Dopisy supracoŭnika «Minskaj praŭdy» pierapoŭnili čašu ciarpieńnia kiraŭnicy «Biełaj Rusi»
Śviatłana Varanica nie vytrymała, kali ŭ telehram-kanale Juryja Uvarava źjavilisia dopisy pra musulman.
Śviatłana Varanica zajmaje pasadu namieśnika staršyni Hrodzienskaj abłasnoj arhanizacyi «Biełaja Ruś».
Prapahandyst Juryj Uvaraŭ pracuje ŭ čarnasociennaj dziaržaŭnaj «Minskaj praŭdzie». Tam jon piša pra ŭsio zapar — ad pratestaŭ u Iranie da palityki Kitaja. Siarod inšaha jon zaklikaŭ źniščyć pachavańni ŭ Kurapatach.
Z apošniaha — u svaim telehram-kanale (5400 padpisčykaŭ) jon zamacavaŭ paviedamleńnie z pažadańniem pieramohi Iranu. Vosieńniu minułaha hoda Uvaraŭ aburaŭsia, što ŭ ciahnikach Biełaruskaj čyhunki hučać pieśni Anžaliki Ahurbaš.
Kanflikt pamiž Varanicaj i Uvaravym, jak vynikaje ź jaje zapisu, uźnik raniej. Tak, jana zajaŭlaje, što ŭ vypadku, kali mužčyna padaść na jaje «jašče adnu zajavu ŭ orhany ŭnutranych spraŭ», to jana budzie «adstojvać svajo prava na mierkavańnie darosłaha, adekvatnaha čałavieka havaryć u publičnaj prastory ab svajoj niazhodzie z asobnymi dziejańniami hramadzianina Uvarava».
Što ž pasłužyła padstavaj dla novaha vitka kanfliktu? Jak piša aktyvistka «Biełaj Rusi»,
«hramadzianin Uvaraŭ, jaki maje «značny staž pracy palityčnym ahladalnikam u viadučych ŚMI» (pramaja cytata) praciahvaje ciahnuć u biełaruski siehmient TH kantent, jaki, na moj pohlad hramadzianina Respubliki Biełaruś, moža farmiravać mižkanfiesijnuju varožaść».
Jana kateharyčna suprać taho, kab «u krainie, dzie z pavahaju staviacca da pačućciaŭ viernikaŭ usich relihij, dzie zachavańnie etnakanfiesijnaha miru — vialikaja praca na karyść usich nacyjanalnaściej i narodnaściej, jakija pražyvajuć na našaj mirnaj ziamli, źjaŭlaŭsia padobny kantent».
U jakaści dokazu Varanica raźmiaściła niekalki skrynšotaŭ publikacyj z telehram-kanała Uvarava, jakija źjaŭlajucca pierapostami z rasijskich kanałaŭ.
Akramia hetaha, aktyvistka apublikavała ŭryŭki svajoj pierapiski z Uvaravym, ź jakoj vynikaje, što jana sprabavała źviarnuć uvahu prapahandysta na niedarečnaść niekatorych publikacyj, ale atrymała poŭny abrazaŭ adkaz.
Da hetaha Varanica krytykavała Ryhora Azaronka i Volhu Bondaravu. Praŭda, tyja, nakolki viadoma, zajavaŭ u milicyju na jaje nie pisali.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1111
Kamientary