Terakt, u jakim zahinuła 62 čałavieki, zdaryŭsia ŭ padmaskoŭnaj kancertnaj zale «Krokus Sici Choł». Raskazvajem, što heta za miesca.
«Krokus Sici Choł» byŭ adkryty 25 kastryčnika 2009 hoda ŭ pamiać pra śpievaka Muślima Mahamajeva. Zała znachodzicca ŭ Krasnahorsku — heta Padmaskoŭje.
Jana ŭvachodzić u skład bujnoha kompleksu «Krokus Sici» (handlova-vystavačny i dziełavy centr).
Standartnaja ŭmiaščalnaść dvuchuzroŭnievaj zały — 6200 čałaviek. Kali ŭ partery arhanizoŭvajuć tancpoł, to moža źmiaścicca da 9500 čałaviek.
Vałodaje kancertnaj załaj miljarder Aras Ahałaraŭ. U 2021 hodzie Forbes aceńvaŭ jaho bahaćcie ŭ $1,2 młrd.
Miljarderu nie raz dastavalisia darahija dziaržzakazy, raskazvaŭ The Insider. Naprykład, jon atrymaŭ padrady na budaŭnictva stadyjonaŭ da čempijanatu śvietu pa futbole, abjektaŭ Dalokaŭschodniaha Fiederalnaha ŭniviersiteta, kasmadroma «Uschodni», antykavidnaha špitala, Centralnaj kalcavoj aŭtadarohi vakoł Maskvy.
U 2012-m miljarder kazaŭ, što nie suprać, kab Pucin kiravaŭ pažyćciova.
«Kali b jon pahadziŭsia, to ja tolki vitaŭ by. Tamu što luboje źmianieńnie ŭ Rasijskaj Fiederacyi — voś vy nazyvali niejkija proźviščy. Kaho vy nazvali? Navalny? (…) Kraina razvalicca z vašym Navalnym», — kazaŭ jon tady ŭ intervju «Daždžu».
Aras Ahałaraŭ byŭ dobra znajomy z Donaldam Trampam, jašče da jaho prezidenckaj kampanii. U 2013-m jany damaŭlalisia ab biznes-partniorstvie ŭ śfiery budaŭnictva i sumiesna arhanizoŭvali konkursy pryhažości. A padčas vybarčaj kampanii Ahałaraŭ pieradavaŭ Trampu darahija padarunki: u pryvatnaści, karcinu koštam dziasiatki tysiač dalaraŭ.
Syn Ahałarava, Emin, robić muzyčnuju karjeru (jon bolš viadomy pad prostym sceničnym imiem Emin).
Kaliści jon navat źniaŭ Trampa ŭ adnym sa svaich klipaŭ. Emin taksama viadzie biznes. Jon prezident kampanii Agalarov Development. Siarod prajektaŭ kampanii — kurort, klinika, sietka fitnies-kłubaŭ, ahienctva mierapryjemstvaŭ i madelnaje ahienctva i inšaje.
The Insider pisaŭ, što Ahałaraŭ i jaho siamja apynulisia fihurantami rasśledavańnia pa spravie ab umiašańni ŭ amierykanskija vybary ŭ 2016 hodzie.
Žonka i dačka aliharcha majuć amierykanskaje hramadzianstva i žyvuć u ZŠA. Na žonku Ahałaraŭ aformiŭ kvateru ŭ Majami. Znachodzicca ich žyllo na vostravie dla najbahaciejšych ludziej — Fisher Island. Trapić na vostraŭ možna tolki na pryvatnaj łodcy, viertalocie abo paromie.
Paviedamlajecca, što paśla teraktu Ahałaraŭ i jaho syn prybyli na miesca trahiedyi. Papiarednie ŭ joj zahinuła 62 čałavieki, jašče 146 paciarpiełych. Vialiki pažar u kancertnaj zale, jaki achapiŭ amal 13 tysiač kvadratnych mietraŭ, łakalizavali i praciahvajuć tušyć.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»4
Kamientary