Barel: Kali Rasija pieratvoryć Ukrainu ŭ druhuju Biełaruś, my zapłacim vialikuju canu
Viarchoŭny pradstaŭnik ES pa zamiežnych spravach i palitycy biaśpieki ŭ Vašynhtonie padčas mierapryjemstva ES u ramkach samitu NATO paraŭnaŭ parazu Ukrainy ŭ vajnie ź pieratvareńniem jaje ŭ druhuju Biełaruś z «maryjanietkavym uradam». Tekst vystupu apublikavany Jeŭrapiejskaj słužbaj zamiežnych dziejańniaŭ, piša Reform.news.
Kažučy pra vajnu, Barel uspomniŭ svaju razmovu z premjer-ministram Ukrainy Dzianisam Šmyhalem za dva tydni da pačatku ŭvarvańnia ŭ 2022 hodzie. Tady kiraŭnik ukrainskaha ŭrada cikaviŭsia ŭ Barela, ci padtrymaje ES Kijeŭ zbrojaj u vypadku vajny. Sa słoŭ Barela, tady ŭ jaho nie było adnaznačnaha adkazu.
«I ŭ toj čas ja nie moh dać jamu kankretnaha adkazu — ja nie byŭ upeŭnieny. Ale, na ščaście, heta toje, što my zrabili.
Tak, kali hladzieć z Vašynhtona, heta vyhladaje narmalna. Kali hladzieć ź Jeŭrasajuza, heta revalucyja — mientalnaja revalucyja dla Jeŭrasajuza.
Ciapier my naroščvajem našy pramysłovyja mahutnaści, stymulujem našy haliny, abjadnoŭvajem resursy, sumiesna raźvivajem našy mahčymaści, kab adkazać na hety vyklik.
My viedajem, što heta patrabuje bolšaj efiektyŭnaści, bolšaj apieratyŭnaj sumiaščalnaści dla našych 27 roznych armij i bolšaj pradkazalnaści dla abaronnaj pramysłovaści, jakoj nieabchodna viedać, jakim budzie budučy popyt, kab apraŭdać siońniašnija inviestycyi.
My viedajem, što abaronnaja pramysłovaść budzie adyhryvać važnuju rolu ŭ budučyni.
Bo my razumiejem, što kali dazvolim pucinskaj Rasii pieratvaryć Ukrainu ŭ druhuju Biełaruś i pasadzić u Kijevie «maryjanietkavy ŭrad», to paśla my zapłacim značna bolšuju canu.
Toje, što Ukraina atrymaje pieramohu, źjaŭlajecca ekzistencyjalnym, źjaŭlajecca patrabavańniem našaj biaśpieki», — skazaŭ Barel.
Kiraŭnik jeŭrapiejskaj dypłamatyi taksama adznačyŭ, što Rasieja siońnia stymuluje svaju ekanomiku za košt naroščvańnia vajskovych vydatkaŭ. Heta navat stała pryčynaj, što Suśvietny bank viarnuŭ RF u lik krain z vysokim uzroŭniem dachodu. Adnak, sa słoŭ barela, heta nie pryviało da rostu dabrabytu rasiejcaŭ.
«My viedajem, što siońnia ŭ takoha rodu vajnie pramysłovaja vytvorčaść, technałahičnyja mahčymaści adyhryvajuć klučavuju rolu ŭ dastaŭcy rakiet, artyleryjskich bojeprypasaŭ, zienitnych sistem.
Voś čamu ja nastojvaju na hetaj idei. My ŭmacoŭvajem našu abaronnuju pramysłovaść: kuplajučy razam, pavialičvajučy vytvorčyja mahutnaści, stymulujučy supracoŭnictva pamiž jeŭrapiejskimi vytvorcami zbroi», — dadaŭ jon.
Kamientary