Va Ukrainie vyjšła pieršaja bijahrafija eks-hałoŭnakamandujučaha USU Valeryja Załužnaha
Aŭtar bijahrafii «Žalezny hienierał. Uroki čałaviečnaści» — byłaja daradca eks-hałoŭnakamandujučaha pa pytańniach stratehičnych kamunikacyj Ludmiła Dałhanoŭskaja, piša Bi-bi-si.
Jak možna daviedacca z knihi, Załužny, čyja vajennaja karjera była nakanavanaja, niekalki razoŭ byŭ blizki da taho, kab parvać z armijaj, pierš za ŭsio pa finansavych mierkavańniach. Jašče padčas vučoby ŭ akademii abarony jamu daviałosia padpracoŭvać achoŭnikam u Kijeŭskim načnym kłubie sa svaim adnahrupnikam Eduardam Maskalovym. Niadaŭna Maskaloŭ, ciapier hienierał-major, uznačaliŭ ukrainskuju vajskovuju kamiendaturu ŭ Kurskaj vobłaści.
Pryznačeńnie hałoŭnakamandujučym USU stała dla Załužnaha poŭnaj niečakanaściu. Na sumoŭi z Uładzimiram Zialenskim jon byŭ upeŭnieny, što jaho rychtujuć na pasadu kamandujučaha apieracyjaj na ŭschodzie Ukrainy. Prapanova stać hałoŭnakamandujučym Załužny ŭ knizie nazyvaje »nakaŭtam, akryjać ad jakoha dapamahła žonka».
Napiaredadni rasijskaha ŭvarvańnia, piša Dałhanoŭskaja, Załužny nastojvaŭ na ŭviadzieńni na ŭsioj terytoryi Ukrainy vajennaha stanovišča i abviaščeńni ŭsieahulnaj mabilizacyi, ale prezident Zialenski nie pajšoŭ na heta.
Załužny ličyć, što vychad USU na miežy 1991 hoda nie zabiaśpiečać Ukrainie ŭstojlivy mir. Na jahonuju dumku, nadziejna abaranić krainu moža tolki siabroŭstva ŭ NATO abo pieratvareńnie dziaržavy ŭ krepaść pavodle madeli Izraila.
Eks-hałoŭnakamandujučy addaje naležnaje rasiejskaj škole vajskovaj navuki, a ŭ 2012 hodzie ledź nie pastupiŭ na navučańnie ŭ akademiju Hienštaba RF. Jon z pavahaj stavicca da hienierała Valeryja Hierasimava i pieraścierahaje ad niedaacenki supiernika. Adnak užo paśla pačatku Vialikaj vajny Załužny pryjšoŭ da vysnovy, što realny stan spraŭ u rasijskaj armii całkam adarvany ad vajennaj navuki.
Pierakaz žyćciovaha i prafiesijnaha šlachu Załužnaha ŭ knizie zakančvajecca 1 sakavika 2023 hoda, kali aŭtar bijahrafii pakinuła pasadu pamočnika Załužnaha. Za ramkami knihi zastalisia padrabiaznaści letašniaha kontrnastupleńnia VSU, pryznanaha mnohimi ekśpiertami niaŭdałym i detali pryznačeńnia Załužnaha na ciapierašniuju pasadu pasła ŭ Vialikabrytanii.
Łukašenka byŭ u Maskvie biez hieorhijeŭskaj stužki. Najaŭnaść abo adsutnaść stužak padzialiła haściej parada na dźvie hrupy10
Łukašenka byŭ u Maskvie biez hieorhijeŭskaj stužki. Najaŭnaść abo adsutnaść stužak padzialiła haściej parada na dźvie hrupy
Doktarku Alenu Mikałajevu padčas vajny adpravili na Vaładarku za dapamohu habrejam — u XXI stahodździ tam ža apyniecca jaje praŭnučka Maryna Zołatava33
Kamientary