Prapahandysty z Mali abvinavacili ŭ razhromie vahnieraŭcaŭ «śpiecnaz NATA». Navat u Rasii paśmiajalisia
Malijskija prapahandysty vyrašyli skarystacca viadomym kramloŭskim naratyvam, što ŭ lubych ułasnych parazach vinavatyja vajskoŭcy NATA, i prypleści jaho da niadaŭniaha razhromu vahnieraŭcaŭ ad miascovych plamionaŭ u pustelni. U Rasii, adnak, taki padychod nie acanili.
Rasijskaje ahienctva «RIA Novosti» na fonie razhromu kałony vahnieraŭcaŭ u Mali ŭziało kamientar u miascovaha malijskaha «ekśpierta-palitołaha», jaki vykazaŭ novuju aficyjnuju viersiju parazy rasijskich najmitaŭ u pustelni.
Pa śćviardžeńniach malijskaha prapahandysta, vahnieraŭcy paciarpieli parazu nie ad paŭstancaŭ-tuarehaŭ, a ad «śpiecnaza krain NATA pad prykryćciom, jaki ŭsio spłanavaŭ pasiekundna». A tyja, chto dumaje inakš, pamylajucca, miarkuje «ekśpiert».
Hetuju viersiju padziej i fakt jaje źjaŭleńnia ŭ rasijskich miedyja adrazu vyśmiejaŭ bujny rasijski vajenkar «Rybaŕ», jaki padkreśliŭ, što tłumačyć svaje parazy vychadkami sałdat NATA nie treba, bo hetaja niedaacenka miascovych vorahaŭ tolki škodzić płanavańniu budučych apieracyj i vystaŭlaje aŭtaraŭ takich naratyvaŭ u niavyhadnym śviatle.
«Rybaŕ» u hetym kantekście kazaŭ mienavita pra malijskuju prapahandu i vykazaŭ nadzieju, kab «Rasija chutčej navučyła malijcaŭ», što nie treba niedaaceńvać vorahaŭ.
«Heta mahło b hučać jak aniekdot, kali b nie trahičnaść situacyi. Tak, my viedajem, što ŭ Mali vielmi baluča ŭsprymajuć lubyja straty ŭ vajnie z bajevikami. I tak, uzrovień afrykanskich ŚMI i ekśpiertaŭ rehijanalnych vydańniaŭ pakidaje žadać lepšaha: padobnych ničym nie paćvierdžanych zajaŭ tam hać haci.
Ale voś navošta RIA vyrašyła pryciahnuć hetuju navinu da siabie ŭ stužku, uvohule nie viedajem. Niedaacenka praciŭnika ŭ asobie tuarehaŭ i vydumlańnie apraŭdańniaŭ tolki ŭskładniaje zadaču pa padrychtoŭcy i płanavańni budučych bitvaŭ. I lepš by rasijskamu boku chutčej navučyć hetamu malijcaŭ. Urešcie, i my sami praz heta prachodzili», — napisaŭ viadomy rasijski vajenkar «Rybaŕ».
Sam pa sabie naratyŭ pra datyčnaść NATA da niaŭdač Rasii vykarystoŭvajecca Kramlom zaŭsiody. Na dumku rasijskich uładaŭ, prapahandystaŭ i šmatlikich botaŭ u sacsietkach, mienavita błok NATA nibyta vinavaty ŭ raźviazvańni vajny va Ukrainie, mienavita Zachad nibyta zajzdrościć mahčymaściam i mahutnaści Rasii i mienavita zachodnija ŭzbrajeńni i sałdaty nibyta nie dajuć ukraincam prajhrać na poli boju.
Niedaacenka Kramlom ukrainskaj armii i žadańnie zamaŭčać jaje pieramohi časam nabyvajuć inšyja formy, kali, naprykład, źbićcio Ukrainaj rasijskich kaštoŭnych samalotaŭ tłumačycca prapahandaj ci ich «techničnaj niaspraŭnaściu», ci «pamyłkovym abstrełam» z boku svaich ža rasijskich sistem SPA.
Kamientary