Bolš za 200 klijentaŭ paciarpieli ad firmy «Kuchni Čery», što rekłamavaŭ prapahandyst Tur z žonkaju
Škodu ŭžo acanili bolš jak na 2 miljony rubloŭ — na dziaržaŭnym telebačańni raskazali novyja padrabiaznaści.
Viadomaja meblevaja firma «Kuchni Čery», jakaja pracavała 15 hadoŭ, raptoŭna zakryłasia, nie vykanaŭšy zakazy. Klijenty zastalisia biez mebli, ale z kredytami na dziasiatki tysiač rubloŭ. Były dyrektar kampanii Jarasłaŭ Tałočka znachodzicca pad vartaj. Padrabiaznaści raskazaŭ telekanał «Biełaruś 1».
Kampanija vyrablała kuchni i inšuju meblu, mieła šourumy i vialikuju klijenckuju bazu. U hod svajho 15‑hodździa jana prapanoŭvała źnižku 15%. Častka pakupnikoŭ afarmlała zakazy ŭ kredyt, adnak 1 vieraśnia firma abviaściła, što nie vykanaje ich i nie viernie hrošy.
Adna z paciarpiełych, Darja Kirejeva, raskazała, što jaje siamja aformiła čatyry kredyty — na jaje, muža, maci i śviokra. Ahułam mebla dla kvatery kaštavała 54 tysiačy rubloŭ.
«Ja ŭziała kredyt na 13,5 tysiačy biełaruskich rubloŭ. Potym my vyrašyli paprasić baćkoŭ, kab jany dapamahli i taksama aformili na siabie kredyt, kab darabić usio. Našy dzieci ŭ nastupnym hodzie iduć u škołu, im patrebny jak minimum piśmovy stoł», — raskazała žančyna.
Pavodle Darji, 30 žniŭnia pradstaŭniki firmy jašče pryvieźli joj dva pafarbavanyja fasady, a ŭžo 1 vieraśnia paviedamili, što zakazy vykananyja nie buduć.
Inšy klijent, Mikita Kohan, zamoviŭ meblu ŭ krasaviku. Jaje musili dastavić da 20 lipienia, ale pryvieźli tolki 4 žniŭnia i nie sabrali. Ciapier mebla lažyć u skrynkach, a zaprasić inšuju firmu jon nie moža, bo praciahvajecca śledstva i jašče treba acanić škodu.
Kohan śćviardžaje, što ŭładalnik praciahvaŭ zaklučać novyja damovy, chacia ŭžo vioŭ pieramovy ab likvidacyi kampanii.
«Apošniuju damovu asabista ŭzhadniŭ Jarasłaŭ, uładalnik firmy, 30 žniŭnia. Heta značyć, 1 vieraśnia jon abviaściŭ ab likvidacyi, ale paličyŭ narmalnym uciahnuć u hetuju situacyju jašče adnu siamju», — skazaŭ mužčyna.
Kryminalnuju spravu suprać byłych dyrektara i zasnavalnika kampanii raspačali 4 vieraśnia. Načalnik Maskoŭskaha rajonnaha adździeła Śledčaha kamiteta Minska Valeryj Kamienieŭ zajaviŭ, što firma niekalki miesiacaŭ praciahvała prymać zakazy, choć znachodziłasia ŭ vielmi ciažkim finansavym stanoviščy.
«My miarkujem, što jany dakładna viedali, što hetyja abaviazacielstvy nie buduć vykananyja», — skazaŭ Kamienieŭ.
U milicyju pastupiła bolš za 200 zajaŭ ad paciarpiełych. Papiarednie škodu aceńvajuć bolš jak na 2 miljony rubloŭ, ale ŭsich paciarpiełych jašče nie ŭstanavili. Abvinavačany znachodzicca pad vartaj.
Sam były dyrektar Jarasłaŭ Tałočka ŭ kamientary ź SIZA patłumačyŭ prablemy pałomkami abstalavańnia, dadatkovymi vydatkami i niaŭdałym pašyreńniem kampanii.
«Usie faktary ŭ sukupnaści pryviali da takoj situacyi. Ja pieraacaniŭ ułasnyja siły, zanadta zachapiŭsia raźvićciom kampanii», — zajaviŭ jon.
U Śledčym kamitecie zajaŭlajuć, što šukajuć majomaść abvinavačanaha i vyvučajuć materyjalnaje stanovišča jaho svajakoŭ, kab damahčysia kampiensacyi škody. Banki ŭžo paviedamili klijentam, što adterminoŭki pa kredytach im nie daduć.
Mienavita hetu piramidu rekłamavaŭ letaś prapahandyst Ihar Tur razam z žonkaj Ksienijaj — kampanija rabiła im premijalnuju kuchniu ŭ novy dom.
Ciapier čytajuć
Zališniaje budaŭnictva: ci moža luboŭ biełarusaŭ inviestavać hrošy ŭ kvatery pryvieści da kryzisu na rynku nieruchomaści?10
Kamientary