«CRU ci MI-6. Zamova transnacyjanalnych elit». Prapahanda vykarystoŭvaje zamach na Fica pa poŭnaj prahramie

Zamach na premjer-ministra Słavakii Robierta Fica nie zastaŭsia pa-za ŭvahaju biełaruskich prapahandystaŭ. Niekatoryja tolki zrabili pierapost paviedamleńnia, a inšyja vystupili z «hłybokim» analizam, sprabujučy adkazać na pytańnie, kamu vyhadna zabojstva.

Tak ahladalnik «Minskaj praŭdy» Juryj Uvaraŭ na sajcie vydańnia raźmiaściŭ materyjał pad nazvaju «Ad biaśsilla Zachad pierajšoŭ da praktyki palityčnaha teraryzmu».

Prapahandyst upeŭnieny, što za zamacham stajać «zachodnija centry pryniaćcia rašeńniaŭ». Pieradusim Vašynhton i Łondan. Pa jaho viersii, «zamach vierahodniej za ŭsio arhanizavany CRU ci MI-6».

«Hetyja centry i ich śpiecsłužby realizujuć zamovu transnacyjanalnych elit», — upeŭnieny Uvaraŭ.

Matyvam dla zamachu pasłužyła adkrytaja «nacyjanalna-aryjentavanaja pazicyja» Fica, jakaja vydzialaje jaho «z usioj zhrai lokajaŭ-hłabalistaŭ typu Makrona i Šolca».

Prapahandyst adznačaje, što «ŭ zachodnich kołach Fica nazyvajuć prarasijskim» i śćviardžaje, što «siońnia praktyčna ŭsie viadučyja zachodnija ŚMI pišuć, što zamach na Fica — heta papiaredžańnie Orbanu».

Inšy viadomy prapahandyst, a ciapier i deputat Alaksandr Špakoŭski na temu zamachu vykazaŭsia ŭ prahramie «Viečar z Uładzimiram Sałaŭjovym».

Špakoŭski ŭpeŭnieny, što za hetym stajać śpiecsłužby, jakija «vielmi časta vykarystoŭvajuć emacyjna niaŭstojlivych ekzaltavanych ludziej».

«Chto vioŭ hetaha piśmieńnika, aktyvista libiertaryjanskaj partyi? Partyja hetaja ciesna źviazanaja ź sietkavymi strukturami Džordža Sorasa. Treba razumieć, što i Viktar Orban u Vienhryi i Robiert Fica ŭ Słavakii i Alaksandr Vučyč (prezident Sierbii — NN) aktyŭna zmahajucca z hetymi strukturami, jakija źvili hniazdo ŭ Centralnaj Jeŭropie».

«U hetaj situacyja całkam vidavočna, što siłam, jakija padtrymlivajuć hłabalizm, ahresiŭnuju jeŭraantłantyčnuju aryjentacyju ŭ Słavakii vyhadnaja likvidacyja premjer-ministra Fica — adnaho ź niešmatlikich samastojnych palitykaŭ u Jeŭropie».

Da prapahandystaŭ dałučyŭsia i Aleh Hajdukievič. Jon zapisaŭ videa, u jakim zajaviŭ: «Toje, što Zachad raspraŭlajecca ź niepažadanymi, my heta daŭno ŭžo viedajem. Zamach na Rabierta Fica — nie pieršy i nie apošni vypadak u Jeŭropie».

«Jak zaŭsiody havorać — «heta varjat», «heta niaščasny vypadak». Ale čamuści heta zaŭsiody adbyvajecca z tymi, chto adstojvaje suvierenitet krainy i chto maje śmiełaść havaryć toje, što nie chočuć čuć hłabalisty i zachodnija elity», — ličyć Hajdukievič.

• 4
• 0
• 7
• 6
• 1
• 2
• 1
• 0