Manholija pavinna admović va ŭjeździe prezidentu Rasii Uładzimiru Pucinu abo aryštavać jaho, kali jon zajedzie ŭ krainu, na padstavie ordara Mižnarodnaha kryminalnaha suda. Pra heta havorycca ŭ zajavie mižnarodnaj pravaabarončaj arhanizacyi Human Rights Watch.
Pucin pavinien naviedać Manholiju 3 vieraśnia, kab uziać udzieł u mierapryjemstvach, pryśviečanych 85-hodździu sumiesnaj pieramohi savieckich i manholskich vojskaŭ nad japonskimi ŭzbrojenymi siłami na race Chałchin-Hoł. Jaho zaprasiŭ prezident Uchnaahijn Churełsuch, paviedamlaje Rasijskaja słužba Radyjo Svaboda.
Heta pieršaja pajezdka Pucina ŭ krainu, jakaja ratyfikavała Rymski statut Mižnarodnaha kryminalnaha suda, z sakavika minułaha hoda — momantu vydačy ordara na jaho aryšt.
Prezidenta Rasii abvinavačvajuć u niezakonnym vyvazie ŭkrainskich dziaciej na niepadkantrolnyja Kijevu terytoryi.
Pa danych ahienctva Bloomberg, Ułan-Batar zapeŭniŭ Pucina, što jaho nie zatrymajuć pa prybyćci ŭ krainu.
Pravaabaroncy adznačajuć, što Manholija parušyć mižnarodnyja abaviazacielstvy jak člena MKS, kali dazvolić naviedać krainu i nie aryštuje jaho tam. Na dumku Human Rights Watch, pryjom Pucina nie tolki abrazić mnohich achviar złačynstvaŭ rasiejskich sił, ale i padarvie najvažniejšy pryncyp viaršenstva zakona.
Manholija stała členam MKS u 2003 hodzie. Pavodle damovy, kraina abaviazanaja supracoŭničać z sudom, u tym liku aryštoŭvajučy i vydajučy lubych padazravanych, jakija ŭjazdžajuć na jaje terytoryju.
Kali Pucin naviedaje Manholiju, heta budzie pieršy vypadak, kali kraina-čalec MKS prymie jaho paśla vydačy ordara na aryšt.
Human Rights Watch nahadvaje, što ŭ žniŭni minułaha hoda Pucin pavinien byŭ naviedać štohadovy samit lidaraŭ BRIKS u Paŭdniovaj Afrycy, krainie, jakaja pryznaje jurysdykcyju MKS. Vizit rasijskaha prezidenta ŭ vyniku byŭ skasavany.
Dazvoł na vizit Pucina taksama budzie aznačać admovu Manholii ad padtrymki MKS, śćviardžajuć pravaabaroncy.
Tym časam antyvajennaja pravaabarončaja kaalicyja na płatformie Change.org zaklikała manholskija ŭłady zatrymać Pucina. Siarod rasijskich apazicyjanieraŭ, jakija padpisali dakumient, Uładzimir Kara-Murza, fiłantrop Barys Zimin, akcior Artur Smaljaninaŭ, žurnalist Jaŭhien Kisialoŭ.
«Kali vy heta zrobicie, Manholija vyzvalić adrazu try krainy: Ukrainu, Biełaruś i Rasiju. Čarada čałaviečych pakut u hetych krainach budzie spynienaja, a vy nazaŭždy pakryjecie siabie słavaj zbaŭcaŭ», — havorycca ŭ pietycyi.
Ciapier čytajuć
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna15
Modnaja minskaja kaviarnia «Marks» trapiła ŭ skandał: adtul paprasili syści žančynu, jakaja malavała. Ale ŭsio nie tak adnaznačna
Były muž błohierki, jakaja razam z 17‑hadovym žanichom šykavała na sabranaje dla chvoraha dziciaci, raskrytykavaŭ tych, chto hetyja hrošy joj pieravodziŭ2222
Kamientary