Biełarusa, jakoha adličyli z BDEU za toje, što nie tak stajaŭ na liniejcy, ciapier zabirajuć u vojska

Kirył, jakoha vyklučyli ź Biełaruskaha dziaržaŭnaha ekanamičnaha ŭniviersiteta, raspavioŭ pra novyja detali svajoj historyi. Ciapier jaho pryzyvajuć na terminovuju słužbu.

Historyja pačałasia ŭ kastryčniku 2025 hoda, kali Kiryła, studenta čaćviortaha kursa, adličyli z univiersiteta. Pryčynaj stała videa, apublikavanaje chłopcam u TikTok. Na im była źniataja ŭračystaja liniejka, dzie student razam ź dźviuma dziaŭčatami stajaŭ pad dziaržaŭny himn Biełarusi. Na roliku adna dziaŭčyna śpiavała słovy himna, pakul sam Kirył razam ź inšaj hierainiaj videa prosta ruchalisia pad muzyku.

Kirył śćviardžaje, što videa trapiła ŭ Ministerstva adukacyi, dzie jaho rascanili jak «niepavahu da dziaržaŭnych simvałaŭ», bo ŭdzielniki stajali śpinaj da ściaha. Pry hetym u studenta ŭžo byli akademičnyja zapazyčanaści i adno niepahašanaje spahnańnie. Videa, pavodle jaho viersii, stała farmalnaj padstavaj dla druhoj vymovy, paśla jakoj adbyłosia adličeńnie.

U aficyjnym zahadzie ŭniviersiteta paviedamlałasia, što student byŭ vyklučany za parušeńnie praviłaŭ unutranaha rasparadku.

Taksama adznačałasia, što jaho dziejańni mohuć utrymlivać prykmiety administracyjnaha abo kryminalnaha pravaparušeńnia.

Kamisija ŭličyła i papiarednija dyscyplinarnyja spahnańni.

Paśla adličeńnia Kirył mieŭ namier asprečyć rašeńnie BDEU ŭ roznych instancyjach z dapamohaj advakatki: ad Ministerstva adukacyi da prakuratury. Adnak pakul nivodnaja skarha byłoha studenta nie była zadavolenaja.

U svaim Telegram-kanale jon raspavioŭ, što ŭsio skončyłasia «farmalnymi adpiskami». U Minadukacyi paviedamili, što parušeńniaŭ dziejučaha zakanadaŭstva z boku BDEU vyjaŭlena nie było.

Pavialičyć

Pavodle Kiryła, va ŭniviersitecie jamu taksama nie dali kankretnych tłumačeńniaŭ: adkazy paŭtaralisia i vyhladali «nibyta napisanymi pad kapirku». Jon adznačaje, što adčuvaje sum, bo straciŭ try hady navučańnia i tak i nie zmoh skončyć VNU.

1 maja 2026 hoda stała viadoma pra novy pavarot u spravie. U Telegram-kanale Kirył raspavioŭ, što jaho zabirajuć u vojska.

Jon nahadaŭ, što padčas minułaha pryzyvu, kali jaho tolki vyklučyli z univiersiteta, jaho nie zabrali praź pierapoŭnieny nabor. Tady jamu adrazu ŭručyli pozvu na sakavik 2026 hoda. Čas pralacieŭ chutka, i 23 sakavika jon źjaviŭsia ŭ vajenkamat, ale zabyŭsia ŭziać nieabchodnyja dakumienty (analizy, EKH i inšyja daviedki).

Tam, jak śćviardžaje chłopiec, supracoŭnica vajenkamata pačała paprakać jaho za adsutnaść miedycynskich papier i ŭ vyniku vydała pozvu na adpraŭku: kantrolnaja jaŭka pryznačanaja na 5 maja, a ŭžo 6 maja jaho majuć zabrać u vojska.

U kanale chłopiec paabiacaŭ paźniej paviedamić, u jakuju mienavita vajskovuju častku jaho nakiroŭvajuć.

• 0
• 0
• 2
• 0
• 2
• 0
• 1
• 0