj Rasijaj zbroi suprać spadarožnikaŭ u kosmasie. Prezident ZŠA Džo Bajden užo rasparadziŭsia naładzić kantakt z Maskvoj z hetaj nahody, piša Bi-bi-si.
«Heta źviazana z supraćspadarožnikavym patencyjałam, jaki raspracoŭvaje Rasija. Pa-pieršaje, heta nie aktyŭny patencyjał, jaki ŭžo razhornuty. I choć imknieńnie Rasii da stvareńnia hetaha kankretnaha patencyjału vyklikaje niespakoj, niepasrednaj pahrozy čyjoj-niebudź biaśpieki niama», — skazaŭ na bryfinhu kaardynatar stratehičnych kamunikacyj u Radzie nacyjanalnaj biaśpieki Biełaha doma Džon Kirbi.
Havorka nie idzie pra zbroju, jakaja moža być vykarystana dla napadu na ludziej abo abjekty na Ziamli, adnak u Vašynhtonie ŭvažliva sočać za dziejnaściu Rasii i staviacca da jaje vielmi surjozna.
Razhortvańnie zbroi ŭ kosmasie jon nazvaŭ parušeńniem mižnarodnaha prava i damovy, jakuju padpisali bolš za 130 krain, u tym liku Rasija.
«[Prezident ZŠA Džo Bajden] rasparadziŭsia raspačać šerah pieršapačatkovych dziejańniaŭ, uklučajučy dadatkovyja bryfinhi dla lidaraŭ Kanhresa, pramoje dypłamatyčnaje ŭzajemadziejańnie z Rasijaj, z našymi sajuźnikami i partniorami, a taksama ź inšymi krainami va ŭsim śviecie, intaresy jakich pastaŭlenyja na kartu», — dadaŭ Kirbi.
Jon taksama dadaŭ, što Bieły dom nie davaŭ zialonaje śviatło na abnarodavańnie raźvieddanych pra pahrozu z boku Rasii.
«U raźviedvalnaj supolnaści jość surjoznyja aściarohi z nahody šyrokaha rassakrečvańnia hetych raźvieddanych. Jany taksama ličać, što značna bolš efiektyŭnym padychodam było b pačać z pryvatnaha ŭzajemadziejańnia, a nie ź nieadkładnaha apublikavańnia raźvieddanych», — skazaŭ Kirbi.
U sieradu staršynia Kamiteta raźviedki Pałaty pradstaŭnikoŭ Kanhresu, respublikaniec Majk Ternier zajaviŭ, što kamitet padaŭ čalcam Kanhresu infarmacyju ab niejkaj «surjoznaj pahrozie nacyjanalnaj biaśpiecy» ZŠA. Krynicy amierykanskich ŚMI adrazu ž paviedamili, što pahroza źviazanaja z Rasijaj i patencyjnym raźmiaščeńniem jadziernaj zbroi ŭ kosmasie.
«Ja prašu prezidenta Bajdena rassakrecić usiu infarmacyju, jakaja tyčycca hetaj pahrozy, kab Kanhres, administracyja i našy sajuźniki mahli adkryta abmierkavać dziejańni, nieabchodnyja dla adkazu na hetuju pahrozu», — skazaŭ Ternier.
Pry hetym pramoj i niepasrednaj pahrozy dla ZŠA — i ich sajuźnikaŭ — pa słovach aficyjnych asob, pakul niama. Jak paviedamlaje New York Times sa spasyłkaj na čynoŭnikaŭ, havorka idzie pakul tolki ab patencyjnych płanach Rasii i hety prajekt jašče znachodzicca ŭ stadyi raspracoŭki.
Niekatoryja amierykanskija vydańni, spasyłajučysia na mierkavańnie ananimnych aficyjnych asob, vykazali zdahadku, što Ternier, prychilnik akazańnia terminovaj dapamohi Ukrainie, padniaŭ šum u tym liku dla taho, kab padšturchnuć Pałatu pradstaŭnikoŭ da pryniaćcia zakona ab šmatmiljardnych asihnavańniach na hetuju dapamohu.
Daradca prezidenta ZŠA Džo Bajdena pa nacyjanalnaj biaśpiecy Džejk Salivan admoviŭsia kamientavać sutnaść pahroz, ale paviedamiŭ, što jaho ździviła rašeńnie Terniera vystupić z zajavaj, pakolki jon płanavaŭ sustrecca ź lidarami Kanhresa ŭ čaćvier.
Pradstaŭnik Kramla Dźmitryj Piaskoŭ zajaviŭ, što nie moža prakamientavać publikacyi ab rasijskaj zbroi ŭ kosmasie.
«Ja nijak nie mahu heta prakamientavać. [ … ] Ale, vidavočna, što Bieły dom sprabuje praŭdami abo niapraŭdami padšturchnuć Kanhres na hałasavańnie pa zakonaprajekcie ab vydzialeńni hrošaj [Ukrainie], heta vidavočna. Na jakija chitryki budzie Bieły dom puskacca-pahladzim», — skazaŭ Piaskoŭ žurnalistam.
Ciapier čytajuć
Zialenski ŭ Vilni: Pakul špic Łukašenki maje bolš pravoŭ, čym narod Biełarusi11
Kamientary