Televiadučaha, jaki nazyvaŭ biełarusaŭ bijamasaj, a Paźniaka nacystam, vyhnali z hramadskaha telebačańnia Litvy
Alhis Ramanaŭskas prapanavaŭ rasstrelvać litoŭcaŭ, jakija słuchajuć ruskuju muzyku. Ciapier u jaho prablemy.
Litoŭski hramadski viaščalnik LRT spyniŭ supracoŭnictva z televiadučym i błohieram Alhisam Ramanaŭskasam. Heta źviazana z rasśledavańniem suprać jaho pa fakcie mahčymaha padbuchtorvańnia da hvałtu, piša LRT.
Sprava źviazana z vykazvańniem Ramanaŭskasa, jakoje jon dapuściŭ u svaim padkaście. Błohier razmaŭlaŭ z palitykam Vitaŭtasam Sinicam pra toje, ci pavinna dziaržava aktyŭna ŭmiešvacca ŭ vychavańnie dziaciej u siemjach.
Ramanaŭskas, viadomy radykalnym nieprymańniem ruskaj movy i kultury, zajaviŭ, što ŭ litoŭcaŭ, jakija słuchajuć ruskuju muzyku, treba zabirać dziaciej, a samich hetych ludziej varta rasstrelvać.
«Ja razumieju, što toje, čaho ja chaču, heta ŭtopija, i ja heta razumieju. Ale ŭjavim sabie siamju, dzie baćka hučna hladzić ruski film, a maci hučna słuchaje ruskuju muzyku. Tut pytańnie tolki ŭ tym, što zrabić pieršym: adabrać dziaciej i potym ich rasstralać abo rasstralać na vačach u dziaciej? Nie, viadoma, spačatku zabrać dziaciej, a potym. Dziaciej treba zabirać u takich», — zajaviŭ Ramanaŭskas.
Vykazvańnie televiadučaha vyklikała vialiki hramadski rezanans, jamu daviałosia vybačacca. Vilenskaja ŭčastkovaja prakuratura pačała dasudovaje rasśledavańnie, ale abvinavačvańni pakul nikomu nie vystaŭlenyja.
Na fonie skandału Ramanaŭskas atrymaŭ papiaredžańnie ad Kamisii pa radyjo i telebačańni, a jaho siabroŭstva ŭ partyi chryścijanskich demakrataŭ było prypynienaje.
Ramanaŭskas viadomy taksama niepryjaznym staŭleńniem da biełarusaŭ. U lutym u adnym ź intervju televiadoŭca zajaviŭ, što «biełaruskaj nacyi nie isnuje», a samich biełarusaŭ jon nazvaŭ «bijamasaj».
«Siońnia ŭ nas 60 tysiač rasijanaŭ, jakich my čamuści nazyvajem biełarusami. Jakija biełarusy, jany havorać pa-biełarusku? Heta ruskija sa znakam jakaści, tut žudasnyja spravy», — kazaŭ Ramanaŭskas.
U červieni televiadoŭca zaklikaŭ zabaranić vystup u Vilni Zianona Paźniaka, nazvaŭšy taho «biełaruskim nacystam i miarzotnikam» i čamuści paraŭnaŭšy jaho z Žyrynoŭskim.
Kamientary
Prykładna jak Simanian na Krasoŭskaha pi..žona na rf tivi. kali toj ab ukrainskich dzieciach kazał .
Pa adnych instrukcyjach pracujut z.adnoj kišeni atrymlivajut...mnie tak padajecca