«Chto vałodaje Małoj Takmačkaj, toj vałodaje śvietam». Nieprystupnaje ŭkrainskaje siało stała miemam
Nievialikaje ŭkrainskaje siało stała simvałam tupika rasijskaj armii na froncie.
Siało Małaja Takmačka znachodzicca ŭ Arechaŭskim rajonie Zaparožskaj vobłaści. Na pačatku poŭnamaštabnaha ŭvarvańnia jano akazałasia pad kantrolem rasijskaj armii, adnak užo da maja 2022 hoda było całkam vyzvalena.
Da vajny tam žyło kala troch tysiač čałaviek, u 2024 hodzie zastałosia ŭsiaho kala sotni. Uletku 2025 hoda padčas šturmu rasijskimi vojskami siało było faktyčna całkam źniščana.
Małaja Takmačka raźmieščana na levym bierazie raki Konka: vyšej pa ciačeńni, prykładna za 2,5 kiłamietra, znachodzicca siało Novapakroŭka, nižej, na adlehłaści kala 2 kiłamietraŭ, — horad Arechaŭ, a na supraćlehłym bierazie — siało Praabraženka.
Praz Małuju Takmačku prachodziać aŭtamabilnaja i čyhunačnaja darohi. Trapić u Arechaŭ, dzie Uzbrojenyja siły Ukrainy vybudavali mocny pierymietr abarony, rasijskija vojski mohuć tolki praz hetaje siało.
Novyja žorstkija chvali rasijskich atak na Małuju Takmačku pačalisia ŭ siaredzinie 2025 hoda. 16 listapada rasijskija ŚMI paviedamili pra «vyzvaleńnie» nasielenaha punkta.
Užo 17 listapada 2025 hoda ministr abarony Rasii Andrej Biełavusaŭ pavinšavaŭ asabovy skład 42‑j hvardziejskaj motastrałkovaj dyvizii z «vyzvaleńniem» Małoj Takmački i zajaviŭ, što heta — surjozny krok da pieramohi i dasiahnieńnia metaŭ «śpiecyjalnaj vajennaj apieracyi». Ale rasijskija vojski nie zdoleli zamacavacca tam.
Ciapier terytoryju Małoj Takmački nie kantraluje całkam nivodny z bakoŭ.
Pastajannaje źjaŭleńnie nazvy hetaha adnosna nievialikaha nasielenaha punkta ŭ zvodkach z časam pačało razdražniać navat prarasijskich Z-prapahandystaŭ.
U siaredzinie krasavika ŭ siecivie źjaviłasia videa-narezka vystupleńniaŭ «ekśpierta» Barysa Rožyna ŭ efiry rasijskaha telebačańnia. Na praciahu 11 miesiacaŭ jon rehularna paviedamlaŭ pra žorstkija bai za Małuju Takmačku, a taksama pra jaje «vyzvaleńnie».
Videa chutka razyšłosia pa internecie i vyklikała chvalu miemaŭ.
U telehramie navat źjaviŭsia iraničny kanał z nazvaj «Vziata li Małaja Tokmačka?». Jaho aŭtary abiacajuć «štodzionnuju zvodku bajavych dziejańniaŭ za nasieleny punkt». Jość i sajt, dzie adsočvajuć apieratyŭnuju situacyju ŭ siale.
Ciapier čytajuć
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»12
Kamientary