Rasijski pablik Fighterbomber, jaki śpiecyjalizujecca na avijatematycy, analizuje novyja zdymki z aeradroma ŭ Achtubinsku, dzie 8 červienia ad ukrainskaj rakietnaj ataki paciarpieŭ najnoŭšy Su-57.
«Kab dva razy nie ŭstavać, skažu, što paškodžany byli dva Su-57. Druhi Su-57 atrymaŭ niaznačnyja paškodžańni, jakija zrobiać na miescy. Pra pieršy ja ŭžo pisaŭ. Buduć dumać, metazhodna jaho adnaŭlać ci nie», — piša Fighterbomber.
Pavodle jaho infarmacyi, z troch BPŁA, jakimi byŭ atakavany aeradrom, dalacieli ŭsie try.
«Pa jakich pryčynach SPA nie pracavała, ja pisać nie budu. Chaj tavaryšy majory raźbirajucca z pryčynami, jak tak vyjšła. Adziny adpor BPŁA pasprabavaŭ dać narad, jaki rasstralaŭ dva mahaziny pa ich, a potym usiu ranicu źbiraŭ hilzy pa aeradromie».
Na zdymkach bačnyja duhi nad samalotam — heta niedabudavany anhar. Jaho pačali budavać, a potym kinuli, «jak i na mnohich inšych aeradromach», — piša błohier.
U 2021 hodzie były ministr abarony Siarhiej Šajhu abviaściŭ, što ŭ Rasii pabudujuć «paskoranymi tempami» 300 chovanak dla samalotaŭ.
«Karaciej, čakajem nastupnaha prylotu. Zahadzia zapasimsia hilzami i śpiecyjalistami pa fejkach», — dadaje błohier.
Nivodny namalavany samalot z fota nie paciarpieŭ, žartuje jon. Na fota bačna, što ŭ metach dezaryjentacyi supiernika na aeradromie ŭ Achtubinsku namalavanyja samaloty. Navat u z-błohieraŭ heta vyklikaje ździeki.
8 červienia na terytoryi aeradroma «Achtubinsk» u Astrachanskaj vobłaści RF, raźmieščanym u 589 kiłamietrach ad linii frontu, atakavany šmatmetavy rasijski źniščalnik Su-57, paviedamiŭ HUR.
Su-57 — šmatmetavy źniščalnik piataha pakaleńnia. Jaho stvaryli z užyvańniem technałohij małaprykmietnaści i pieradavoj elektroniki. Hetaja bajavaja mašyna zdolnaja nieści ŭzbrajeńnie va ŭnutranych adsiekach fiuzielaža. Samalot taksama vałodaje zvyšhukavoj krejsierskaj chutkaściu, pry hetym moža manieŭravać ź vialikimi pierahruzkami.
Heta samy sučasny rasijski źniščalnik, jaki zdolny vykarystoŭvać dla ŭdaraŭ rakiety Ch-59 i Ch-69. Na ŭzbrajeńni pavietrana-kaśmičnych sił Rasii znachodziacca adzinki takich bajavych samalotaŭ.
Minabarony RF zajaŭlała ab źbićci ŭsich dronaŭ nad Astrachanskaj vobłaściu.
Na naradzie ŭ Łukašenki publična pasvarylisia čynoŭniki. Jon nie viedaŭ, kaho padtrymać15
Kamientary