Ci sapraŭdy ŭ turmie ŭ Žodzinie ŭ žniŭni 2023 pamior palitviazień? Nie, siamja chłusić
Navina pra śmierć nieviadomaha raniej palitviaźnia raźlaciełasia pa ŭsich biełaruskich ŚMI. Ale, jak vyśviatlajecca, heta infarmacyja, chutčej za ŭsio, niepraŭdzivaja. Pravaabaroncy ź inicyjatyvy Dissidentby źviarnuli našu ŭvahu na dziŭnyja niesupadzieńni ŭ historyi. My znajšli jašče bolej infarmacyi. Pamierły mužčyna, padobna, nie mieŭ dačynieńnia da palityki, a ludzi, jakija raspaŭsiudžvajuć hetuju infarmacyju, sprabujuć padmanuć miedyja.
Ludzi, što pradstavilisia svajakami palitviaźnia, jakich vysyłajuć sa Šviecyi, dasłali pravaabaroncam i žurnalistam daviedku ab śmierci čałavieka, jakoha vydajuć za pamierłaha palitviaźnia. Trapiŭ hety dakumient i ŭ našu redakcyju, ale ŭžo paśla pieršasnaj publikacyi ŭ inšych ŚMI. Takim čynam, havorka idzie pra Vasila Citarenku, 55-hadovaha žychara Minska.
Vyklikała sumnievy jak jakaść daviedki, hetak i poŭnaja adsutnaść infarmacyi pra Vasila ŭ raskładach sudoŭ, choć heta vialikaja redkaść pa niesakretnych spravach.
Našy zdahadki paćvierdziŭ były turemny lekar Vasil Zavadski, ź jakim my pahutaryli:
«Heta nie błank SIZA, ale padpisana jak by načalnikam SIZA. Razam z tym, napisana, što vydana inśpiekcyjaj MUS pa Minsku i Minskaj vobłaści. Niama takoj inśpiekcyi.
Nie supadajuć i inicyjały načalnika žodzinskaj turmy — jon Strabkoŭ Dźmitryj Mikałajevič, a ŭ daviedcy niejki Ściapkoŭ D.Ju. Piačatku ŭstanovy ciapier padrabić vielmi prosta.
Podpis načalnika vyhladaje padroblenym. Taksama daviedka ab śmierci vydana pamierłamu, heta niemahčyma».
My spraŭdzili i raskłady sudoŭ. Čałavieka z takimi źviestkami niama ani ŭ jakim raskładzie za apošnija dva hady.
Staronka samoha Vasila Citarenki, jakoha vydajuć za palitviaźnia, była aktyŭnaja ažno da pačatku lipienia 2023 hoda, praz 9 miesiacaŭ paśla «prysudu» i praz amal hod paśla «zatrymańnia». Niechta łajkaŭ tam aniekdoty, miemy dy publikavaŭ matyvacyjnyja cytaty. Styl viadzieńnia staronki zusim nie źmianiŭsia paśla mierkavanaha «zatrymańnia» Vasila.
Źviarnuli my ŭvahu i na toje, što tyja, chto vydajuć siabie za svajakoŭ Vasila, kazali, što jaho zatrymali ŭvosień 2022-ha hoda. I ŭžo praz paru miesiacaŭ prysudzili try hady kałonii ažno pa piaci artykułach. Navat bytavyja spravy ab kradziažy redka razhladajucca tak chutka, nie kažučy pra palityčnyja spravy.
Bolš za toje, «Viasna» źviarnuła ŭvahu, što za «zakliki da sankcyj» pavodle artykuła 361 KK pačali sudzić tolki z 2023 hoda — užo paśla vyniasieńnia «prysudu» Vasilu Citarenki. Da taho ž paviedamlałasia, što jaho sudziŭ adzin z rajonnych sudoŭ, ale takija spravy zvyčajna razhladajuć vyšejšyja sudy.
Fota mahiły mužčyny sapraŭdnaje. Takim čynam, najchutčej, Vasil Citarenka sapraŭdy pamior i my spačuvajem jaho rodnym. Ale vyhladaje tak, što jon nie byŭ źviazany z palitykaj i nie źjaŭlaŭsia palitviaźniem.
Padobna, što tyja, chto raspaŭsiudžvajuć hetuju infarmacyju, paprostu chłusiać.
Jakaja meta ludziej, jakija chočuć takim čynam zhulać na boli biełarusaŭ — nieviadoma. Mahčyma, jany raźličvali, što z takoj historyjaj im daduć prytułak u Šviecyi.
«Naša Niva» — bastyjon biełaruščyny
PADTRYMAĆCiapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary