Biznesoviec z top-200 raskazaŭ, za što siadzieŭ i čamu nie pahadziŭsia na pamiłavańnie
«Šukaj hrošy, pieravodź na aficyjny rachunak».
Valeryj Astrynski — pradprymalnik, vienčurny inviestar, eks-staršynia praŭleńnia supolnaści inviestaraŭ Angels Band (likvidavana ŭ lipieni 2024 hoda). U 2019 hodzie ŭvachodziŭ u top-200 samych bahatych ludziej krainy pa viersii «Ježiednievnika». U tym ža 2019-m na jaho zaviali kryminalnuju spravu i abvinavacili ŭ niedapłacie padatkaŭ. U 2021-m Valeryja asudzili na dva z pałovaj hoda «chatniaj chimii». Paśla adbyćcia terminu jon źjechaŭ za miažu.
Padrabiaznaściami spravy suprać jaho biznesmien padzialiŭsia ŭ novym vypusku jutub-kanała «Žyćcio-malina».
Astrynski adznačaje, što jaho abvinavacili ŭ niedapłacie padatkaŭ za 2010—2012 hady. Jak patłumačyŭ mužčyna, u tyja hady było amal niemahčyma vieści biznes biez zamiežnych kampanij, bo ŭmovy na valutnym rynku stvarali prablemy z raźlikami. Tamu pradprymalniki pracavali praz svaje zamiežnyja kampanii, kab zaklučać kantrakty z bujnymi zavodami i vieści mižnarodnyja finansavyja apieracyi.
Astrynski mieŭ u struktury biznesu estonskija kampanii. Jany nabyvali tavar u Kitai i zatym pastaŭlali jaho ŭ Biełaruś z nacenkaj. Estonskija kampanii płacili padatki ŭ svajoj krainie, a biełaruskija — u Biełarusi. Adnak biełaruskija siłaviki paličyli, što kampanii Astrynskaha niedapłacili padatki.
«U ich vypracavany ałharytm. Kab čałaviek byŭ zhavorlivy, treba ŭ kantory zatrymać zasnavalnika. (…) I pažadana jašče jaho kaleh. (…) Jany havorać: «Voś u ciabie byli takija abaroty, my ličym, što ty nie dapłaciŭ voś takuju sumu. Šukaj hrošy, pieravodź na aficyjny rachunak. I my pačynajem adpuskać ludziej, adkryvać rachunki (zdymać aryšt z rachunkaŭ. — NN).
Pamiatajučy papiarednija kiejsy (u mianie byŭ karotki dośvied — sutki na Akreścina, dvoje — u amierykancy), ja pryniaŭ rašeńnie: čym niešta dakazvać, pahadžajusia i płaču», — raskazvaje mužčyna.
U vyniku Astrynski vypłaciŭ dziaržavie paŭtara miljona dalaraŭ. Ale kryminalnuju spravu paśla hetaha nie zakryli.
«Kab uvohule być svabodnym čałaviekam biez kryminalnaj spravy, treba pahadzicca z usimi abvinavačvańniami, zapłacić škodu i potym napisać na kamisiju [pa pamiłavańni]. Kamisija tabie vystaŭlaje multyplikatar. I ty płaciš pa im — heta jašče «iks dva» (suma ŭ dvuchrazovym pamiery. — NN)».
Pradprymalnik skazaŭ, što bolš płacić nie moža i nie budzie. Sprava była nakiravanaja ŭ sud. U vyniku jamu prysudzili dva z pałovaj hoda «chatniaj chimii», jakuju jon adbyŭ u rodnaj vioscy ŭ Iŭjeŭskim rajonie.
«Ja aščadziŭ hrošy, atrymaŭ bahaty viaskovy dośvied», — zaŭvažaje biznesmien.
Źmianiŭ pientchaus na chutar. Jak viadomy biznes-anioł, što byŭ u top-200 samych upłyvovych ludziej u krainie, adbyvaje «chimiju»
Biznesmiena z top-200 samych upłyvovych u krainie asudzili na 2,5 hoda chatniaj chimii i zabaranili 5 hadoŭ zajmacca pradprymalnictvam
Inviestara Valeryja Astrynskaha zatrymali z-za ściaha z Pahoniaj na chutary
Kamientary