Biez atrakcyjonaŭ i akvaparku. Jak budzie vyhladać były «Drymłend»
Zaviaršyłasia hramadskaje abmierkavańnie architekturna-płanirovačnaj kancepcyi novaha parka, jakoje prachodziła ŭ administracyi Centralnaha rajona z 18 sakavika pa 1 krasavika. «Minsk-Naviny» raskazvajuć, što tam budzie.
U byłym «Drymłendzie» nie płanujuć ustanoŭku atrakcyjonaŭ, źniknie i akvapark. Zatoje pašyrycca sietka darožak. Isnujučaje azielanieńnie terytoryi chočuć maksimalna zachavać. Pry hetym praduhledžvajucca miescy dla stvareńnia hanarovych alej.
Uvachod u park, pa zadumie aŭtaraŭ prajektu, pavinien zastacca prykładna ŭ tym ža miescy. Jon budzie ŭjaŭlać saboj kałanadu ź interaktyŭnaj kampazicyjaj «Biełaruś» — multymiedyjnym ekranam u vyhladzie karty krainy. Na śvietłych kałonach płanujuć nanieści arnamient załacistaha koleru, hierby stalicy i abłaściej krainy.
Niepadalok ad uvachodu chočuć arhanizavać płošču dla praviadzieńnia dziaržaŭnych mierapryjemstvaŭ.
Centralnaj častkaj parka pavinna stać ekspazicyja «Biełaruś» płoščaj 2,4 ha. Jaje abrysy paŭtorać kontur karty, a ŭsiaredzinie buduć rečyščy rek, abrysy azior i zialonyja masivy zapaviednych miescaŭ.
— Rečyšča rek prapanujecca vykanać u vyhladzie suchich ručajkoŭ z zasypańniem žviram, pasadkaj uzdoŭž bierahoŭ dekaratyŭnych raślin, vyšej pa adchonach — łuhavoj travy i kvietak. Miežy terytoryi abłaściej zadumana paznačyć stryžanym chmyźniakom, — havorycca ŭ tłumačalnaj zapiscy.
Tam taksama ŭdakładniajecca, što kožny ŭčastak ekspazicyi sfarmiruje ŭnikalny łandšaftny kutok, jaki adlustroŭvaje asablivaści rehijonaŭ. U adpaviednaści z architekturna-płanirovačnaj kancepcyjaj majuć namier raźmiaścić minijaciury samych značnych słavutaściaŭ kožnaj vobłaści Biełarusi i horada Minska — budynkaŭ i zbudavańniaŭ z palimiernych i naturalnych materyjałaŭ u maštabie 1:25.
Jość ideja ŭstanavić elektronnyja infaabjekty, dzie naviedvalniki zmohuć prasłuchać i pračytać infarmacyju ab historyi, dasiahnieńniach i pierśpiektyvach raźvićcia haradoŭ i krainy ŭ cełym.
Kontur łandšaftnaj kampazicyi «Biełaruś» chočuć vyłučyć darožkaj šyrynioj 5 m z čyrvonaj bietonnaj plitki, da jakoj buduć vieści piešachodnyja šlachi parka. U prajekcie praduhledžany mastackaje padśviatleńnie abjektaŭ ekspazicyi i konturnaje padśviatleńnie kampazicyi ŭ viačerni čas.
Za łandšaftnaj kartaj namiečana raźmiaścić dziciačy hulniavy kompleks, zonu adpačynku z altankami. Pa susiedstvie zachavajecca isnujučaja valejbolnaja placoŭka.
Častka zbudavańniaŭ u parku padlahaje rekanstrukcyi dla novaha pryznačeńnia i vykarystańnia. U pryvatnaści, u adnym ź ich majuć namier raźmiaścić infarmacyjny centr i punkt chutkaha charčavańnia.
Ciapier čytajuć
Piać dzion, 60 udzielnikaŭ, saŭna, biljard i kryki adno na adnaho. Raskazvajem, jak prajšła zakrytaja «hulnia Mackieviča»57
Kamientary
Ale toje, što prydumali łukašenkaŭskija architektary i idejołahi - heta vyrodlivaja zamoščanaja plitkaj płošča ź nievialikim zialonym asiarodździem dla prapahandyskich mierapryjemtsvaŭ kštałtu płoščy łukašenkaŭskaha ściaha niepadalok. Sychodziačy z płoščy terytoryi, našmat lepšaj idejaj było b stvaryć ŭ hetym miescy łabirynt z raślinaŭ kštałtu łabiryntu ŭ italjanskim miastečku Fantanełatta