Minsk jašče plaśnie vajskovym kozyram

U naftavym kanflikcie, badaj, nabližajecca toj momant, kali Biełaruś stanie plaskać pa stale vajskova-palityčnymi kozyrami. Kali prablemu nie razrulujuć niejkim cudam za ličanyja dni, Maskva maje ŭsie šancy znoŭ pačuć z vusnaŭ tutejšaha vysokaha načalstva, što za ščyt ad NATO treba, chalera jasnaja, płacić.

Apošni raz taki prazrysty namiok previentyŭna prahučaŭ na pieradnavahodniaj pres-kanfierencyi Łukašenki. «I ja časta paprakaju rasijskich kiraŭnikoŭ: što vy tam našaj apazicyi dajacie fakty, što paŭtara miljarda datacyj štohod dy inšaje, — skazaŭ tady jon. — Dyk my ž tracili hrošy na supraćpavietranuju abaronu dy vajenna-pavietranyja siły — składnik ahulnaj abarony. Siońnia ja nie stamlajusia havaryć, što heta vialikaja pasłuha Rasii, za jakuju treba płacić».

Pryčym tut zhodny byli brać naturaj — tannymi enierhanośbitami. Ciapier ža, z punktu hledžańnia Minska, partnior «kinuŭ». Zavabiŭ u Mytny źviaz — i padstupna vyvieŭ enierhanośbity za dužki.

I kali padaražeńnie hazu na paru dziasiatkaŭ dołaraŭ biełaruski bok siak-tak prahłynuŭ, to paŭnavažkaje myta na čornaje zołata — jak mamantava kostka ŭ horle. Poŭny abzac tutejšamu naftavamu afšoru. Tut užo jakraz varta padciahvać ciažkuju artyleryju.

Dyk voś:

dzivosny paradoks biełaruska-rasijskich kanfliktaŭ u tym, što heta vam nijakaja nie vajna cyvilizacyj, jašče bolš — mižsobku bjucca, kažučy vysokim štylem, braty pa zbroi.

Navat «vorahi intehracyi» nie asprečvajuć: mienavita ŭ vajskovych pytańniach jana zajšła najdalej. Choć i tut daloka nie ŭsio jak na plac-paradzie. Łukašenka ŭvieś čas kryŭdzicca, što rasijcy, fihuralna kažučy, prymušajuć płacić za aŭtamat, jakim biełarus musić ich ža abaraniać. U svoj čas złupili hrošy navat za napałovu razabranyja S-300, jakija «valalisia pad płotam». A ŭžo naviejšyja cacki — S-400, «Iskandery» — i zusim nie vyprasiš!

Ale kryŭdy kryŭdami, a fakt toje, što ŭ płanie vajskova-stratehičnym Minsk i Maskva skavany taŭščeznym łancuhom. Rasijskija hienierały nie ŭjaŭlajuć, jak žyć bieź biełaruskaha ščyta. A biełaruski pravadyr choć i kazyraje pa-pijaraŭsku mahutnaściu svajho vojska, ale kanceptualna, viadoma ž, bolej spadziajecca na rasijski jadzierny parason.

Dla maskoŭskich palitołahaŭ stała ahulnym miescam kazać: voś pačakajcie, prakładzie Rasija truby ŭ abchod — tady ŭžo Łukašenka nadta nie pavystupaje. Tak,

«Paŭnočnaja płyń» i BTS-2 asłabiać važnaść enierhatranzitu cieraź Biełaruś. Ale jak vajskova-stratehičny płacdarm jana dla rasijskich elitaŭ pakul što niezamiennaja.

I sprava nie tolki ŭ łabiźmie hienierałaŭ, jakija, viadoma ž, zaŭsiody rychtujucca da minułaj vajny. Tut biary vyšej.

«U Rasii niama novaj nacyjanalnaj idei, — razvažaje minski vajskovy analityk Alaksandr Alesin. — Dla zhurtavańnia nacyi vykarystoŭvajecca stary arsienał. Pa sutnaści, jadrom, jak i raniej, źjaŭlajecca ideja supraćstajańnia vierałomnamu Zachadu».

Zhadajma: niadaŭnija manieŭry bratoŭ pa zbroi, na jakija ŭ Biełaruś prylataŭ Miadźviedzieŭ, nazyvalisia nie jak-niebudź, a «Zachad-2009». I zaduma hetaj virtualnaj vajny, jak elemientarna raskusili ekśpierty, palahała ŭ praryvie na dapamohu Kalininhradu, abłožanamu, viadoma ž, ordami NATO.

Darečy, adznačaje Alesin, u vypadku straty Biełarusi jak sajuźnika Rasija ŭ histaryčnaj pierśpiektyvie ryzykuje stracić i hetu napałovu adrezanuju łustu — kalininhradski ankłaŭ.

Ci vypadkova Minsk nacisnuŭ ciapier na balučy mazol, pahražajučy ŭ piać razoŭ padniać taryf na tranzit elektraenierhii tudy?

U Łukašenki jość dośvied bićcia pa takich bolevych punktach. Pamiatajecie, jak letašni bajkot samitu ADKB i padviešvańnie pytańnia pra Kalektyŭnyja siły apieratyŭnaha reahavańnia prymusili Maskvu chucieńka zharnuć pretenzii doktara Aniščanki dy ŭpuścić biełaruskija fury z małakom?

Miž inšym, Minsk choć i padpisaŭ u vyniku damovu pra KSAR, ale ŭ reale zusim nie śpiašajecca leźci ŭ azijackaje piekła. Letaś z hetaj nahody Łukašenka spytaŭ naŭprost: «Za šta musiać hinuć maje chłopcy, kali raptam?». Myta na naftu dla bratoŭ pa zbroi — nie lepšy adkaz Maskvy na heta pytańnie.

Darečy, i

pahadnieńnie pra adzinuju rehijanalnuju sistemu SPA, nasupierak relacyjam šerahu rasijskich infarmacyjnych resursaŭ, u biełaruski parłamient pakul nie traplała.

Takim čynam, dakumient visić u pavietry ź lutaha minułaha hoda. I, znoŭ ža, naftavaja vajna naŭrad ci stanie katalizataram ratyfikacyi.

A naohuł, vajna heta nie apošniaja. Kanfliktahiennaść — rodavaja traŭma «sajuznaj dziaržavy». Zrešty, licha biez dabra nie byvaje —

cieraz takija voś vojny adbyvajecca pastupovaje vybudoŭvańnie miždziaržaŭnych dačynieńniaŭ biez hetych postsavieckich psieŭdaintehracyjnych finciflušak.

Darečy, što da «psieŭda-»: niadaŭna minski analityk Valeryja Kaściuhova prezientavała vialikuju pracu, u jakoj «sajuznaja dziaržava» traktujecca jak forma miakkaj dezintehracyi.

Pavodle Kaściuhovaj, takim čynam adbyvajecca, z adnaho boku, «adnosna biazbolny demantaž impierskaha kompleksu», ź inšaha — «adbudoŭvańnie inšych formaŭ rehijanalnaha i mižkrainavaha ŭzajemadziejańnia, što nie padparadkoŭvajucca pramianiovamu pryncypu Centr — Pieryfieryja».

Dadamo: jaskravy prykład «adbudoŭvańnia inšych formaŭ» — fienamienalny praryŭ aŭtarytarnaha biełaruskaha režymu na jeŭrapiejskuju arenu, uvachodžańnie krainy va «Uschodniaje partniorstva» Jeŭraźviazu. Što vidavočna torhaje Maskvu.

Valeryja Kaściuhova prahnazuje: «Nastupnyja try-čatyry hady sajuznaja dziaržava jašče budzie funkcyjanavać u ekanamičnaj śfiery i piać-siem hadoŭ — u vajskovaj. Prajekt ža Kanstytucyjnaha akta pravaliŭsia, palityčnaj intehracyi nie budzie».

Nu, a ŭ pryncypie, pavodle ekśpierta, sajuznaja dziaržava — heta nie ahulnaja budučynia, a ahulnaja minuŭščyna.

Inšaja reč, što raźvitańnie ź joju budzie doŭhaje. Pa-pieršaje, Łukašenka, budźcie ŭpeŭnieny, da donca vybiera resurs hulni na vialikadziaržaŭnych kompleksach rasijskich elit, i asabliva ŭ vajskovaj śfiery. Pa-druhoje, ciapierašniaje biełaruskaje kiraŭnictva mientalna, ideałahična samo pa vušy ŭ minułym. Pa-treciaje, jakaja b ułada ni viała rej u Minsku, rezkija ruchi ŭ dačynieńni da Rasii — vialikaja ryzyka. Płaŭna, płaŭna, z abaviazkovym pahładžvańniem rasijskaha miadźviedzia…

Pavodle Alesina,

pryncypova inšaja madel dačynieńniaŭ mahčymaja budzie tolki tady, kali Biełaruś pierastanie krytyčna zaležać ad rasijskaha rynku zbytu i pastaŭki adtul enierhanośbitaŭ. Voś i prykińcie.

Karaciej, u pramiežkach pamiž enierhietyčnymi, mytnymi, handlovymi dy inšymi vojnami braty pa zbroi zmarnujuć jašče nie adnu kiłatonu porachu na sumiesnych manieŭrach. I Minsk užo hatovy znoŭ plasnuć hetym kozyram. Sačycie za rekłamaj.

• 0
• 0
• 0
• 0
• 0
• 0
• 0
• 0