Va ŭkrainski pałon trapiŭ jašče adzin biełarus, jaki vajavaŭ u składzie rasijskaj armii
Dva hady tamu padobnaha mužčynu z takim ža hodam naradžeńnia MUS Biełarusi abviaściła ŭ vyšuk, piša Radyjo Svaboda.
Jaŭhien Kamiańkoŭ, imavierna, trapiŭ u pałon viasnoj 2024 hoda ŭ časie bajoŭ pad Vaŭčanskam Charkaŭskaj vobłaści. Viadoma, što jon naradziŭsia 17 sakavika 1999 hoda.
Admietna, što treciaha lipienia 2022 hoda ŭ Telegram-kanale Ministerstva ŭnutranych spraŭ Biełarusi, u jakim paviedamlajuć pra źnikłych ludziej, apublikavali infarmacyju ab vyšuku na toj momant 23-hadovaha žychara Babrujska Kamiańkova Jaŭhiena Andrejeviča.
Zhodna z paviedamleńniem, jon razam z 13-hadovym Łaziukom Alaksiejem Leanidavičam 1 lipienia 2022 hoda pajšoŭ u nieviadomym kirunku z manastyra «Afanasija», što znachodzicca pa vulicy Śviata-Afanaśjeŭskaj u Bieraści. Siarod asablivych prykmiet Jaŭhiena Kamiańkova ŭ paviedamleńni nazvali tatu ŭ vyhladzie kinžała daŭžynioj kala 20 santymietraŭ na ŭnutranym baku pieradplečča. Paviedamlałasia, što jany mohuć pieramiaščacca ŭzdoŭž daroh, naviedvać cerkvy, manastyry i inšyja relihijnyja arhanizacyi.
8 lipienia 2022 hoda pres-słužba MUS Biełarusi paviedamiła, što Alaksieja Łaziuka znajšli ŭ horadzie Puškina Maskoŭskaj vobłaści. Spačatku jaho raźmiaścili ŭ dziciačym sacyjalnym prytułku, a potym musili zabrać dadomu biełaruskija milicyjanty. Paviedamleńnia, što Jaŭhiena Kamiańkova ŭžo znajšli, tady nie było.
Na novym fotazdymku, jaki Svaboda maje imavierna z ukrainskaha pałonu, mužčyna padobny da taho, zdymak jakoha raźmiaścili ŭ Biełarusi dla vyšuku Kamiańkova Jaŭhiena Andrejeviča — u ich supadajuć koler vačej, forma nosa i rostu vałasoŭ na łobnaj častcy hałavy.
Svaboda źviarnułasia va ŭkrainski dziaržaŭny prajekt «Chaču znajści», stvorany dla pieradačy svajakam infarmacyi ab vajennapałonnych, źnikłych bieź źviestak ci zahinułych rasiejskich vajskoŭcaŭ. Pavodle praviłaŭ prajektu, adkaz mohuć dać ciaham 14 dzion.
Kamientary